ចាប់ខ្ទើយម្នាក់ ជួញដូរគ្រឿងញៀនជិត១គីឡូ
ភ្នំពេញ៖ នគរបាលប្រឆាំងគ្រឿងញៀន បានចុះបង្ក្រាប និងឃាត់ខ្លួនមុខសញ្ញាជួញដូរគ្រឿងញៀនយ៉ាងសកម្មម្នាក់ នៅចំណុចតាមផ្លូវសាធារណៈ ស្ថិតក្នុងភូមិអូឌឹម សង្កាត់ចោមចៅ ខណ្ឌស្ទឹងពោធិ៍សែនជ័យ វត្ថុតាងចាប់យកសារធាតុញៀនប្រភេទមេតំហ្វេតាមីន(ICE)ប្រមាណជិត១គីឡូក្រាម ។
មន្ទីរប្រឆាំងគ្រឿងញៀននៅថ្ងៃទី១០ខែសីហានេះ បានបង្ហាញរបាយការណ៍ថា នៅថ្ងៃទី៨ ខែសីហា ឆ្នាំ២០១៩ វេលាម៉ោង ១៥និង៣០នាទី ដោយ អនុវត្តន៍តាមការបញ្ជាដឹកនាំរបស់ លោក នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែន ប្រឆាំងគ្រឿងញៀន និង លោក ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន លោក ឧត្តមសេនីយ៍ទោ សឿង ណុល នាយករងមន្ទីរប្រឆាំងគ្រឿងញៀន ដឹកនាំដោយផ្ទាល់ កម្លាំងជំនាញ(ក៧) នៃមន្ទីរប្រឆាំងគ្រឿងញៀន និងមានការចូលរួមដឹកនាំសម្របសម្រួលពីលោក សឿ មុនីរ័ត្ន ព្រះរាជអាជ្ញារង បានចុះបង្ក្រាបមុខសញ្ញាជួញដូរគ្រឿងញៀនយ៉ាងសកម្ម នៅចំណុច តាមដងផ្លូវ ស្ថិតក្នុងភូមិអូឌឹម ក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ លទ្ធផល៖ ចាប់ខ្លួនជនសង្ស័យ ចំនួន ០១នាក់ ឈ្មោះ ដួង រស្មីច័ន្ទ ភេទស្រី កើតឆ្នាំ១៩៩១ ជនជាតិខ្មែរ ។ វត្ថុតាងចាប់យក សារធាតុញៀនមេតំហ្វេតាមីន(ICE) ទម្ងន់ ៩៨៦,៦៧ក្រាម និង ទូរស័ព្ទដៃ ១គ្រឿង ៕
