ប៉េអឹមម្នាក់ បើករថយន្ដល្បាតក្នុងស្ថានភាពស្រវឹង បុកម៉ូតូមួយគ្រឿង បណ្តាលឲ្យមនុស្សស្លាប់ម្នាក់ និងម្នាក់ទៀតរងរបួស
ព្រះសីហនុ៖ មន្ត្រីកងរាជអាវុធហត្ថម្នាក់ បើករថយន្ដល្បាតមកបំពេញភារកិច្ចក្នុងស្ថានភាពស្រវឹង បានទៅបុកម៉ូតូមួយគ្រឿងពេញទំហឹង បណ្តាលឲ្យមនុស្សស្លាប់ម្នាក់ និងម្នាក់ទៀតរងរបួស ដែលកើតហេតុនៅវេលាម៉ោង២១និង៤០នាទី ថ្ងៃទី២៥ ខែសីហាឆ្នាំ២០១៩ នៅផ្លូវជាតិលេខ៤ មុខរោងចក្រក្រោន ក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ។
ព័ត៌មានប្រចាំថ្ងៃរបស់ស្នងការដ្ឋាននគរបាលខេត្តព្រះសីហនុ បានឲ្យដឹងថា ករណីគ្រោះថ្នាក់ចរាចរមួយកើតឡើង រវាងរថយន្ត១គ្រឿងម៉ាក NISSAN ពណ៌ ទឹកប៊ិច ពាក់ផ្លាកលេខ ខេមរភូមិន្ទ2-0185 អ្នកបើកបរឈ្មោះ ហេង សៀអូន ភេទប្រុស អាយុ ២៨ឆ្នាំ មុខរបរមន្រ្តីកងរាជអាវុធហត្ថក្រុងព្រះសីហនុ មានទីលំនៅបច្ចុប្បន្នភូមិ២ សង្កាត់លេខ៣ ក្រុង/ខេត្តព្រះសីហនុ រថយន្តជាកម្មសិទ្ធិរបស់អង្គភាពកងរាជអាវុធហត្ថក្រុង មានទិសដៅចេញពីបន្ទាយកងរាជអាវុធហត្ថក្រុង ឆ្ពោះទៅសាលាខេត្ត (ដើម្បីដើរល្បាតពេលយប់ ) លុះមកដល់ចំណុចខាងលើ បានបុកនឹងម៉ូតូ ១គ្រឿងម៉ាក HONDA C125 ពណ៌ ខ្មៅ ពាក់ផ្លាកលេខ ស្វាយរៀង1F-0933 ជិះគ្នា ២នាក់ ៖ ឈ្មោះ គីម សូលី ភេទប្រុស អាយុ ៣០ឆ្នាំ និង ឈ្មោះ តូ សេង ភេទប្រុស អាយុ ៣៦ឆ្នាំ អ្នកទាំងពីរមានមុខរបរ បុគ្គលិកក្រុមហ៊ុន ជី ធី អាយ និង មានទីលំនៅបច្ចុប្បន្ន ក្រុង/ខេត្តព្រះសីហនុ ទិសដៅផ្ទុយគ្នា ។ គ្រោះថ្នាក់នេះបណ្ដាលឲ្យស្លាប់មនុស្ស ១នាក់ និងរងរបួសមនុស្ស១នាក់ ឈ្មោះ គីម សូលី ស្លាប់នៅនឹងកន្លែងកើតហេតុ សាកសពបានដឹកយករក្សាទុកនៅវត្តឥន្ទញ្ញាណ ( ហៅវត្តក្រោម ) និង ឈ្មោះ តូ សេង រងរបួសធ្ងន់ បានបញ្ជូនទៅសង្រ្គោះនៅគ្លីនិកមិត្តភាពឃ្លាំងលើ ។
អ្នកបើកបររថយន្ត បាននាំខ្លួនមកកាន់ការិយាល័យនគរបាលចរាចរណ៍ផ្លូវគោក (បានធ្វើការត្រួតពិនិត្យជាតិអាកុល រកឃើញមានចំនួន០,៤០mg/l ) ។
រថយន្ត១គ្រឿង និងម៉ូតូ១គ្រឿង សមត្ថកិច្ចជំនាញយកមករក្សាទុកនៅ ការិយាល័យនគរបាលចរាចរណ៍ផ្លូវគោក ដើម្បីចាត់ការតាមនីតិវិធី ៕
