ស្ទឹងត្រែងមិនមែនជាខេត្តផលិតគ្រឿងញៀន តែជាខេត្តគោលដៅដែលឧក្រឹដ្ឋជនបានចរាចរ និងនាំចូលដោយខុសច្បាប់នូវសារធាតុញៀន
ស្ទឹងត្រែង ៖ អាជ្ញាធរខេត្តស្ទឹងត្រែង និងអគ្គស្នងការដ្ឋាននគរបាលជាតិ បានរៀបចំកិច្ចប្រជុំផ្សព្វផ្សាយស្តីពីការងារទប់ស្កាត់ និងបង្ក្រាបការនាំចូលដោយខុសច្បាប់នូវសារធាតុញៀន នៅតាមបណ្តោយព្រំដែនកម្ពុជា-ឡាវ ក្រោមអធិបតីភាព លោក ម៉ុម សារឿន អភិបាលនៃគណៈអភិបាលខេត្តស្ទឹងត្រែង និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន លោក នាយឧត្តមសេនីយ៍ ឃុន សំបូរ អគ្គនាយករងអន្តោប្រវេសន៍ និងគណៈប្រតិភូអមដំណើរ នាថ្ងៃពុធ ទី១៤ ខែសីហា ឆ្នាំ២០១៩នៅសាលប្រជុំសាលាខេត្តស្ទឹងត្រែង ។
លោក ម៉ុម សារឿន អភិបាលនៃគណៈអភិបាលខេត្ត បានប្តេជ្ញាចិត្តក្នុងការដឹកនាំអនុវត្តន៍ការងារបង្ការ ទប់ស្កាត់ និងបង្ក្រាបការនាំចូលដោយខុសច្បាប់នូវសារធាតុញៀន ក្នុងភូមិសាស្ត្រខេត្តស្ទឹងត្រែង ឲ្យមានប្រសិទ្ធភាព និងស័ក្តិសិទ្ធិភាព។ លោកអភិបាលខេត្ត បានមានប្រសាសន៍បន្តថា ខេត្តស្ទឹងត្រែងមិនមែនជាខេត្តផលិតគ្រឿងញៀននោះឡើយ ប៉ុន្តែជាខេត្តគោលដៅដែលឧក្រឹដ្ឋជនបានចរាចរ ដឹកជញ្ជូន និងនាំចូលដោយខុសច្បាប់នូវសារធាតុញៀន ដើម្បីបន្តនាំយកទៅចែកចាយនៅបណ្តាខេត្តផ្សេងៗនាំបន្តឆ្ពោះទៅកាន់ប្រទេសទី៣។
លោកនាយឧត្តសេនីយ៍ ម៉ក់ ជីតូ ក៏បានលើកយកទិសដៅបន្តរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើកទិសដៅ៤ចំណុច៖
១)-បញ្ចប់ទាំងស្រុងនៅបំណាច់ឆ្នាំ២០១៩ នេះនូវរាល់បទល្មើសគ្រឿងញៀន តាមបណ្តាក្លឹបកម្សាន្ត និងទីសប្បាយដ្ឋាននានា។ ២)-ត្រូវរឹតបន្តឹងការត្រួតពិនិត្យដើម្បី ទប់ស្កាត់ បង្ក្រាបលំហូរគ្រឿងញៀនចូលមកកម្ពុជានាទិសឦសានតាមព្រំដែនកម្ពុជា-ឡាវ។ ៣)-ខិតខំស្រាវជ្រាវបង្ក្រាប រាល់ទីតាំងលួចលាក់កែច្នៃគ្រឿងញៀន។ ៤)-មិនត្រូវការពារ មិនត្រូវពាក់ព័ន្ធ មិនត្រូវអត់អោន មិនអន្តរាគមន៍ ចំពោះរាល់បទល្មើសគ្រឿងញៀន។
ជាចុងបញ្ចប់ លោក នាយឧត្តសេនីយ៍ ម៉ក់ ជីតូ បានមានមតិផ្តាំផ្ញើដល់មន្ទីរអង្គភាពពាក់ព័ន្ធជុំវិញខេត្ត ត្រូវធ្វើការប្រជុំផ្សព្វផ្សាយដល់មន្ត្រីក្រោមឱវាទរៀងរាល់១ខែម្តង និងមហាជនឲ្យបានយល់ជ្រួបជ្រាប អំពីគ្រោះថ្នាក់នៃគ្រឿងញៀន តម្លើងផែនទី កំណត់ទីតាំង កំណត់មុខសញ្ញា នៅភូមិសាស្ត្រគ្រប់គ្រងរបស់ខ្លួនដើម្បីធ្វើការបង្ក្រាបឲ្យបានទាន់ពេល ជាពិសេសត្រូវយកចិត្តទុកដាក់ត្រូវពិនិត្យ ចំពោះការចេញចូលរបស់ប្រទេសជិតខាង៕
