ប្រច័ណ្ឌប្រពន្ធខ្លាំងពេក ប្តីដកកាំភ្លើងបាញ់ប្រពន្ធ របួសធ្ងន់

ភ្នំពេញ៖ ប្រច័ណ្ឌប្រពន្ធ ធ្វើបុរសជាប្តីដកកាំភ្លើង K59 បាញ់ប្រពន្ធខ្លួនឯង៨គ្រាប់ តែត្រូវ៥គ្រាប់បណ្ដាលឲ្យស្ត្រីជាប្រពន្ធរបួសធ្ងន់ នៅខណ្ឌសែនសុខ នៅវេលាម៉ោងជាង១១យប់ ថ្ងៃទី៧ ខែសីហា ឆ្នាំ២០១៩ នៅស្ថិតនៅក្នុងហាងទីរ៉ានី ស្ថិតនៅតាមបណ្ដោយផ្លូវរទេះភ្លើង សង្កាត់ទឹកថ្លា ខណ្ឌសែនសុខ រាជធានីភ្នំពេញ។

លោក ហួរ ម៉េងវ៉ាង អធិការនគរបាលខណ្ឌសែនសុខ បានប្រាប់ឲ្យដឹងថា ប្តីប្រពន្ធខាងលើនេះរស់នៅបែកគ្នា ដោយប្តី និងកូន២នាក់នៅខេត្ត ឯប្រពន្ធនៅភ្នំពេញ ដោយមុនពេលកើតហេតុ ប្តីបានទូរសព្ទ័ទៅប្រពន្ធមកហូបអី នៅហាងខាងលើ ដែលនៅជិតផ្លូវរថភ្លើង ក្នុងសង្កាត់ទឹកថ្លា ស្រាប់តែបុរសជាប្តីប្រច័ណ្ឌប្រពន្ធ បានដកកាំភ្លើងខ្លីមួយដើមម៉ាក K59 បាញ់សំដៅប្រពន្ធខ្លួនឯង៨គ្រាប់ ត្រូវ៥គ្រាប់បណ្ដាលឲ្យរងរបួសធ្ងន់ ត្រូវបានបញ្ជូនទៅសង្រ្គោះភ្លាមៗ នៅមន្ទីរពេទ្យផងដែរ។ បន្ទាប់ពីធ្វើសកម្មភាពបាញ់រួច បុរសជាប្តីបានព្យាយាមបើករថយន្តមួយគ្រឿង ម៉ាក HIGHLANDER ពណ៌ស ពាក់ផ្លាកលេខ បន្ទាយមានជ័យ 2A-6753 រត់គេចចេញពីកន្លែងកើតហេតុ តែត្រូវបានសមត្ថកិច្ចខណ្ឌសែនសុខ ដេញភ្លាមៗរហូតដល់ចំណុចច្រកចូលហ្គ្រែនភ្នំពេញ ទើបសមត្ថកិច្ចឃាត់ប្តីបាន និងដឹកយកទៅអធិការរដ្ឋាននគរបាលខណ្ឌសែនសុខ ដើម្បីសាកសួរផងដែរ។

លោកអធិការបានប្រាប់ទៀតថា ស្ត្រីជាប្រពន្ធត្រូវគ្រាប់កាំភ្លើង៥គ្រាប់ ចង្កេះ២គ្រាប់ ទ្រូងខាងឆ្វេង១គ្រាប់ ពោះ១គ្រាប់ និងដៃស្តាំ១គ្រាប់ រហូតមកទល់ព្រឹកនេះ កំពុងសង្គ្រោះបន្ទាន់នៅឡើយ ព្រោះស្ថានភាពធ្ងន់ធ្ងរ។ ជនសង្ស័យជាប្តីមានឈ្មោះ ឆោម ចំណាន អាយុ៣៩ឆ្នាំ មុខរបរជាយោធានៅភូមិភាគ៥ ឋានៈពលបាលឯក ប្រើប្រាស់កាំភ្លើង K59 រីឯនារីរងគ្រោះជាប្រពន្ធមានឈ្មោះ ជា គីមឡាង អាយុ២៩ឆ្នាំ រងរបួសធ្ងន់ត្រង់ចង្កេះ២គ្រាប់ ពោះ១គ្រាប់ ដៃស្តាំ ១គ្រាប់លើដើមទ្រូងឆ្វេង១គ្រាប់ ត្រូវបានបញ្ជូនទៅសង្រ្គោះនៅមន្ទីរពេទ្យកាល់ម៉ែត៕