រថយន្ត២គ្រឿង រ៉េចង្កួតបុកគ្នា ពេញទំហឹង
បាត់ដំបង៖ រថយន្តទេសចរណ៍ និងរថយន្តដឹកទំនិញ បានបោះពួយក្នុងល្បឿនយ៉ាងលឿនបញ្រ្ចាសទិសគ្នា ទំនងអ្នកបើកបរងងុយដេក បានរ៉េចង្កួតទៅបុកគ្នាពេញទំហឹងធ្លាក់ចេញពីផ្លូវ ក្រឡាប់បះជើង។
សមត្ថកិច្ចគ្រប់គ្រងមូលដ្ឋានឃុំគារ បានប្រាប់ឲ្យដឹងថា ករណីគ្រោះថ្នាក់ចរាចរនេះ មិនបណ្តាលឲ្យប៉ះពាល់ដល់អាយុជីវិតមនុស្សឡើយ ប៉ុន្តែគ្រាន់តែបង្កឲ្យមានអ្នករងរបួសប៉ុណ្ណោះសរុបចំនួន៣នាក់ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ២៣៨និង២៣៩ វេលាម៉ោងប្រមាណជិត៧ ថ្ងៃទី២៧ ខែសីហា ឆ្នាំ២០១៩ ត្រង់ចំណុចក្រុមទី១៥ ក្នុងភូមិអូរគ្រៀត ឃុំគារ ស្រុកមោងឫស្សី ខេត្តបាត់ដំបង។
ករណីគ្រោះថ្នាក់ខាងលើនេះ មិនទាន់ដឹងពីមូលហេតុនៅឡើយទេ គ្រាន់តែភ្លាមៗប្រជាពលរដ្ឋនៅកន្លែងកើតហេតុ បានបញ្ជាក់ថា រវាងរថយន្តដែលបុកគ្នាទាំង២គ្រឿង បើកបរលឿនក្នុងទិសដៅផ្ទុយគ្នា ពីកើតទៅលិច ស្រាប់តែបុកគ្នាលាន់ឮយ៉ាងខ្លាំង ហើយក៏ជ្រុលប៉ើងចេញពីគន្លងផ្លូវតែម្តង ធ្លាក់ចេញពីផ្លូវ ដោយរថយន្តប្រភេទទេសចរណ៍ក្រឡាប់បះជើង។
ជនរងគ្រោះនៅក្នុងហេតុការណ៍នេះមានឈ្មោះរើន សារ៉ន ភេទប្រុស អាយុ៣១ឆ្នាំ រស់នៅភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង ជាម្ចាស់រថយន្តម៉ាកឡិចស៊ីស៤៧០ ប្រភេទទេសចរណ៍ ពាក់ផ្លាកលេខភ្នំពេញ ២P-១២៥៦ ចំណែកភាគីម្ខាងទៀតក្រោយពេលកើតហេតុបានរត់គេចខ្លួនបាត់ បើកបររថយន្តម៉ាក ISUZUZ ប្រភេទរថយន្តដឹកទំនិញខ្នាតធំ ពាក់ផ្លាកលេខ ព្រះសីហនុ ៣A-២០៤២។
រីឯជនរងគ្រោះដែលរួមដំណើរជាមួយចំនួន៣នាក់ផ្សេងទៀត មិនទានស្គាល់អត្តសញ្ញាណឡើយ អ្នកទាំង៣នាក់ ត្រូវសមត្ថកិច្ចនិងប្រជាពលរដ្ឋ បញ្ជូនទៅកាន់មន្ទីរពេទ្យ ដើម្បីព្យាបាលរងរបួស៕
