នគរបាលចាប់មុខសញ្ញាជួញដូរគ្រឿងញៀនម្នាក់ជិតមួយគីឡូ នៅជិតបញ្ជាការដ្ឋានកងរាជអាវុធហត្ថរាជធានីភ្នំពេញ

ភ្នំពេញ៖ ដោយមានការសម្របសម្រួលពីលោក ព្រះរាជអាជ្ញារង កងកម្លាំងនគរបាលប្រឆាំងគ្រឿងញៀន បានចុះបង្ក្រាបមុខសញ្ញាជួញដូរគ្រឿងញៀន យ៉ាងសកម្ម ១នាក់ ដោយចាប់ វត្ថុតាង សារធាតុញៀនមេតំហ្វេតាមីន(ICE) ទម្ងន់ ជិត១គីឡូក្រាម។

មន្ទីរប្រឆាំងគ្រឿងញៀននៅថ្ងៃទី 10 ខែសីហា បានផ្សព្វផ្សាយនៅលើហ្វេសប៊ុកផ្លូវការថា នៅថ្ងៃទី៧ ខែសីហា ឆ្នាំ២០១៩ វេលាម៉ោង ១៩.៣០នាទី ដោយ អនុវត្តតាមការបញ្ជាដឹកនាំរបស់ លោក នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែន ប្រឆាំងគ្រឿងញៀន និង លោក ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន លោក ឧត្តមសេនីយ៍ត្រី សារី បុត្រសត្យា នាយករងមន្ទីរប្រឆាំងគ្រឿងញៀន ដឹកនាំដោយផ្ទាល់ កម្លាំងជំនាញ(ក១០) នៃមន្ទីរប្រឆាំងគ្រឿងញៀន និងមានការចូលរួមដឹកនាំសម្របសម្រួលពីលោក ចែ សុង ព្រះរាជអាជ្ញារង បានចុះបង្ក្រាបមុខសញ្ញាជួញដូរគ្រឿងញៀន យ៉ាងសកម្ម នៅចំណុច ក្បែស្ថានីយ៍ប្រេងតេលា (នៅជិតបញ្ជាការដ្ឋានកងរាជអាវុធហត្ថរាជធានីភ្នំពេញ) ក្នុងសង្កាត់ស្ទឹងមានជ័យ ខណ្ឌស្ទឹងមានជ័យ រាជធានីភ្នំពេញ លទ្ធផល៖ ចាប់ខ្លួនជនសង្ស័យ ចំនួន ១នាក់ ឈ្មោះ សាន ត្រែង ភេទប្រុស កើតឆ្នាំ១៩៩៤ ជនជាតិខ្មែរ ។ វត្ថុតាងចាប់យក សារធាតុញៀនមេតំហ្វេតាមីន(ICE) ទម្ងន់ ៩៨៧,៥៥ក្រាម ម៉ូតូ ១គ្រឿង និង ទូរស័ព្ទដៃ ១គ្រឿង ៕