លោក Gusmao ៖ កម្ពុជាសឹងមិនគួរឲ្យជឿ , ពេលនេះបានសង្កេតឃើញថា មានការរីកចម្រើនដ៏អស្ចារ្យ
ភ្នំពេញ៖ សម្តេចតេជោ ហ៊ុន សែន បានលើកឡើងថា កន្លងមកកម្ពុជាបានខិតខំប្រឹងប្រែងជួយដល់ប្រទេសទីម័រខាងកើត ដើម្បីក្លាយជាសមាជិកសមាគមអាស៊ាន ហើយនៅឆ្នាំ២០២០ខាងមុខនេះ ប្រទេសវៀតណាម ធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ប្រទេសទីម័រខាងកើត អាចនឹងក្លាយជាសមាជិកថ្មីមួយទៀតរបស់អាស៊ាន ហើយ កម្ពុជាអាចជួយទីម័រខាងកើតក្នុងការកសាងសមត្ថភាព ដើម្បីឲ្យទីម័រខាងកើត ក្លាយជាសមាជិកនៃអង្គការពាណិជ្ជកម្មពិភពលោកនាថ្ងៃអនាគតខាងមុខនេះ។
នៅថ្ងៃទី ២០ វិច្ឆិកានេះ សម្តេចអគ្គមហាសេនបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញទទួលជួបពិភាក្សាការងារបន្តជាមួយ លោកខេរ៉ាឡា ហ្សាណាណា ហ្គូសម៉ៅ (Kay Rala Xanana Gusmao) អតីតប្រធានាធិបតីទីម័រខាងកើត។
ក្នុងជំនួបនេះលោក Gusmao បានកោតសរសើរពីការរីកចម្រើនរបស់កម្ពុជាសឹងមិនគួរឲ្យជឿ ព្រោះលោកធ្លាប់បានមកកាន់កម្ពុជាជាច្រើនលើកហើយ ហើយពេលនេះបានសង្កេតឃើញថា កម្ពុជាមានការរីកចម្រើនដ៏អស្ចារ្យ។ លោក បានបន្ថែមថា សន្តិភាពនៅកម្ពុជាគឺជាសន្តិភាពពិត ដែលជាគំរូដ៏ល្អ សម្រាប់ប្រទេសដទៃទៀត នៅទូទាំងពិភពលោក។ លោក Kay Rala Xanana Gusmao បានបញ្ជាក់ថា លោកជាបេសកជនពិសេសមួយរូប នៃក្រុម G7+ ហើយនៅដើមឆ្នាំ២០២០ខាងមុខនេះ នឹងមានកិច្ចប្រជុំជាន់ខ្ពស់ នៅប្រទេសរូវ៉ាន់ដា ទ្វីបអាហ្វ្រិក។ លោកបន្តថា ទិដ្ឋភាពនៅអាហ្វ្រិក និងនៅអាស៊ីប៉ាស៊ីហ្វិក មានការខុសគ្នាច្រើន។ លោកបន្តថា ប្រទេសតំបន់អាហ្វ្រិក ពិតជាត្រូវការជំនួយក្នុងការបង្រួបង្រួមប្រទេសក្នុងតំបន់ ពីប្រទេសនានាជាច្រើន ជាពិសេសពីប្រទេសកម្ពុជាតែម្តងដែលបានឆ្លងកាត់ របបគ្រប់គ្រងប្រទេសជាច្រើនជំនាន់ រហូតមានសន្តិភាពនិងការរីកចម្រើនមកដល់សព្វថ្ងៃនេះ។
ជាការឆ្លើយតប សម្តេចតេជោ ហ៊ុន សែន បានលើកឡើងថា កន្លងមកកម្ពុជាបានខិតខំប្រឹងប្រែងជួយដល់ប្រទេសទីម័រខាងកើត ដើម្បីក្លាយជាសមាជិកសមាគមអាស៊ាន ហើយសម្តេចសង្ឃឹមថា នៅឆ្នាំ២០២០ខាងមុខនេះ ក្នុងឱកាសប្រទេសវៀតណាម ធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ប្រទេសទីម័រខាងកើត អាចនឹងក្លាយជាសមាជិកថ្មីមួយទៀតរបស់អាស៊ាន។ ទន្ទឹមនឹងនេះដែរ សម្តេចតេជោ ហ៊ុន សែន បានបន្តថា កម្ពុជាអាចជួយទីម័រខាងកើតក្នុងការកសាងសមត្ថភាព ដើម្បីឲ្យទីម័រខាងកើត ក្លាយជាសមាជិកនៃអង្គការពាណិជ្ជកម្មពិភពលោកនាថ្ងៃអនាគតខាងមុខនេះ។
ពាក់ព័ន្ធនឹងកិច្ចប្រជុំ ឆ្នាំ២០២០ នៅរូវ៉ាន់ដា នោះ សម្តេចតេជោ ហ៊ុន សែន បានមានប្រសាសន៍បញ្ជាក់ថា នៅពេលមានការអញ្ជើញជាផ្លូវការ សម្តេចនឹងពិចារណាចូលរួមចែករំលែក ពីបទពិសោធន៍របស់កម្ពុជា ហើយកម្ពុជាក៏អាចរៀនសូត្រ ពីបណ្តាប្រទេសផ្សេងៗទៀតផងដែរ។ សម្តេចតេជោនាយករដ្ឋមន្ត្រី អាចនឹងភ្ជាប់ទស្សនកិច្ចផ្លូវការនៅប្រទេសរ៉ូវ៉ាន់ដា ក្នុងពេលអញ្ជើញទៅចូលរួមកិច្ចប្រជុំកំពូលខាងលើផងដែរ៕
