ករណីអំពើក្បត់ជាតិរួមគំនិតជាមួយទណ្ឌិត សម រង្សី និងបក្ខពួក អតីតសមាជិកគណបក្សសង្គ្រោះជាតិ៥៧នាក់ ត្រូវសមត្ថកិច្ចចាប់ខ្លួន
ភ្នំពេញ៖ គិតត្រឹមល្ងាចថ្ងៃទី២៨ ខែតុលា ឆ្នាំ២០១៩ អតីតសមាជិកគណបក្សសង្គ្រោះជាតិចំនួន៥៧នាក់ ត្រូវសមត្ថកិច្ចកម្ពុជាចាប់ខ្លួនដាក់ពន្ធនាគារ យោងតាមដីកាបង្គាប់ឲ្យចាប់ខ្លួន ពាក់ព័ន្ធករណីអំពើក្បត់ជាតិ ក្បត់រាជបល្ល័ង្ក របស់ ទណ្ឌិត សម រង្សី និងបក្ខ។
រូបថតរបស់អតីតសមាជិកគណបក្សសង្គ្រោះជាតិចំនួន៥៧នាក់ ត្រូវបានអនុប្រធានអតីតគណបក្សសង្គ្រោះជាតិ អ្នកស្រី មួរ សុខហួរ បានចងក្រងតារាងសកម្មជន និងមន្ត្រីមូលដ្ឋានរបស់បក្សប្រឆាំង ដែលត្រូវបានចាប់ខ្លួន បង្ហោះតាមហ្វេសប៊ុកហើយមនុស្សដែលត្រូវសមត្ថកិច្ចចាប់ខ្លួន ចំនួន៥៧នាក់ក្នុងនោះមានស្ត្រីចំនួន៦នាក់។
ពាក់ព័ន្ធនឹងករណីនេះ គណនីហ្វេសប៊ុក Bora Hernandez បានចូលខំមិនលើហ្វេសប៊ុករបស់អ្នកស្រី មួរ សុខហួរ ថា “តែចូលពាក់ព័ន្ធនឹងនយោយបាយដោយខ្វះការពិចារណា គឺដឹងតែចាញ់បោកគេហើយ មីងហួរ បោកតាំងពីមីងនៅសក់ខ្មៅ រហូតដល់សក់ស ក្រុមអ្នកបោកពាក់អាវធំ ស៊ីម្ហូបឆ្ងាញ់ ដេកម៉ាស៊ីនត្រជាក់ ប្រើរបស់ល្អ មានលុយចាយមិនខ្វះ ណាស់តែពូមីងនៅស្រុកខ្មែរវេទនា ត្រូវគេចាប់ បែកកូនបែកចៅ អាហ្នឹងហើយ ការចូលរួមខ្វះការពិចារណា”។
ចំណែកគណនីហ្វេសប៊ុក ច័ន្ទ រាម បានខំមិនផងដែរថា ” សកម្មជនទាំងអស់ ដែលបានជាប់គុក ដោយសារនយោបាយ ចាយមនុស្សរបស់ សម រង្ស៊ី ត្រូវចាំទុក”។
អ្នកស្រី មួរ សុខហួរ មានសរសេរលើហ្វេសប៊ុកថា “បងប្អូនជាសកម្មជនសកម្មនារី នៃគណបក្សសង្គ្រោះជាតិដែលកំពុងរងគ្រោះដោយភាពអយុត្តិធម៌ ដែលកំពុងជាប់នៅពន្ធនាគារបងប្អូនហ្នឹងហើយជាវីរៈជនវីរៈនារីគណបក្សសង្គ្រោះជាតិនឹងមិនបំភ្លេចនូវវីរៈភាព មិនបំភ្លេចនូវការគ្រោះថ្នាក់និងជីវិតដ៏លំបាករបស់បងប្អូនទេ។ យើងនឹងធានាថាមិនទុករឿងហ្នឹងចោលទេ រឿងហ្នឹងយើងប្ដឹងនៅអន្តរជាតិហើយ យើងបញ្ជូនមេធាវីជួយបងប្អូនហើយ”។
