បុគ្គលិកខារ៉ាអូខេថៅកែចិន នៅក្រុងបាវិត ជាង២០នាក់សង្ស័យពុលមី និងបន្លែ ដោយសារខ្វះអនាម័យ
ខេត្តស្វាយរៀង៖ បុគ្គលិកខារ៉ាអូខេមានប្រុសមានស្រីយីហោ ហ្វាងថាងល៊ាំងហ្វាន់ស័រ ចំនួន២៤នាក់ ក្នុងនោះមានជនជាតិចិន៤នាក់ បានពុលមី ប្រកាច់ក្អួតចង្អោរ វិលមុខ បញ្ជូនមកសង្គ្រោះនៅគ្លីនិកឯកជនមួយ នៅក្រុងបាវិត។
ករណីសង្ស័យថាពុលមីនិងបន្លែនេះ បានកើតឡើងនាវេលាម៉ោង១និង៣០នាទីយប់រំលងអធ្រាត្រ ឈានចូលថ្ងៃទី៧ ខែតុលា ឆ្នាំ២០១៩ នៅចំណុចខារ៉ាអូខេថៅកែចិនយីហោ ហ្វាងថាងល៊ំាងហ្វាន់ស័រ ក្នុងបរិវេណកាស៊ីណូ lasvigassun ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
បើតាមការឲ្យដឹងពីបុគ្គលិកម្នាក់ ឈ្មោះ ម៉ន សាកាន ភេទស្រី អាយុ៤៨ឆ្នាំ បានបញ្ជាក់ថា នៅមុនពេលកើតហេតុការណ៍នេះ មានបុគ្គលិកនៅក្នុងខារ៉ាអូខេខាងលើ បាននាំគ្នាហូបមីលាយជាមួយស្ពៃជើងទាក្រោយពីហូបរួច បានប្រមាណជាង១ម៉ោង បានធ្វើទុក្ខ ក្អួតចង្អោរ វិលមុខ ថប់ដង្ហើម ដោយឃើញអាការៈបុគ្គលិកមិនស្រួលខ្លួនបែបនេះ មេកាខារ៉ាអូខេ ក៏បញ្ជូនមកសង្គ្រោះបន្ទាន់ នៅគ្លីនិកឯកជនមួយកន្លែង នៅក្រុងបាវិតតែម្តង។
ប្រភពបានបន្តទៀតថា រហូតមកដល់វេលាម៉ោង២រសៀល ថ្ងៃទី៧ ខែតុលា ឆ្នាំ២០១៩នេះ បុគ្គលិកចំនួន១៤នាក់ បានចេញពីគ្លីនិក ហើយនៅសល់តែ១០នាក់ទៀតតែប៉ុណ្ណោះ ដែលមិនទាន់បានធូរស្បើយបន្ត នៅសម្រាកព្យាបាលបន្តទៀត។
ទោះបីយ៉ាងណា លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង បានឲ្យក្រុមអ្នកសារព័ត៌មានតាមទូរស័ព្ទដឹងថា លោកមិនទាន់ទទួលបានព័ត៌មាននេះទេ ដោយសារតែមន្ត្រីរបស់លោក មិនទាន់បានរាយការណ៍មក។
ពាក់ព័ន្ធនឹងករណីនេះ ក្រុមអ្នកសារព័ត៌មានមិនអាចរកការបំភ្លឺ ពីថៅកែខារ៉ាអូខេជនជាតិចិន ខាងលើបានទេ នៅរសៀលថ្ងៃទី៧ ខែតុលាឆ្នាំ២០១៩នេះថា តើបណ្តាលមកពីអ្វីឲ្យពិតប្រាកដនោះ។ ចំណែកលោកគ្រូពេទ្យម្នាក់ ដែលសុំមិនបញ្ចេញឈ្មោះ បានឲ្យដឹងថា ករណីបុគ្គលិកខារ៉ាអូខេ ដែលមកសម្រាកនៅគ្លីនិកនេះ បណ្តាលមកពីពុលអាហារ និងខ្វះអនាម័យ៕
