រុករក ការជីកគាស់អដ្ឋិធាតុ កងទ័ពស្ម័គ្រចិត្ត និងជំនាញការវៀតណាម ដែលពលីជីវិតក្នុងសម័យសង្គ្រាម នៅកម្ពុជា
ខេត្តព្រះសីហនុ៖ រដ្ឋបាលខេត្តព្រះសីហនុ បានរៀបចំពិធីចុះហត្ថលេខាលើកិច្ចសហប្រតិបត្តិការ ស្តីពីការរុករក ការជីកគាស់អិដ្ឋធាតុកងទ័ពស្ម័គ្រចិត្ត និងជំនាញការវៀតណាម នៅកម្ពុជា រដូវប្រាំង (២០១៩-២០២០) រវាងរដ្ឋបាលខេត្តព្រះសីហនុ និងខេត្តគៀងយ៉ាង នៃសាធារណរដ្ឋសង្គមនិយមវៀតណាម នៅសាលាខេត្តព្រះសីហនុ នាព្រឹកថ្ងៃទី១៦ ខែតុលា ឆ្នាំ២០១៩ ។
លោក ជូ ថាញ់បិញ អនុប្រធានគណៈកម្មាធិការប្រជាជនខេត្តគៀងយ៉ាង ជាប្រធានគណៈកម្មការជំនាញខេត្តគៀងយ៉ាង បានថ្លែងអំណរគុណរដ្ឋបាលខេត្តព្រះសីហនុ ដែលបានរៀបចំកិច្ចប្រជុំ ចុះហត្ថលេខា លើកិច្ចសហប្រតិបត្តិការរុករក ការជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលពលីជីវិតក្នុងសម័យសង្គ្រាម នៅកម្ពុជាសម្រាប់រដូវប្រាំង(២០១៩- ២០២០) ។ គណៈកម្មការរបស់ខេត្តគៀងយ៉ាង បានសហការការជាមួយខេត្តចំនួន៤ នៃព្រះរាជាណាចក្រកម្ពុជា រួមមាន ខេត្តព្រះសីហនុ កោះកុង កំពត និងខេត្តកែប ក្នុងការរុករក ការជីកគាស់ និងធ្វើមាតុភូមិនិវត្តន៍នូវអដ្ឋិធាតុកងទ័ពស្ម័គ្រចិត្ត និងជំនាញការវៀតណាម បានចំនួនជាង ២.០០០អដ្ឋិធាតុ ។ លទ្ធផលនេះ មានការចូលរួមសហការគាំទ្រពីអាជ្ញាធរខេត្ត កងកម្លាំងប្រដាប់អាវុធ និងប្រជាពលរដ្ឋ ក្នុងការរុករក ជីកគាស់រកអដ្ឋិធាតុកងទ័ពស្ម័គ្រចិត្ត និងជំនាញការវៀតណាម ។ ជួសមុខឱ្យគណៈកម្មការជំនាញខេត្តគៀងយ៉ាង សូមកោតសរសើរអាជ្ញាធរខេត្តព្រះសីហនុ កងកម្លាំងប្រដាប់អាវុធ និងប្រជាពលរដ្ឋ ដែលបង្កលក្ខណៈងាយស្រួល នឹងផ្តល់ព័ត៌មានក្នុងការរុករក ជីកគាស់ ធ្វើមាតុ ភូមិនិវត្តន៍អដ្ឋិធាតុកងទ័ព និងជំនាញការវៀតណាមនាពេលកន្លងមក ។
លោកជូ ថាញ់បិញ បានសំណូមពរ ដល់អាជ្ញាធរខេត្ត កងកម្លាំងប្រដាប់អាវុធ បន្តចូលរួមសហការរុករក ផ្តល់ព័ត៌មានដល់ក្រុមការងារ ដើម្បីបង្កលក្ខណៈងាយស្រួល ក្នុងការរុករក ជីកគាស់ និងការធ្វើវិវត្តន៍អដ្ឋិធាតុកងទ័ព និងជំនាញការវៀតណាម ។
លោក ជាវ វិជ្ជាក់ អភិបាលរងខេត្តព្រះសីហនុ មានប្រសាសន៍ស្វាគមន៍ ក្នុងនាមគណៈកម្មការជំនាញខេត្តព្រះសីហនុ និងគណៈកម្មការជំនាញខេត្តគៀងយ៉ាង បានកំណត់យកពេលវេលា ដើម្បីចុះហត្ថលេខា កិច្ចសហប្រតិបត្តិការ ស្ដីពីការរុករក ការជីកគាស់ និងការធ្វើមាតុភូមិភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា សម្រាប់រដូវប្រាំងឆ្នាំ២០១៩ -២០២០ ។ ដោយអនុវត្តន៍នូវកិច្ចព្រមព្រៀង និងកំណត់ហេតុរវាងរាជរដ្ឋាភិបាល នៃប្រទេសទាំងពីរកម្ពុជា-វៀតណាម ក៏ដូចជាកិច្ចព្រមព្រៀងរវាងខេត្តទាំងពីរ ខេត្តព្រះសីហនុ និងខេត្តគៀងយ៉ាង ក្នុងការរុករក ជីកគាស់ និងការធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីក្នុងសម័យសង្គ្រាមនៅកម្ពុជា ។ ជារៀងរាល់ឆ្នាំ យើងតែងតែបានបង្កើន និងពង្រីកកិច្ចសហប្រតិបត្តិការកាន់តែជិតស្និទ្ធនិងរឹងមាំ ។ ក្នុងនាមគណៈកម្មការជំនាញខេត្តព្រះសីហនុ សូមគាំទ្រ និងកិច្ចសហប្រតិបត្តិការស្រាវជ្រាវ រុករក និងផ្ដល់ព័ត៌មានតាមរយៈអាជ្ញាធរមូលដ្ឋាន ក៏ដូចជាប្រជាពលរដ្ឋ ដើម្បីឱ្យគណៈកម្មការទាំងពីរ មានមូលដ្ឋានច្បាស់លាស់នឹងអនុវត្តន៍ការងាររុករក ជីកគាស់អដ្ឋិធាតុកងទ័ពស្មោះស្ម័គ្រ និងជំនាញការវៀតណាម នៅខេត្តព្រះសីហនុ ទទួលបានលទ្ធផលល្អ និងទទួលបានផ្លែផ្កានាពេលខាងមុខបន្តទៀត ៕
