ជនសង្ស័យម្នាក់ យកកាំបិតចុងស្រួចភ្ជង់ ក ជនរងគ្រោះ ឆក់យកកាបូប និងប្លន់យកម៉ូតូកង់បី PassApp ១គ្រឿងទៅបាត់ ដោយសុវត្ថិភាព
ស្រុកខ្សាច់កណ្តាល៖ ស្នងការដ្ឋាននគរបាលខេត្តកណ្តាល បានរាយការណ៍ព័ត៌មានពីករណីលួចមានស្ថានទម្ងន់ទោស ដោយមានជនសង្ស័យម្នាក់មាឌធំបានយកកាំបិតចុងស្រួចភ្ជង់ ក ជនរងគ្រោះ
ឆក់យកកាបូប និងម៉ូតូកង់បី PassApp ០១ គ្រឿងទៅបាត់ដោយសុវត្ថិភាព។ កើតហេតុកើតថ្ងៃ អង្គារទី១៩ វិច្ឆិកា ២០១៩ម៉ោង១និង១៦នាទី ចំណុចផ្លូវជាតិលេខ៨ ភូមិព្រៃចាស់ ឃុំ វិហារសួគ៌ ស្រុកខ្សាច់កណ្តាល ខេត្តកណ្តាល ។
ជនរងគ្រោះ០២នាក់(ប្តីប្រពន្ធ) ១.ឈ្មោះ អាន សុភ័ក្រ ភេទ ប្រុសអាយុ២៣ឆ្នាំជនជាតិ ខ្មែរ មុខរបរ រត់(Pass App) មានទីលំភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ(ប្តី) ។ ២.ឈ្មោះ ជ សុវណ្ណឌី ភេទស្រីអាយុ២២ឆ្នាំជនជាតិខ្មែរ មុខរបរ មេផ្ទះ នៅភូមិ ឃុំ ជាមួយឈ្មោះ អាន សុភ័ក្រ (ប្រពន្ធ)។
ជនសង្ស័យ ០១ នាក់ មិនស្គាល់អត្តសញ្ញាណមាឌ ធំ កំពស់ប្រហែល១,៨០ ម៉ែត្រ សម្បុរ ស ពាក់អាវយឺតខ្មៅដៃខ្លី ពាក់អាវធំពណ៌ខ្មៅពីក្រៅ មានមួកគ្របពីលើ។
សំភារៈបាត់បង់៖ ម៉ូតូកង់បី PassApp ០១ គ្រឿង ពណ៌ ស គ្មានផ្លាកលេខ កាបូបលុយ០១ ក្នុងកាបូបលុយមាន ទូរស័ព្ទចំនួន២គ្រឿង និងប្រាក់រៀល៥ម៉ឺនរៀល។
នគរបាលប្រាប់ពីសភាពរឿងហេតុនេះថា ជនរងគ្រោះ អាន សុភ័ក្រ ប្រកបមុខរបររត់PassApp ហើយកន្លងមកជនរងគ្រោះធ្លាប់ដឹក ជនសង្ស័យជាច្រើនលើកមកហើយ ។ នៅថ្ងៃទី១៨ វិច្ឆិកា ២០១៩ម៉ោង២៣និង៣០នាទីជនរងគ្រោះ បានដឹកជនសង្ស័យ១នាក់មិនស្គាល់ឈ្មោះ និងម្នាក់ទៀតមកជាមួយជនសង្ស័យមិនស្គាល់ឈ្មោះដែរ រួមទាំងប្រពន្ធរបស់ខ្លួនដឹកចេញពីផ្លូវវ៉េងស្រេង រាជធានីភ្នំពេញ ថាទៅវិមានឈ្នះៗ ពេលទៅដល់វិមានឈ្នះៗ ជនសង្ស័យឲ្យឌុបបន្ត ទៅស្ពានព្រែកតាមាក់ ពេលមកដល់ស្ពានព្រែកតាមាក់ ប្រាប់ឲ្យឌុបបន្តទៅមុខទៀត ពេលទៅដល់កន្លែងកើតហេតុជនសង្ស័យបានឲ្យជនរងគ្រោះឈប់ PassApp ជនសង្ស័យម្នាក់មាឌធំបានយកកាំបិតចុងស្រួចភ្ជង់ ក ជនរងគ្រោះឈ្មោះ ជ វណ្ណឌី ជាប្រពន្ធ ហើយវាយត្រូវចំមុខ ជាច្រើនដៃ រួចឆក់យកការបូបលុយ ប្តីឃើញដូចនោះក៏ប្រគល់PassAppឲ្យទៅជនសង្ស័យ រួចជនសង្ស័យជិះទៅទិសខាងកើតសំដៅទៅស្រុកពារាំងចំណែកជនម្នាក់ទៀតដែលមកជាមួយជនសង្ស័យ មិនបានទៅជាមួយជនសង្ស័យនោះទេ។
ជនរងគ្រោះពីរនាក់ប្តីប្រពន្ធ និងម្នាក់មកជាមួយជនសង្ស័យ បានហៅ ឡានដឹកស្រូវជិះតាមរកជនសង្ស័យ តែរកមិន ឃើញ ក៏ជិះឡានដឹកឥដ្ឋត្រឡប់មកព្រែកតាមាក់វិញ ហើយ
ចូលដាក់ពាក្យបណ្តឹងនៅមូលដ្ឋានកងរាជអាវុធហត្ថ ស្រុកខ្សាច់កណ្តាល(PM) ។
ករណីនេះ កងរាជអាវុធហត្ថស្រុកកំពុងបន្តចំណាត់ការ តាមពាក្យបណ្ដឹងរបស់ជនរងគ្រោះ ឯផ្នែកជំនាញនគរបាលយុត្តិធម៌ស្រុក បានបន្តចុះសហការស្រាវជ្រាវជាមួយកងរាជអាវុធហត្ថស្រុកផងដែរ ៕ដោយ៖កូឡាប