ទំនាស់ពាក្យសំដីផ្តើមចេញពីឆ្កែអ្នកក្បែរ ខាងខាំកើតចេញជាគំនុំមន្ដ្រីនគរបាលប៉ុស្ដិ៍បឹងសាឡាងប្រើកាំភ្លើងAKបាញ់រៈអស់៤គ្រាប់រងរបួសម្នាក់

ភ្នំពេញ៖មន្ដ្រីនគរបាលប៉ុស្ដិ៍បឹងសាឡាងខណ្ឌទួលគោករាជធានីភ្នំពេញម្នាក់ត្រូវសមត្ថកិច្ចប៉ូលីសដូចគ្នាបានវាយខ្នោះបញ្ជូនទៅកាន់ស្នងការដ្ឋាននគរបាលរាជធានីភ្នំពេញភ្លាមៗក្រោយពីមានទំនាស់ពាក្យសំដីជាច្រើនថ្ងៃកន្លងមកផ្តើមចេញពីឆ្កែអ្នកក្បែរខាងខាំដោះស្រាយមិនចប់រហូតក្លាយជាជាគំនុំយកកាំភ្លើងAKបាញ់រៈអស់៤គ្រាប់បណ្តាលអោយរងរបួសបុរសម្នាក់ជាគូទំនាស់តែម្តង។

   ហេតុការណ៍នេះបានបង្កឲ្យមានការភ្ញាក់ផ្អើលនៅវេលាម៉ោងប្រមាណ១០ព្រឹកថ្ងៃទី០២ខែធ្នូឆ្នាំ២០១៩នេះស្ថិតនៅជួលក្រោយសាលាសាមគ្គីតាមបណ្តោយផ្លូវ៦៦២ក្រុម៦ភូមិ៣ក្នុងសង្កាត់បឹងសាឡាងខណ្ឌទួលគោករាជធានីភ្នំពេញ។

    ប្រភពពីកន្លែងកើតហេតុបានឲ្យដឹងថានៅមុន

ពេលកើតហេតុគឺមន្ដ្រីនគរបាលប៉ុស្ដិ៍បឹងសាឡាងម្នាក់នេះបានមកប៉ុស្តិ៍ហើយបានយកកាំភ្លើងAK47ស្ពាយនិងបានជិះម៉ូតូចេញពីប៉ុស្ដិ៍ទៅបាត់ដែលធ្វើអោយមន្ត្រីប៉ូលីសដូចគ្នាគិតថាជនសង្ស័យចេញល្បាត។ដឹងអីពេលជិះម៉ូតូចេញមិនបានប៉ុន្មានផងក៏កើតចេញជារឿងបាញ់រៈជាច្រើនគ្រាប់និងបណ្តាលអោយជនរងគ្រោះម្នាក់រងរបួសខ្នងតែម្តង។

    ជុំវិញជម្លោះរវាងមន្ដ្រីនគរបាលប៉ុស្ដិ៍បឹងសាឡាងខណ្ឌទួលគោកជាមួយអ្នកជិតខាងរហូតផ្ទុះអាវុធចំនួន៤គ្រាប់ត្រូវបានលោកសុខហេងអធិការនគរបាលខណ្ឌទួលគោកប្រាប់អ្នកព័ត៌មានអោយដឹងថាមូលហេតុដែលនាំឲ្យមានជម្លោះនេះគឺផ្ដើមចេញពីសត្វឆ្កែចិញ្ចឹមរបស់ជនរងគ្រោះធ្លាប់ខាំមន្ដ្រីនគរបាលខាងលើហើយក៏ធ្លាប់ទាស់ពាក្យសម្ដីគ្នាកាលពីពេលកន្លងទៅផងដែរ។

   ជនបង្កអោយមានអំពើបាញ់ប្រហារជាច្រើនគ្រាប់និងបណ្តាលអោយមានមនុស្សរងរបួសនេះត្រូវបានគេស្គាល់ឈ្មោះសុងវិសិដ្ឋភេទប្រុសជាមន្ដ្រីនគរបាលប៉ុស្ដិ៍បឹងសាឡាងខណ្ឌទួលគោកហើយក្រោយពេលកើតហេតុមន្ដ្រីនគរបាលខាងលើក៏ត្រូវបានប៉ូលីសចាប់វាយខ្នោះភ្លាមៗនៅកន្លែងកើតហេតុនិងបានបន្តបញ្ជូនទៅស្នងការដ្ឋាននគរបាលរាជធានីភ្នំពេញភ្លាមដែរដើម្បីធ្វើការសួរនាំនិងចាត់តាមនីតិវិធី។ចំណែកជនរងគ្រោះដែលបានរងរបួស១គ្រាប់ចំខ្នងត្រូវបានគេជួយសង្គ្រោះដោយបញ្ជូនទៅកាន់មន្ទីរពេទ្យរុស្សុីភ្លាមដែរ៕