រថយន្ត កាម៉ារីបាឡែន មួយគ្រឿង វាជែងខ្វះការប្រុងប្រយ័ត្ន ជ្រុលទៅបុកម៉ូតូ ស្លាប់មន្ត្រីកងរាជអាវុធហត្ថក្រុងភ្នំពេញម្នាក់
ភ្នំពេញ៖ មន្ត្រីកងរាជអាវុធហត្ថក្រុងភ្នំពេញម្នាក់បានស្លាប់នៅនឹងកន្លែង ក្នុងករណីគ្រោះថ្នាក់ចរាចរ កាលពីវេលាម៉ោង៣រំលងអធ្រាត្រឈានចូល ថ្ងៃទី១៦ ខែតុលា ឆ្នាំ២០១៩ ជិតនិងផ្សារបេសេចាស់ ផ្លូវ៣៧១ សង្កាត់ចាក់អង្រែលើ ខណ្ឌមានជ័យ ។
នគរបាលមូលដ្ឋាន បានបញ្ជាក់ថា ជនរងគ្រោះ បានជិះម៉ូតូធ្វើដំណើរតាមផ្លូវ ក៏ត្រូវរថយន្ត កាម៉ារីបាឡែន មួយគ្រឿង វាជែងខ្វះការប្រុងប្រយ័ត្ន ជ្រុលទៅបុក បណ្តាលឲ្យបុរសរូបនោះ ខ្ទាតមនុស្សបោកនឹងថ្នល់ស្លាប់បាត់បង់ជីវិតភ្លាមៗ រីឯម៉ូតូខ្ទាតជិត១០០ម៉ែត្រ។ ករណីនេះរថយន្តបង្ក ម៉ាក កាម៉ារីបាឡែន ពណ៌ស ពាក់ផ្លាកលេខ ភ្នំពេញ 2BC 8136 បើកបរ ដោយមនុស្សមិនស្គាល់អត្តសញ្ញាណ បានរត់គេចខ្លួនបាត់ តែត្រូវបានកម្លាំងល្បាតប្រទះឃើញយករថយន្តទៅប្លុងចោល នៅមុខផ្សារប៉េស្សេ ។
សពជនរងគ្រោះ មានឈ្មោះ ម៉ែន លីដា ភេទប្រុស អាយុ៣១ឆ្នាំ មុខរបរ មន្ត្រីកងរាជអាវុធហត្ថក្រុងភ្នំពេញ ស្នាក់នៅស្នាក់នៅភូមិត្រពាំងក្រសាំង សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត ភូមិតាជៃ ឃុំជ្រៃលាស់ ស្រុកពញាឮ ខេត្តកណ្ដាល ជិះម៉ូតូម៉ាក យ៉ាម៉ាហា QBIX ពណ៌ទឹកប្រាក់ ពាក់ផ្លាកលេខភ្នំពេញ 1GZ 0719 ៕
