លួចម៉ូតូសិស្សសាលាចំនួន៤គ្រឿងបានហើយ តែជម្លៀសដឹកចេញ ត្រូវនគរបាលក្របួចជាប់
ក្រចេះ៖ មានករណីអំពើចោរកម្មមួយ ដែលបង្កឡើងដោយជនមិនស្គាល់មុខ បានធ្វើ សកម្មភាពលួចម៉ូតូយ៉ាងហោចអស់ចំនួន៤គ្រឿង របស់សិស្សសាលាចេញពីផ្ទះរៀនគួរមួយកន្លែង នៅក្នុងភូមិត្រពាំងព្រីង សង្កាត់ក្រចេះ ក្រុងក្រចេះ កាលពីព្រលប់ថ្ងៃទី៣០ ខែកក្កដា។
ការប្រព្រឹត្តសកម្មភាពភាពក្នុងអំពើលួច នគរបាលបានកំណត់ថា ជនសង្ស័យបានធ្វើសកម្មភាព លួចប្រមូលយកម៉ូតូសិស្សទាំង៤គ្រឿងនោះជម្លៀសដឹក តាមរថយន្ត១គ្រឿង ម៉ាកសាំយ៉ុងពណ៌លឿង ពាក់ផ្លាកលេខ ភ្នំពេញ 2J 1354។
ក្រោយការតាមស្រាវជ្រាវ និងកំណត់លើមុខសញ្ញា នៅយប់ថ្ងៃដដែល នគរបាលស្រុកស្នួល បានធ្វើការចាប់ឃាត់ខ្លួនជនសង្ស័យម្នាក់ ជាមួយនឹងរថយន្តសាំយ៉ុងមួយគ្រឿង នៅចំណុចភូមិសំរ៉ង ឃុំឃ្សឹម ស្រុកស្នួល ក្រោយសង្ស័យថា មានជាប់ពាក់ព័ន្ធ នឹងករណីអំពើចោរកម្ម។
បន្ទាប់ពីមានការឃាត់ខ្លួនជនសង្ស័យឈ្មោះ ណាង ភារី ហៅទី អាយុ២២ឆ្នំា មានទីលំនៅឃុំស្រែចារ ស្រុកស្នួល ត្រូវបាននាំខ្លួនមកសាកសួរ នៅអធិការដ្ឋាននគរបាលក្រុងក្រចេះ៕
