មេនគរបាលរាជធានីថា ក្រុមស្លៀកស៊ីវិល ចាប់វាយខ្នោះយុវជនម្នាក់ ជំរិតទារប្រាក់ មិនជាសមត្ថកិច្ចនោះទេ
ភ្នំពេញ៖ ពួកអាចោរពាក់មុខច្បាប់បែបនេះហើយទើបធ្វើឲ្យសមត្ថកិច្ចមួយចំនួនស្អុយឈ្មោះដោយសារបញ្ហានេះ ប្រយត្ន័បងប្អូន។ បុរសម្នាក់អះអាងថា ត្រូវបានគេចាប់ធ្វើស៊ីនៅផ្លូវបឹងកក់ ដោយក្រុមស្លៀកស៊ីវិលទាំងនោះ ចាប់វាយខ្នោះទាំងអត់ដឹងរឿងអ្វីសោះ អស់ប្រាក់រហូតដល់ទៅ២៥០០ដុល្លារ។
ពាក់ព័ន្ធនឹងករណីខាងលើនេះ ក្រុមព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ នៅថ្ងៃទី៤ខែវិច្ឆិកានេះ បានចេញសេចក្តីបកស្រាយបំភ្លឺថា មានករណីជនស៊ីវិលមួយក្រុមដែលតែងតែ ចុះចាប់គ្រឿងញៀននៅម្តុំបឹងកក់នោះមិនមែនជាសមត្ថកិច្ចស្នងការដ្ឋាននគរបាលរាជធានីភ្នំពេញនោះទេ ។ លោកស ថេត អគ្គស្នងការរង និងជាស្នងការនគរបាលរាជធានីភ្នំពេញ បានថ្លែងថា ប៉ុន្តែទោះជាយ៉ាងណា ក្នុងនាមជាសមត្ថកិច្ចទទួលខុសត្រូវ ក្នុងដែនដីរាជធានីភ្នំពេញ នឹងធ្វើការស្រាវជ្រាវ បង្ការ ទប់ស្កាត់មិនឲ្យក្រុមជនស្លៀកស៊ីវិលទាំងនោះបង្កបញ្ហាទាំងនេះទៀតឡើយ។ ម្យ៉ាងវិញទៀតកម្លាំងនៃស្នងការនគរបាលរាជធានីភ្នំពេញ តែងតែគោរពបទបញ្ជាយ៉ាងម៉ឺងម៉ាត់របស់ថ្នាក់ដឹកនាំ មិនដែលទៅធ្វើសកម្មភាពអ្វីមួយដែលខុសពីការណែនាំ ឬក៏ភារកិច្ចនោះទេ ។
ស្នងការដ្ឋាននគរបាលរាជធានីភ្នំពេញ នឹងធ្វើការសហការជាមួយអាជ្ញាធរពាក់ព័ន្ធទាំងអស់ ដើម្បីចាត់វិធានការណ៍មិនឲ្យមានករណីនេះកើតឡើងទៀតឡើយ ៕
