លោកអធិការរង នគរបាលក្រុងកំពតម្នាក់ រងរបួសធ្ងន់ក្នុងករណីគ្រោះថ្នាក់ចរាចររថភ្លើងបុករថយន្ត
កំពត៖ លោកអធិការរងទទួលផ្នែកសណ្តាប់ធ្នាប់សាធារណៈ នៃអធិការដ្ឋាននគរបាលក្រុងកំពតម្នាក់ បានរងរបួសធ្ងន់ក្នុងករណីគ្រោះថ្នាក់ចរាចររថភ្លើងបុករថយន្ត។ ហេតុការណ៍គ្រោះថ្នាក់ចរាចរខាងលើបានកើតឡើង កាលពីថ្ងៃអង្គារ ១៤រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣០ ខែកក្កដា ឆ្នាំ២០១៩ វេលាម៉ោង១៨និង៣០នាទី ស្ថិតលើផ្លូវលំក្រាលគ្រួសក្រហម ស្ថិតក្នុងភូមិអូរតូច សង្កាត់អណ្តូងខ្មែរ ក្រុងកំពត ខេត្តកំពត។
ប្រភពពីនគរបាលខេត្តកំពតបានឱ្យដឹងថា អ្នកបើកបររថភ្លើងឈ្មោះ យ៉ែម សុវណ្ណ ភេទប្រុស អាយុ២៨ឆ្នាំ មានទីលំនៅបច្ចុប្បន្នភូមិព្រះពន្លា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ បើកបររថភ្លើងក្នុងទិសដៅពីលិចទៅកើត មកដល់ចំណុចកើតហេតុ ជាចំណុចឆ្លងកាត់ផ្លូវគ្រួសក្រហម មិនបានស៊ីផ្លេរ ក៏បានបុករថយន្តមួយគ្រឿង ចំទ្វារមុខផ្នែកខាងឆ្វេងនៃរថយន្ត បុករុញរថយន្តដល់ចម្ងាយ៧០០ម៉ែត្រទើបឈប់។
ចំណែកអ្នកបើកបររថយន្តឈ្មោះ ឆែម ហាក់ ភេទប្រុស អាយុ៥០ឆ្នាំ មានមុខងារជាអធិការរងទទួលផ្នែកសណ្តាប់ធ្នាប់សាធារណៈនៃអធិការដ្ឋាននគរបាលក្រុងកំពត មានទីលំនៅបច្ចុប្បន្នភូមិអូរតូច សង្កាត់អណ្តូងខ្មែរ ក្រុងកំពត ខេត្តកំពត បើកបររថយន្តម៉ាក TOYOTA RAV4 ពណ៌ស្ក ពាក់ស្លាកលេខ ភ្នំពេញ ២AK-១៥៣៨ ក្នុងទិសដៅពីជើងទៅត្បូង មកដល់ចំណុចកើតហេតុ ក៏ត្រូវរថភ្លើងបុក បណ្តាលឲ្យរងរបួសកម្រិតធ្ងន់ បានបញ្ជូនទៅព្យាបាលនៅមន្ទីរពេទ្យអនុស្សាវរីយ ស៊ុនយ៉ាឃៀល ៕
