បើកការដ្ឋានស្ថាបនាផ្លូវបេតុងមួយខ្សែ ប្រវែងជិត២គីឡូម៉ែត្រ នៅឃុំព្រែកតានុង ស្រុកកោះសូទិន អភិបាលខេត្តសូមអោយប្រជាពលរដ្ឋយោគយល់ ខណៈការដ្ឋានកំពុងដំណើរការ
ខេត្តកំពង់ចាម ៖ អភិបាលខេត្តកំពង់ចាម លោក គួច ចំរើន កាលពីរសៀលថ្ងៃចន្ទ ១១កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ ខែកក្កដា ឆ្នាំ២០១៨ បានអញ្ជើញបើកការដ្ឋានធ្វើផ្លូវបេតុងមួយខ្សែ មានប្រវែង១៦៦០ម៉ែត្រ និងទទឹង៧ម៉ែត្រ ស្ថិតក្នុងភូមិទី៩ ឃុំព្រែកតានុង ស្រុកកោះសូទិន ខេត្តកំពង់ចាម ដោយក្នុងឱកាសនោះលោកអភិបាលខេត្តសូមអោយប្រជាពលរដ្ឋមេត្តាយោគយល់ ខណៈការដ្ឋានកំពុងដំណើរការ ដែលធ្វើអោយរំខានក្នុងការធ្វើដឱណើររបស់បងប្អូន។
លោក គួច ចំរើន បានលើកឡើងថា ផ្លូវបេតុងមួយខ្សែនេះ បានការឧបម្ភត្តថវិការបស់ក្រសួងសាធារណការ និងដឹកជញ្ជូន កសាងស្ថាបនាធ្វើដោយមន្ទីរសាធារណការ និងដឹកជញ្ជូនខេត្តកំពង់ចាម ផ្ដល់ជូនបងប្អូនប្រជាជនដែលរស់នៅក្នុងមូលដ្ឋានឃុំព្រែកតានង់ ស្រុកកោះសូទិន ។
លោកបន្តថា ក្រោមការដឹកនាំរបស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន ជានាយករដ្ឋមន្ត្រី សម្តេចបានខិតខំប្រឹងប្រែងកសាងនូវរាល់ការលំបាករបស់ប្រជាពលរដ្ឋ តាមមូលដ្ឋានឲ្យកាន់តែរីកចម្រើន និងការអភិវឌ្ឍទៅមុខទៀត។ ផ្លូវថ្នល់ គឺជាសរសៃឈាមនៃសេដ្ឋកិច្ចជាតិ និងសេដ្ឋកិច្ចគ្រួសារ មានផ្លូវ មានក្តីសង្ឃឹម ហើយមានសារៈសំខាន់ណាស់សម្រាប់ បងប្អូនប្រជាពលរដ្ឋភូមិព្រែកតានុង បង្កលក្ខណៈងាយស្រួល ក្នុងការទំនាក់ទំនងគ្នា ងាយស្រួលដឹកកសិផលទៅកាន់ទៅផ្សារ ក៏ដូចជាជួយសម្រួលក្នុងការធ្វើដំណើររបស់ប្រជាពលរដ្ឋ និងសិស្សានុសិស្សទៅកាន់សាលារៀនផងដែរ ។
ជាមួយគ្នា នោះដែរលោកអភិបាល បានសូមបងប្អូនប្រជាពលរដ្ឋ មេត្តាអាធ្យាស្រ័យ និងយោគយល់ នូវផលប៉ះពាល់ទាំងឡាយដែលអាចនឹងកើតមានជាយថាហេតុក្នុងអំឡុងពេលស្ថាបនា ដូចជា ដើមឈើ ដំណាំដាំដុះ របងផ្ទះ រួមទាំងការលំបាកធ្វើដំណើរ និងដឹកកសិផលនានាឆ្លងកាត់ការដ្ឋាននេះ និងសូមអោយអ្នកទទួលការ សហការអោយបានល្អ ប្រកបដោយសីលធម៌ ជាមួយប្រជាពលរដ្ឋ នៅពេលដែលការស្ថាបនា ប៉ះពាល់ទ្រព្យសម្បត្តិឯកជនរបស់ពួកគាត់ និងជួយសម្របសម្រួលនៅពេលដែលពួកគាត់មានរវល់ប្រារព្ធពិធីផ្សេងៗ នៅគេហដ្ឋានរបស់គាត់។ បន្ថែមពីលើនេះទៅទៀតលោកអភិបាលខេត្តក៏បានសុំអោយប្រជាពលរដ្ឋ ចូលរួមត្រួតពិនិត្យ មើលការស្ថាបនាថាត្រឹមត្រូវតាមបទដ្ឋានបច្ចេកទេស ឬខុសបច្ចេកទេស ហើយការស្ថាបនានេះមានគុណភាព ដែលយើងអាចទទួលយកបានដែរឬទេ? ប្រសិនបើមានភាពអសកម្មយ៉ាងណា សូមរាយការណ៍ទៅកាន់អាជ្ញាធរដែនដី ឬមកកាន់លោកផ្ទាល់តែម្តង សំដៅធ្វើយ៉ាងណាអោយកំណាត់ផ្លូវមួយខ្សែនេះ មានគុណភាពល្អ ប្រើប្រាស់បានយូអង្វែង។
