វិធានការដោះស្រាយបញ្ហាហេដ្ឋារចនាសម្ព័ន្ធ ក្នុងខេត្តព្រះសីហនុ
ភ្នំពេញ៖ គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ (គ.ស.ហ) ដឹកនាំដោយលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ស.ហ មានរៀបចំកិច្ចប្រជុំអន្តរក្រសួង ដើម្បីពិនិត្យ និង ពិភាក្សាអំពី “វិធានការដោះស្រាយបញ្ហាហេដ្ឋារចនាសម្ព័ន្ធក្នុងខេត្តព្រះសីហនុ” នាព្រឹកថ្ងៃទី ២៨ ខែ សីហា ឆ្នាំ ២០១៩, នៅទីស្ដីការក្រសួងសេដ្ឋកិច្ច និងហិរញ្ញវត្ថុ ។
ស្របពេលមីងណើនយ៉ាង តំហុកកៃការអភិវឌ្ឍ រួមនឹង កំណើន ប្រជាជនខ្ពស់ក្នុង ក្រុងព្រះសីហនុ, លទ្ធភាពទ្រទ្រង់នៃហេដ្ឋាចនាសម្ព័ន្ធរូបវ័ន្តរបស់ខេត្តត្រូវបាន និង កំពុងក្លាយជា បញ្ហាប្រឈម ដ៏ ធំសម្រាប់ខេត្តភាគនិរតីមួយនេះ ។ជាក់ស្តែង ក្រៅពីបញ្ហាគុណភាព និង សមត្ថភាព ទ្រទ្រង, ផ្លូវថ្នល់ក្នុងក្រុង ក៏ទទួលរងការខូចខាតគួរឱ្យកត់សម្គាល់ដោយសារជំនន់ទឹកភ្លៀងនាពេលថ្មីៗនេះ ជាមួយនឹង ការរំលោភ ចាក់បំពេញដី ដោយខុសច្បាប់លើអូរធម្មជាតិដែលជាប្រព័ន្ធរំដោះទឹកភ្លៀង ចាក់ចូលសមុទ្រ ។ បន្ថែមលើនេះ, ប្រព័ន្ធលូរំដោះទឹកភ្លៀង និងទឹកកខ្វក់ បច្ចុប្បន្នក៏មិនអាចឆ្លើយតបដោយប្រសិទ្ធភាពទៅនឹងទំហំជំនន់ទឹកភ្លៀង និង ការបញ្ចេញទឹកកខ្វក់ពីក្នុងក្រុងទាំងមូលនោះទេ ។ នៅឆ្នាំ ២០១៨បរិមាណបញ្ចេញទឹកកខ្វក់នៅខេត្តព្រះសីហនុ មានរហូត ដល់ ២៥.០០០ ម៉ែត្រគុប ក្នុង ១ ថ្ងៃ ហើយពីបានព្យាករណ៍ថានឹងកើនឡើង ដល់ ៤៧.០០០ ម៉ែត្រគុប ក្នុង ១ ថ្ងៃ នៅឆ្នាំ២០២៣ និង អាចបន្តកើនឡើងរហូត ដល់ ៦៤.០០០ម៉ែត្រគុប ក្នុង ១ ថ្ងៃ នៅឆ្នាំ ២០៣០ ។ បញ្ហាប្រឈមទាំងនេះ ទាមទារឱ្យមានវិធានការដោះស្រាយប្រកបដោយប្រសិទ្ធភាព និង បន្ទាន់ដើម្បីកែលម្អប្រព័ន្ធហេដ្ឋារចនាសម្ព័ន្ធក្នុងខេត្តព្រះសីហនុ ។
ក្នុងន័យនេះ, រាជរដ្ឋាភិបាល និង អាជ្ញាធរដែនដីបានខិតខំជួសជុលកែលម្អ ផ្លូវក្នុងក្រុងជាបន្តបន្ទាប់ ដោយគម្រោងជួសជុលផ្លូវចំនួន ២២ ខ្សែ ក្នុង ក្រុង ស្មើនឹង ប្រវែង ៣៦.៤៣៥ ម៉ែត្រ បានទទួលការអនុម័តរួចហើយ ។ មកទល់ពេលនេះ, ការស្តារ និងជួសជុលផ្លូវទាំង នោះមានវឌ្ឍនភាព គួរឱ្យកត់សម្គាល់ ជាពិសេសកំណាត់ផ្លូវប្រើប្រាស់ថវិកាថ្នាក់ក្រោមជាតិ ។ ប៉ុន្តែ ទោះជាយ៉ាងណាក៏ដោយ មានកំណាត់ផ្លូវមួយចំនួនហាក់មានវឌ្ឍភាពយឺត ដោយជួបប្រទះការលំបាកមួយចំនួន រួមមាន ការទទួលរង ជំនន់ទឹកភ្លៀង បណ្តាលឱ្យមានការលិចលង់ លើកំណត់ផ្លូវមួយចំនួនជាដើមដែលទាមទារឱ្យមាន ការខិតខំជម្នះបន្ថែមទៀត ។ ជាមួយគ្នានេះ, ស្ថានភាព បច្ចុប្បន្ននៃប្រព័ន្ធរំដោះទឹកភ្លៀង និងទឹកកខ្វក់ក្នុងក្រុង ដែលធ្វើឱ្យក្រុងទទួលរងនូវការលិចលង់ពេលមានភ្លៀងធ្លាក់ខ្លាំង ប៉ុន្មានថ្ងៃកន្លងមកនេះ ។
