អ្នកបើករថយន្ត NISSAN បើកធ្វេសប្រហែស ខ្ជីខ្ជា មិនប្រុងប្រយ័ត្ន បង្កគ្រោះថ្នាក់ចរាចរ បណ្តាលឲ្យខូចខាតម៉ូតូ ២ គ្រឿង និងរថយន្ត ២គ្រឿង
កណ្ដាល៖លោកព្រុំ សំណាង អធិការប៉ូលិសសស្រុកកៀនស្វាយ បានឲ្យដឹងពីករណីគ្រោះថ្នាក់ចរាចរ ផ្លូវគោករវាង រថយន្ត នឹង រថយន្តបណ្តាលឲ្យខូចខាតម៉ូតូ ២ គ្រឿង និងរថយន្ត ២គ្រឿង ព្រមទាំងសម្ភារៈផ្ទះលក់គុយទាវផងដែរ។
លោកអធិការប៉ូលិសស្រុកកៀនស្វាយ បានឲ្យដឹងថា ចំពោះករណីគ្រោះថ្នាក់ចរាចរនេះ កើតឡើងកាលពីព្រឹកថ្ងៃ១៦ ខែសីហា ឆ្នាំ២០១៩នេះ នៅលើកំណាត់ផ្លូវជាតិ លេខ១ ក្នុងចន្លោះគីឡូម៉ែត្រលេខ ១៧-១៨ភូមិ ទួលក្របៅ ឃុំគគីរ ស្រុកកៀនស្វាយ ខេត្តកណ្តាល។
លោកអធិការបន្តទៀតថា នៅថ្ងៃ ខែ ឆ្នាំកើតហេតុខាងលើ នេះដោយ
មានរថយន្តមួយគ្រឿង ម៉ាក SSANGYONG ISTANA ពណ៌ស ពាក់ផ្លាកលេខ ភ្នំពេញ 2AC 4659 បើកបរដោយ ឈ្មោះ ហាក់ សៀងហេង ភេទប្រុស អាយុ ១៨ឆ្នាំ មុខរបរ បើកឡានដឹក សិស្ស
(សាលាឯកជន) ស្នាក់នៅភូមិគគីរ ឃុំគគីរ ស្រុកកៀនស្វាយ ខេត្តកណ្តាល មានដឹកសិស្សចំនួន១០នាក់ បើកពីអ្នកលឿងទៅភ្នំពេញ តាមផ្លូវជាតិលេខ១ ។ ពេលបើកបរ មកដល់កន្លែងកើតហេតុខាងលើ បានបង្អង់ល្បឿនរថយន្តរកបត់មកខាងឆ្វេង ដៃស្រាប់តែមាន រថយន្ត ១គ្រឿង ម៉ាក Nissan diesel ពណ៌ បៃតង ប្រភេទសណ្តោង ពាក់ផ្លាកលេខ ភ្នំពេញ 3A – 8454 សណ្តោងស៊ឺមីរ៉ឺម៉ក ពាក់ផ្លាលលេខ ព្រះសីហនុ 4A- ០886 បើកបរដោយជនមិនស្គាល់អត្តសញ្ញាណ បើកបុករថយន្តម៉ាក SSANGYONG ISTANA ពីក្រោយ យ៉ាងពេញទំហឹងក្នុងទិសដៅស្របគ្នា បណ្តាលឲ្យរថយន្តម៉ាក SSANGYONG ISTANA រេចង្កូតទៅខាងឆ្វេងដៃហើយបន្តទៅបុកម៉ូតូ មួយគ្រឿងម៉ាក Honda click ពណ៌ស ពាក់ផ្លាកលេខ ភ្នំពេញ1FK 3032 ដែលឈប់ចតនៅក្បែរចិញ្ចើមផ្លូវជាតិលេខ១នោះ ដោយរថយន្តមិនទាន់អស់ល្បឿនក៏បានជ្រុលចង្កូតបុកចូលហាងលក់គុយទាវ កាហ្វេរបស់ឈ្មោះហាក់ ពាន់ ភេទប្រុស អាយុ៤៨ឆ្នាំ នៅភូមិ ទួលក្របៅ ឃុំគគីរ ស្រុកកៀនស្វាយ ខេត្តកណ្តាល បណ្តាលឲ្យរថយន្តឆាបឆេះយ៉ាងសន្ធោសន្ធៅភ្លាមៗតែម្តង ហើយក្នុងហេតុការណ៍គ្រោះថ្នាក់ ចរាចរនេះ គឺបណ្តាលឲ្យរងរបួសសិស្សចំនួន៤នាក់
នឹងមានអណ្ដាតភ្លើងឆាបឆេះលើរថយន្ត ទួរីស ដឹកសិស្ស នឹងបានកិច្ចអន្តរាគមន៍ពីប្រជាជន និងបានប្រើប្រាស់រថយន្តពន្លត់អគ្គិភ័យជួយអន្តរាគមន៍ពន្លត់ ដោយបាញ់ទឹកពន្លត់ផងដែរ។
ចំពោះសិស្សរងគ្រោះមាន
១/ ឈ្មោះ វ៉ា វិទូជុតិម៉ា ភេទប្រុស អាយុ៥ឆ្នាំ មានទីលំនៅភូមិចិនកោះ ឃុំគគីរ ស្រុកកៀនស្វាយ។
២/ ឈ្មោះឡេង វិរៈបញ្ញារិទ្ធ ភេទប្រុស អាយុ៥ឆ្នាំ មានទីលំនៅភូមិរទាំងត្បូង ឃុំភូមិធំ ស្រុកកៀនស្វាយ។
៣/ ឈ្មោះ វ៉ាត តុលា ភេទប្រុស អាយុ៥ឆ្នាំ មានទីលំនៅភូមិរទាំង ឃុំភូមិធំ ស្រុកកៀនស្វាយ។
៤/ ឈ្មោះ ឈឿន សុគុនលក្ខ័សី ភេទស្រី អាយុ៤ឆ្នាំ មានទីលំនៅភូមិចិនកោះ ឃុំគគីរ ស្រុកកៀនស្វាយ។
៥/ ខូចធុងគុយទាវ ឈ្មោះ ហាក់ ពាន់ និងសម្ភារៈ
ខូចរថយន្តធ្ងន់១គ្រឿង ខូចរថយន្ត ស្រាល១គ្រឿង ម៉ូតូខូចស្រាល១គ្រឿង យកមករក្សាទុកជាភស្តុតាងនៅអធិការដ្ឋាននគរបាលស្រុកកៀនស្វាយ។
សន្និដ្ឋាន ករណីនេះ គ្រោះថ្នាក់បណ្តាលមកពីអ្នកបើករថយន្ត NISSAN បើកធ្វេសប្រហែស ខ្ជីខ្ជា មិនប្រុងប្រយ័ត្ន បើកមានល្បឿនលឿន
មិនមើលស្ថានភាពផ្លូវខាងមុខ កោង មានឧបសគ្គមិនអាចគ្រប់គ្រងល្បឿន បានបង្កគ្រោះដល់យានដទៃនោះទេ៕
