ផ្អើលហ្វូងកុករាប់លានក្បាលនៅពោធិ៍សាត់មិនធ្លាប់មាន អាជ្ញាធរបារម្ភខ្លាចតែគេបំផ្លាញ និងដើរ បរបាញ់
ពោធិ៏សាត់៖ ហ្វូងសត្វកុករាប់លានក្បាល នៅអាងព្រះពន្លៃ ស្ថិតក្នុងឃុំផ្ទះរុង ស្រុកតាលោសែនជ័យ ខេត្តពោធិ៍សាត់ បានលេចវត្តមានបង្កជាការភ្ញាក់ផ្អើល្អើលជាខ្លាំងដល់អ្នកស្រុកនៅក្នុងតំបន់នោះ ហើយអាជ្ញាធរបារម្ភខ្លាច មានអ្នកដើរបរបាញ់ ។
អាជ្ញាធរ ស្រុកតាលោសែនជ័យ បានបញ្ជាក់ឲ្យដឹងនៅថ្ងៃទី០៧ វិច្ឆិកា ឆ្នាំ២០១៩នេះថា៖ ហ្វូងសត្វកុកទាំងនេះ បានមករស់នៅក្នុងបឹងធម្មជាតិព្រះពន្លាជ័យ (ឬបឹងព្រះពន្លៃ) កាល ពីដើមខែតុលា ឆ្នាំ២០១៩មកម្ល៉េះ ដោយកាលនោះ ពុំសូវមានច្រើនប៉ុន្មានទេ តែមកដល់ពេលនេះឃើញមានការកើនឡើងយ៉ាងគំហុកដល់ទៅរាប់លានក្បាល។ ពលរដ្ឋ អាចមកគយគន់ហ្វូងសត្វទាំងនេះ នៅពេលព្រលឹមអុរ ឬពេលជិតអស្ដង្គត
ដែលមានទីតាំងតាមផ្លូវជាតិលេខ៥៥ (ក្រាលកៅស៊ូ) ពីផ្លូវជាតិលេខ៥ ស្ពានស្វាយអាត់ កាត់បូជនីយដ្ឋានលោកឧកញ៉ា ឃ្លាំង មឿង ទៅដល់ឃុំសំរោង បត់ស្ដាំឆ្ពោះទៅឃុំផ្ទះរុង ស្រុកតាលោសែនជ័យ នឹងឃើញហើយ ។
អាជ្ញាធរមូលដ្ឋាន បានក៏អំពាវនាវដល់សមត្ថកិច្ចគ្រប់ជាន់ថ្នាក់រួមទាំងពលរដ្ឋ ឲ្យរួមគ្នាថែរក្សាសត្វកុករាប់លានក្បាលនេះ កុំឲ្យមានការបរបាញ់ឬបំផ្លាញដោយប្រការណាមួយ ដោយទុកជាសម្បត្តិរដ្ឋនិងសម្រាប់អ្នកដំណើរគយគន់៕ ដោយ៖ សំរិត