សូមបញ្ជាក់ថា សម្តេចតេជោ នាយករដ្ឋមន្ត្រីហ៊ុន សែន បានថ្លែងក្នុងកិច្ចប្រជុំគណៈរដ្ឋមន្ត្រីកាលពីសប្ដាហ៍មុនថា ចលនារបស់ ទណ្ឌិត សម រង្ស៊ី ជាចលនាឧទ្ទាម ហើយសម្តេចតេជោ បានប្រគល់ភារកិច្ចឱ្យរដ្ឋមន្ត្រីក្រសួងការពារជាតិ សម្តេចពិជ័យសេនា ទៀ បាញ់ រៀបចំចាត់វិធានការចាប់ខ្លួនពួកក្បត់ជាតិទាំងនោះ។
គួររំលឹកផងដែរថា បងប្អូនដែលធ្លាប់ជាអតីតសមាជិកគណបក្សសង្រ្គោះជាតិ ជាច្រើននាក់ដែលភ្ញាក់ខ្លួនពីការចាញ់បោកក្រុមក្បត់ជាតិ បានបង្ហាញពីអំពើក្បត់ជាតិ ក្បត់រាជបល្ល័ង្ក របស់ សម រង្ស៊ី និងបក្ខពួក ព្រមទាំងអំពាវនាវ កុំឲ្យបងប្អូនប្រជាពលរដ្ឋចាញ់បោកនិងដើរតាមឧបាយកលនេះបន្តទៀត។
កាលពីថ្ងៃទី ២៧ ខែតុលា ឆ្នាំ២០១ ៩ ដោយមើលឃើញនូវសកម្មភាព ក្បត់ជាតិ ក្បត់រាជបល្ល័ង្ក របស់ទណ្ឌិត សម រង្ស៊ី មេចលនាឧទ្ទាមដែលកំពុងបំផុសបំផុល ញុះញង់ឲ្យពួកគាត់ព្រមទាំងប្រជាពលរដ្ឋងើបបះបោរក្នុងបំណងផ្តួលរំលំរាជរដ្ឋាភិបាលស្របច្បាប់ដែលកើតចេញពីការបោះឆ្នោត ដោយប្រជាពលរដ្ឋនោះមកនិងដោយយល់ឃើញថាការចូលរួមក្នុងសកម្មភាព (ក្បត់ជាតិ) ដែលផ្តើមឡើងដោយទណ្ឌិត សម រង្ស៊ី រូបនេះនិងបក្ខពួក ជាហេតុនាំបង្កឲ្យមានទោសកំហុសដល់ខ្លួនដែលជាប្រជាពលរដ្ឋរស់នៅក្នុងមូលដ្ឋាន ។ អតីតសកម្មជននិងជាសមាជិកគណបក្សសង្រ្គោះជាតិចំនួន ១០នាក់ នៅក្នុងខេត្តបាត់ដំបង បានចេញមុខ ប្រកាសថ្កោលទោសចំពោះអំពើក្បត់ជាតិរបស់ សម រង្ស៊ី និងបក្ខពួក ហើយមិនចូលរួមដាច់ខាងក្នុងសកម្មភាពនេះព្រមទាំងបានអំពាវនាវ ដល់ប្រជាពលរដ្ឋទាំងក្នុងនិងក្រៅប្រទេស ឈប់ជឿនិងឈប់ចាញ់បោក ការឃោសនាញុះញង់បំផុសបំផុល ឧបាយកលបោកបញ្ឆោតរបស់ ជនក្បត់ជាតិ សម រង្ស៊ី នេះទៀតទៅ ព្រោះការចូលរួមក្នុងសកម្មភាពនេះ គឺជាអំពើល្មើសច្បាប់ នៃព្រះរាជាណាចក្រកម្ពុជាហើយពេលមានទោសដល់ខ្លួន សម រង្ស៊ី មិនមែនជាអ្នកទទួលខុសត្រូវនោះទេ គឺបងប្អូនប្រជាពលរដ្ឋខ្លួនឯងជាអ្នកទទួលទោស៕
