ការធ្វេសប្រហែសរបស់អ្នកដឹកសំរាម បណ្តាលឲ្យអ្នកជំនាញពន្លត់អគ្គីភ័យម្នាក់បានស្លាប់នៅលើដងផ្លូវ គួរឲ្យសោកស្តាយ
ខេត្តព្រះសីហនុ៖ ព័ត៌មានប្រចាំថ្ងៃរបស់ស្នងការដ្ឋាននគរបាលខេត្តព្រះសីហនុ បានឲ្យដឹងថា៖ ភ្នាក់ងារពន្លត់អគ្គីភ័យម្នាក់ បានស្លាប់បាត់បង់ជីវិត នៅលើដងផ្លូវ ផ្លូវជាតិលេខ៤ នៅចំណោតអូរត្រាវ សង្កាត់លេខ១ក្រុងព្រះសីហនុ ដោយសារតែរថយន្ដដឹកសំរាមមួយគ្រឿងដែលខូច ហើយចតនៅលើដងផ្លូវ មិនបានដាក់ស្លាកសញ្ញាឲ្យអ្នកធ្វើចរាចរណ៍បានឃើញនៅពេលយប់។
ករណីនេះ កើតហេតុឡើង នៅវេលាម៉ោង២៣:៣០នាទី ក្នុងរាត្រី ថ្ងៃទី១៥ ខែសីហា ឆ្នាំ២០១៩ ក្នុងពេលដែលជនរងគ្រោះជិះម៉ូតូម៉ាក XR230 ពណ៌ស-ក្រហម ផ្លាកលេខ ភ្នំពេញ1HK-6543 ធ្វើដំណើរទៅធ្វើការពេលយប់ ពីក្រុងព្រះសីហនុ ទៅព្រលានយន្តហោះកងកេង បានបុកពីក្រោយរថយន្តដែលឈប់ចត នៅពេលយប់ គ្មានដាក់ស្លាកសញ្ញា បណ្ដាលឲ្យជនរងគ្រោះស្លាប់បាត់បង់ជីវិត នៅកន្លែងកើតហេតុ នៅលើទ្រូងផ្លូវតែម្តង(មានពាក់មួកការពារ)។
ជនរងគ្រោះឈ្មោះ ញុល សារឿន ភេទប្រុស អាយុ ២៩ឆ្នាំ ធ្វើការនៅព្រលានយន្តហោះកងកេងខេត្តព្រះសីហនុ មុខជំនាញខាងពន្លត់អគ្គីភ័យ មានទីលំនៅភូមិ១សង្កាត់លេខ១ក្រុង/ខេត្តព្រះសីហនុ ។
រថយន្តដឹកសម្រាម ម៉ាក HYUNDAI ពណ៌ ទឹកសមុទ្រ គ្មានផ្លាកលេខ កម្មសិទ្ធរបស់ក្រុមហ៊ុនដឹកសំរាម KSWM មានទីតាំងភូមិ១ សង្កាត់លេខ១ ក្រុង/ខេត្តព្រះសីហនុ។
វត្ថុតាង រថយន្ត១គ្រឿង និងម៉ូតូ១គ្រឿងសមត្ថកិច្ចជំនាញ យកមករក្សារទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ៕
