ករណីគ្រឿងញៀន អាវុធហត្ថចាប់ ជនសង្ស័យ១១នាក់
បន្ទាយមានជ័យ៖ បញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានឲ្យដឹងថា ដោយទទួលបានសេចក្ដីរាយការណ៍ពីប្រជាពលរដ្ឋថា មានអ្នកប្រើប្រាស់គ្រឿងញៀននៅម្ដុំក្រោយការ៉ាអូខេនាគទិព្វ ទើបកម្លាំងកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការ អាវុធហត្ថក្រុង បានចុះប្រតិបត្តការបង្រ្កាបបានករណីរក្សាទុក និងប្រើប្រាស់នូវសារធាតុញៀនខុសច្បាប់ចំនួន១១នាក់ភ្លាមៗតែម្ដង កាលពីវេលាម៉ោង១២និង០០នាទី ថ្ងៃទី ០៨ ខែមករា ឆ្នាំ២០២០ ហើយបានបញ្ជូនមកបញ្ជាការមូលដ្ឋានកងរាជអាវុធហត្ថក្រុងដើម្បីធ្វើការសាកសួរ។ បន្ទាប់មក៏បញ្ជូនមកទីបញ្ជាការដ្ឋានកងរាជអាវុធហត្ថខេត្តចាត់ការបន្ត។
លោកវរសេនីយ៍ឯក សប៊ុនសឿង មេបញ្ជាការរងកងរាជអាវុធហត្ថខេត្ត ទទួលការងារគ្រឿងញៀនបានបញ្ជាក់ថា ជនសង្ស័យទាំង១១នាក់មានឈ្មោះ៖ ១/.យ៉េន មិថុនា,២/.រឹត ស្រីវី, ៣/.សាញ់ បូរី, ៤/.កន វ៉ា ,៥/.លឹម បូឡែន ,៦/.ណៃ ម៉ឡៃ ,៧.ធី ទិត្យ ,៨/.សេត វ៉ាន់នី និងដកហូតវត្ថុតាងគ្រឿងញៀនបានចំនួន០៥កញ្ចប់ ស្មើនឹង១,៣១ក្រាម ក្នុងនោះមេតំហ្វេតាមីនទឹកកក០៤កូនថង់តូចស្មើ ១,១៦ក្រាម , មេតំហ្វេតាមីនគ្រាប់ (០១គ្រាប់) ស្មើ ០,១៥ក្រាម។ លោកវរសេនីយ៍ឯក ស ប៊ុនសឿង បានបញ្ជាក់ទៀតថា ក្នុង១១នាក់នោះ មានម្នាក់ឈ្មោះ រឹត ស្រីវី ភេទស្រី អាយុ២៤ឆ្នាំ ជាអ្នករក្សាទុកគ្រឿងញៀនដោយខុសច្បាប់ ចំណែក១០នាក់ទៀតជាអ្នកប្រើប្រាស់។
ក្រោយពីសាកសួរចម្លើយរួច ព្រមទាំងបានរាយការណ៍ជូនលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ជនសង្ស័យទាំង១១នាក់ត្រូវបានកម្លាំងការិយាល័យបទល្មើសគ្រឿងញៀន កសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធី៕