ជាមួយនឹងការគិតគូរ និងវិធានការអនុវត្តរយៈពេលវែង ក្នុងការរៀបចំប្រព័ន្ធរំដោះទឹកក្នុងក្រុង , ស្ថានការបច្ចុប្បន្នតម្រូវឱ្យមានការគិតគូរ លើវិធានការបន្ទាន់ ដើម្បីបញ្ចៀសការលិចលង់ក្រុង កម្រិតធ្ងន់ធ្ងរបន្តទៀត ជាពិសេស ចំណាត់ការបន្ទាន់ជាក់ស្តែង ចំពោះការរំលោភបំពានលើនិយាមការអូរធម្មជាតិទាំង ៥ ក្នុងក្រុង ។ ឆ្លើយបតនឹងបញ្ហានេះ , អង្គប្រជុំបានឯកភាព ដាក់ចេញវិធានការបន្ទាន់ចំពោះមុខ ដូចខាងក្រោម៖
ទី១. ការងារបន្ទាន់ និងជាកិច្ចការអាទិភាពះ គឺត្រូវស្តារអូរធម្មជាតិទាំង ៥ និងលូ ដែលមានស្រាប់ ដែលសព្វថ្ងៃកំពុងទទួលរងការរំលោភ យកចំណីអូរ និងប្រឡាយ ដើម្បីបើកមុខទឹកហូរ និងដោះស្រាយជំនន់ទឹកភ្លៀង ។ ការអនុវត្តកិច្ចការនេះ, ក្រសួង-ស្ថាប័នមានសមត្ថកិច្ច ត្រូវមានភាពម៉ឺងម៉ាត់ និង ដាក់ឱសានវាទច្បាស់លាស់ ដើម្បី ឱ្យម្ចាស់សំណង់អគារ លំនៅដ្ឋានដែលសង់រំលោភលើលូ ប្រឡាយ/ អូរធម្មជាតិ ត្រូវរុះរើចេញជាដាច់ខាត ។ ចំពោះសំណង់អគារធំៗ ម្ចាស់សំណង់ត្រូវរៀបចំជីកប្រឡាយវាង/ លូបង្ហូរទឹកវាង ដោយរៀបចំ ជាសំណង់បេតុងស្របតាមស្តង់ដារសំណង់ ។
ទី២.បង្កើនល្បឿនការស្តារ និងជួសជុលកំណាត់ផ្លូវទាំង ២២ ខ្សែដែលមិនទាន់បានបញ្ចប់ៈ ក្រុមការងារ
ដែលទទួលបន្ទុកសិក្សាពីតម្រូវការជួសជុលនៃកំណាត់ផ្លូវទាំងនេះកន្លងមក ត្រូវធ្វើការសិក្សា និងវាយតម្លៃឡើងវិញ ពីទំហំនៃការជួលជុល ព្រោះថា ស្ថានភាពមានការប្រែប្រួលខ្លាំងនាពេលថ្មីៗនេះ ដែលបង្កដោយជំនន់ទឹកភ្លៀង ការដឹកលើសទម្ងន់ និងការបំពានចំណីផ្លូវ ជាដើម ក៏ដូចជាធ្វើការសិក្សាលើលទ្ធភាព ក្នុងការពង្រីក និងកែលម្អផ្លូវវាងក្រុង ដើម្បី សម្រាលបន្ទុកចរាចរលើផ្លូវធំៗមួយចំនួន រាប់ទាំងកំណត់ផ្លូវជាតិលេខ ៤ ផងដែរ ដើម្បីដាក់ជូនរាជរដ្ឋាភិបាលពិនិត្យ និង សម្រេចសាជាថ្មី ។
ទី៣ វិធានការរយៈពេលវែងៈ ការសាងស្ថានីចម្រោះទឹកកខ្វក់និងការពង្រីកប្រព័ន្ធលូ និងតម្រូវការហេដ្ឋារចនាសម្ព័ន្ធរូបវន្តផ្សេងទៀត និងដាក់បញ្ចូលក្នុងការសិក្សាផែនការមេ ដែលគ្រប់ជ្រុងជ្រោយដោយ រាប់ទាំងការគិតគូរពីប្រភពនៃហិរញ្ញប្បទាន តាមគោលការណ៍ * យកស្លឹកត្នោតខ្ចប់ស្ករត្នោត* ដែលជាអនុសាសន៍ណែនាំដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី ដោយយកចំណូលពី ការធ្វើឯកជនូបនីយកម្មអចលនទ្រព្យរបស់ខេត្តព្រះសីហនុ ដើម្បីការកសាងហេដ្ឋារចនាសម្ព័ន្ធក្នុងខេត្តវិញ
សំដៅបង្កើនប្រសិទ្ធភាព និងចីរភាពនៃការអភិវឌ្ឍហេដ្ឋារចនាសម្ព័ន្ធក្នុងខេត្តព្រះសីហនុ ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ប្រធានអង្គប្រជុំ បានថ្លែងអំណរគុណ និងវាយតម្លៃខ្ពស់ដល់ថ្នាក់ដឹកនាំក្រសួង-ស្ថាប័នពាក់ព័ន្ធ ដែលបានចូលរួមយ៉ាងសកម្មក្នុងការពិភាក្សារកដំណោះស្រាយនិងផ្តល់ជាធាតុចូលក្នុងផែនការមេ នៃការរៀបចំហេដ្ឋារចនាសម្ព័ន្ធ ដែលមានលក្ខណៈគ្រប់ជ្រុងជ្រោយ និងមានបទដ្ឋានបច្ចេកទេសត្រឹមត្រូវ និងបានស្នើឱ្យគ្រប់ក្រសួង-ស្ថាប័នពាក់ព័ន្ធបន្តចូលរួមផ្តល់កិច្ចសហការប្រកបដោយស្មារតីទទួលខុសត្រូវ និងយោគយល់ខ្ពស់ ៕
