ជនល្មើសម្នាក់ យកថ្នាំញៀនជាង៤គីឡូ លាក់ដាក់ទុកចូលធុងបាស បម្រុងលួចនាំឆ្លងដែនទៅប្រទេសវៀតណាម ត្រូវសមត្ថកិច្ចក្របួចបាន

ខេត្តស្វាយរៀងៈ ថ្នាំញៀនប្រភេទមេតំហ្វេតាមីនអាយចំនួន​ ៤ កញ្ចប់ធំ លាក់ធុងបាស់ដោយត្រូវបាន សមត្ថកិច្ចធ្វើការដកហូតបាន ខណៈពេលដែលជនសង្ស័យ បម្រុងលួចនាំឆ្លងដែនទៅប្រទេសវៀតណាម។ ករណី បង្ក្រាប ការដឹកជញ្ជូន រក្សាទុក និងជួញដូរដោយខុសច្បាប់ នូវសារធាតុញៀននេះ ក្រោយពេលដែលសមត្ថកិច្ចកម្ពុជា ទទួលបានព័ត៌មានពីខាងសមត្ថកិច្ច នៃប្រទេសវៀតណាម កាលពីថ្ងៃទី ១៦ខែធ្នូឆ្នាំ ២០១៩នេះ ។

ប្រភពដដែលបានឱ្យដឹងថាៈ ក្រោយពីលោកវរសេនីយ៍ឯក កែវ គង់ អធិការនគរបាលក្រុងបាវិត បានទទួលព័ត៌មាន ពីសមត្ថកិច្ចគយវៀតណាម តាមរយៈទូរស័ព្ទរាយការណ៍មកថា សមត្ថកិច្ចវៀតណាម បានឃាត់ខ្លួនជនជាតិកម្ពុជាចំនួន ១ នាក់ ពាក់ព័ន្ធនឹងករណីដឹកជញ្ជូនគ្រឿងញៀនឆ្លងដែន និងដកហូតថ្នាំញៀនចំនួន ១គីឡូក្រាម ពី ឈ្មោះ អ៊ុំ ណាំ ភេទប្រុសអាយុ ១៧ ឆ្នាំ មុខរបររត់ការលិខិតឆ្លងដែនកម្ពុជាវៀតណាម មានទីលំនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ដោយមានការសហការ ពីសមត្ថកិច្ចវៀតណាម កម្លាំងអធិការដ្ឋាននគរបាលក្រុងបាវិត បាននាំខ្លួនជនសង្ស័យខាងលើ មកកម្ពុជា ធ្វើការសាកសួរ ដើម្បីធ្វើការស្រាវជ្រាវ តាមចម្លើយរបស់ជនសង្ស័យ បានឆ្លើយថា មានអីវ៉ាន់ចំនួនពីរកេសទៀត ផ្ញើទុកនៅហាងបាយយីហោ (តាលឿង) មានទីតាំងស្ថិតនៅភូមិវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។

ប្រភពខាងលើបានបន្តទៀតថាៈ នៅពេលបានតម្រុយដូច្នេះ សមត្ថកិច្ចបានចុះទៅត្រួតពិនិត្យអីវ៉ាន់នោះ ដោយឃើញមានធុងបាស់ចំនួន ២ ធុង ដោយមានការសង្ស័យ សមត្ថកិច្ចយើងបានគាស់ធុងបាស់នោះ ឃើញមានម្សៅក្រាមពណ៌សថ្លា សង្ស័យថ្នាំញៀន ប្រភេទមេតំហ្វេតាមីនអាយចំនួន ២កញ្ចប់ធំ ក្នុងមួយធុងបាស់ សមត្ថកិច្ចយើងបានចាំយកវត្ថុតាមចំនួន ៤ កញ្ចប់ធំទម្ងន់៤១៤០,០៨ក្រាម។

បច្ចុប្បន្នជនសង្ស័យ និងវត្ថុតាង បានឃាត់ខ្លួន និងយកមករក្សាទុក នៅអធិការដ្ឋាននគរបាលក្រុងបាវិត ដើម្បីស្រាវជ្រាវបន្ត៕