អភិបាលខេត្តដឹកនាំកម្លាំងសមត្ថកិច្ចគ្រប់ផ្នែកបញ្ជូនទៅ ជម្លៀសប្រជាពលរដ្ឋនៅស្រុកសៀមប៉ាងរកទីទួលសុវត្ថិភាព

គួរបញ្ជាក់ថា៖កាលពីល្ងាចថ្ងៃដដែលនេះរដ្ឋបាលខេត្តស្ទឹងត្រែង បានស្នើប្រជាពលរដ្ឋក្នុងខេត្តស្ទឹងត្រែង ដែលកំពុងរស់នៅតាមបណ្តោយដងទន្លេនានា មានការប្រុងប្រយ័ត្ន និងត្រៀមបង្ការឲ្យបានខ្ពស់បំផុត ព្រមទាំងជួយផ្តល់ព័ត៌មានឲ្យបានឆាប់បំផុតដល់អាជ្ញាធរមូលដ្ឋានក្នុងករណីមានទឹកជំនន់ឡើងខ្លាំង។

ការចេញមកអំពាវនាវរបស់រដ្ឋបាលខេត្តស្ទឹងត្រែងនៅយប់ថ្ងៃទី២៤ ខែកក្កដា ឆ្នាំ២០១៨នេះ បានធ្វើឡើងក្នុងគ្រាដែលខេត្តស្ទឹងត្រែងកំពុងទទួលការជន់លិចខ្លាំង ដោយសារទឹកហូរធ្លាក់ពីប្រទេសឡាវ ដោយសារការបាក់ទំនប់វារីអគ្គិសនីសេពានសេណាមណយ ស្ថិតនៅខេត្តអត្តពឺ។

ទន្ទឹមនឹងការអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ក៏បានអំពាវនាវដល់អាជ្ញាធរមានសមត្ថកិច្ច កម្លាំងគ្រប់ផ្នែកទាំងអស់ក្នុងមូលដ្ឋានភូមិ ឃុំ សង្កាត់ ក្រុង ស្រុក ក្នុងខេត្តស្ទឹងត្រែង ត្រូវរៀបចំដាក់ចេញនូវផែនការសរុប វិធានការសរុប កម្លាំងសរុប និងមធ្យោបាយសរុប ដើម្បីត្រៀមបង្ការ និងអន្តរាគមន៍ជួយសង្គ្រោះប្រជាពលរដ្ឋនៅតាមតំបន់ដែលរងផលប៉ះពាល់ទាំងអស់ឲ្យបានទាន់ពេលវេលា និងធានាបានប្រសិទ្ធភាពខ្ពស់បំផុត៕