សាខាកាកបាទក្រហមកម្ពុជារាជធានីភ្នំពេញ ចុះអប់រំផ្សព្វផ្សាយអំពីសុវត្ថិភាពចរាចរណ៍ និងធ្វើអនាម័យបរិស្ថាននៅផ្សារអូឫស្សី
ភ្នំពេញ៖លោកជិន ប៊ុនធឿន នាយកប្រត្តិបត្តិសាខាកាកបាទក្រហមកម្ពុជា រាជធានីភ្នំពេញ និង ជានាយករងរដ្ឋបាលសាលារាជធានីភ្នំពេញ បានអោដឹងថាដោយកាលពីព្រឹកថ្ងៃទី១២ ខែ កញ្ញា ឆ្នាំ ២០១៩នេះ សាខាកាកបាទក្រហមកម្ពុជា រាជធានីភ្នំពេញ បានដឹកនាំយុវជនកាកបាទក្រហមកម្ពុជា ប្រចាំវិទ្យាល័យបាក់ទូក និងអ្នកស្មគ្រ័ចិត្តកាកបាទក្រហម ព្រមទាំងអាជ្ញាធរមូលដ្ឋានក្នុងខណ្ឌ៧មករា រួមនិងគណៈកម្មការផ្សារអូរឬស្សី សរុបចំនួន៥៣នាក់ បានចុះអប់រំផ្សព្វផ្សាយអំពី សុវត្ថិភាពចរាចរណ៍ និងសម្អាតអនាម័យបរិស្ថានជូនដល់ប្រជាពលរដ្ឋ នៅផ្សារអូរឬស្សី ។
តាមការឲ្យដឹងពី លោក ប៉ាត ប៊ុនផា មន្ត្រីទទួលបន្ទុកយុវជនប្រចាំសាខាកាកបាទក្រហមកម្ពុជា រាជធានីភ្នំពេញ បានលេីកឡេីងថា៖ គោលបំណងនៃការចុះអប់រំផ្សព្វផ្សាយនាពេលនេះ គឺដេីម្បីក្រេីនរំលឹក ក៏ដូចជាអប់រំដល់បងប្អូនប្រជាពលរដ្ឋឲ្យមាន ការយល់ដឹងច្រើនថែមទៀតពីគ្រោះថ្នាក់ចរាចរណ៍ផ្លូវគោក និងការមិនប្រព្រឹត្តនូវឥរិយាបទ ដែលនាំឲ្យមានគ្រោះថ្នាក់ក្នុងពេលធ្វើដំណើរ ក្នុងនោះរួមមានទាំងការបើកបរក្រោមឥទ្ធិពលនៃគ្រឿងស្រវឹងផងដែរ ។ លោកសង្កត់ធ្ងន់ថា ការបើកបរក្រោមឥទ្ធិពលនៃគ្រឿងស្រវឹង គឺជាមូលហេតុធំមួយដែលបណ្ដាលឲ្យមានអ្នកបាត់បង់ជីវិតច្រើន ក្នុងនោះធ្វើឲ្យអ្នកបើកបរស្រវាំងភ្នែក ហ៊ឹងត្រចៀក ការគិត និងធ្វើសេចក្ដីសម្រេចចិត្តមិនបានលឿន រីឯសកម្មភាពបញ្ជាយានយន្តទៀតសោត ក៏មិនបានរហ័សដូចអ្នកដែលមិនស្ថិត ក្រោមឥទ្ធិពលនៃគ្រឿងស្រវឹងដែរ ។
ជាទូទៅគ្រោះថ្នាក់ដែលបណ្ដាល មកពីការបើកបរក្រោមឥទ្ធិពលនៃគ្រឿងស្រវឹង រមែងធ្ងន់ជាងគ្រោះថ្នាក់ដែលមិនពាក់ព័ន្ធដល់គ្រឿងស្រវឹង ព្រោះថាកាលបើស្ថិតក្នុងស្ថានភាពស្រវឹង អ្នកបើកបរអាចនឹងមានចិត្តបើកបរលឿនហួសល្បឿនកំណត់ បើកវ៉ាជែងដោយខ្វះការប្រុងប្រយ័ត្ន មិនយកចិត្តទុកដាក់ក្នុងការពាក់ខ្សែក្រវាត់សុវត្ថិភាព ឫមួកសុវត្ថិភាព មិនគោរពភ្លើងឫផ្លាកសញ្ញាចរាចរណ៍ជាដើម ដូច្នេះសូមបងប្អូនប្រជាពលរដ្ឋទាំងអស់ បើស្រវឹងសូមកុំបើកបរ និងពេលបើកបរត្រូវពាក់មួកសុវត្ថិភាព និងខ្សែក្រវ៉ាត់សុវត្ថិភាពជានិច្ច ៕
