អគ្គស្នងការនគរបាលជាតិ ទាត់ចោលការបំភ្លៃព័ត៌មានរបស់សម រង្ស៊ី
ភ្នំពេញ៖ អគ្គស្នងការនគរបាលជាតិ នាយឧត្តមសេនីយ៍ សន្ដិបណ្ឌិត នេត សាវឿន បានប្រកាសទាត់ចោល ចំពោះព័ត៌មានបំភ្លើស និងមានលក្ខណៈញុះញង់មួលបង្កាច់ របស់ទណ្ឌិត សម រង្ស៊ី ដែលបានយកទៅបង្ហោះនៅលើហ្វេសប៊ុករបស់ខ្លួន។
យោងតាមសេចក្ដីបំភ្លឺរបស់អ្នកនាំពាក្យ នៃអគ្គស្នងការដ្ឋាននគរបាលជាតិ នៅថ្ងៃទី១០ ខែសីហា ឆ្នាំ២០១៩នេះ នាយឧត្តមសេនីយ៍ នេត សាវឿន អះអាងថា មិនដែលមានប្រវត្តិរត់ចោលស្រុក និងប្រព្រឹត្តអំពើក្បត់ជាតិ ក្បត់ប្រជាជន បំផ្លាញសេចក្ដីរបស់ជាតិនោះឡើយ។
យោងសេចក្ដីបំភ្លឺរបស់អ្នកនាំពាក្យ នៃអគ្គស្នងការដ្ឋាននគរបាលជាតិ៖ “ថ្មីៗនេះ ទណ្ឌិត សម រង្ស៊ី ដែលជាមេដឹកនាំក្រុមឧទ្ទាមក្រៅច្បាប់ បានព្យាយាមបង្ហោះព័ត៌មាន ប្រឌិតបំផ្លើសបំភ្លៃ នូវការពិតដែលមានលក្ខណៈ ញុះញងមួលបង្កាច់ ធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូរបស់ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ។
លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ មានតួនាទីដឹកនាំកម្លាំង នគរបាលជាតិគ្រប់លំដាប់ថ្នាក់ ក្នុងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋ និងជាពិសេសដឹកនាំកម្លាំងអនុវត្តន៍ច្បាប់ ដើម្បីតាមចាប់ខ្លួនឧក្រិដ្ឋជន សម រង្សី និងបក្ខពួកតាមអំណាចសាលក្រម របស់តុលាការ។ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជាមេដឹកនាំជាន់ខ្ពស់ នៃកងកម្លាំងនគរបាលជាតិ ដែលតែងតែនៅរួមសុខទុក្ខ ជាមួយប្រជាពលរដ្ឋខ្មែរ និងខ្វាយខ្វល់ជានិច្ចពីសន្តិសុខ និងសុវត្ថិភាពរបស់ប្រជាពលរដ្ឋគ្រប់រូប ហើយមិនដែលមានប្រវត្តិរត់ចោលស្រុក និងប្រព្រឹត្តអំពើក្បត់ជាតិ ក្បត់ប្រជាពលរដ្ឋ ឬធ្វើសកម្មភាពញុះញង់ បង្កចលាចលដល់សង្គមជាតិ ឬធ្វើសកម្មភាពណាមួយ ក្នុងគោលដៅបំផ្លិចបំផ្លាញជាតិ និងសេចក្តីសុខសាន្តរបស់ប្រជាពលរដ្ឋ ដូចទណ្ឌិតសម រង្ស៊ី និងបក្ខពួកនោះទេ។
នៅក្នុងឋានៈជាពលរដ្ឋខ្មែរថ្លៃថ្នូរមួយរូប លោកនាយឧត្តមសេនីយ៍ សន្តិបណ្ឌិត នេត សាវឿន មិនមានចេតនាធ្វើការតបត ជាមួយទណ្ឌិត សម រង្សី និងបក្ខពួក ដែលជាក្រុមឧទ្ទាមក្រៅច្បាប់ តែងតែព្យាយាម ធ្វើឲ្យសង្គមចលាចល វឹកវរ បំផ្លាញសុខសន្តិភាព និងផលប្រយោជន៍របស់ប្រជាពលរដ្ឋ”។
សូមបញ្ជក់ថា កាលពីថ្ងៃទី៩ ខែសីហា ឆ្នាំ២០១៩ លោក សម រង្ស៊ី បានសរសេរលើហ្វេសប៊ុកថា “លោក ហ៊ុន សែន បានបញ្ជាលោក នេត សាវឿន ដែលជាក្មួយប្រសារបស់គាត់ និងជាអគ្គស្នងការនគរបាលជាតិ ឲ្យទៅចាប់លោក សម រង្ស៊ី ពេលលោកវិលត្រឡប់មកប្រទេសកម្ពុជាវិញ។ តែលោក នេត សាវឿន ខ្លួនឯង និងក្រុមគ្រួសារគាត់ (ភរិយា ឈ្មោះ ហ៊ុន គឹមឡេង / HUN KimLeng និងកូនស្រី ៣ នាក់) បានទៅទិញសញ្ជាតិពីប្រទេស២ នៅឯបរទេស គឺ ប្រទេស សេនគ្រីស្តុហ្វឺអេនណេវីស (Saint Christopher and Nevis) ជាកោះតូចមួយ នៅទ្វីបអាមេរិក និង ប្រទេសសៃប្រឹស (Cyprus) ជាកោះតូចមួយ នៅទ្វីបអឺរ៉ុប៕
