អត្រាគ្រោះថ្នាក់ដោយសារមីនមានការថយចុះប្រមាណ ៤០០០នាក់ ក្នុង១៩៩៦ មក ៧៧នាក់ ក្នុងឆ្នាំ២០១៩
ខេត្តពោធិ៍សាត់៖ អនុប្រធានទី១ អាជ្ញាធរមីន បានស្នើសុំប្រតិបត្តិករទាំងអស់ ចូលរួមអប់រំប្រជាពលរដ្ឋឲ្យបានសកម្ម និងជាប្រចាំ ត្រូវខិតខំឆ្លើយតបដោះស្រាយប្រកបដោយប្រសិទ្ធភាព និងទាន់ពេលវេលា នូវសំណូមពររបស់ប្រជាពលរដ្ឋ ដោយប្រមូលនិងកម្ទេចចោលគ្រាប់មីន គ្រាប់បែកចង្កោម ឬសំណល់ជាតិផ្ទុះពីសង្គ្រាម ដែលប្រជាពលរដ្ឋ បានរាយការណ៍ ហើយអត្រាគ្រោះថ្នាក់ដោយសារមីនមានការថយចុះប្រមាណ ៤០០០នាក់ ក្នុង១៩៩៦ មក ៧៧នាក់ ក្នុងឆ្នាំ២០១៩ និងបានប្តេជ្ញាបន្តគាំទ្ររាជរដ្ឋាភិបាលកម្ពុជា សម្រេចបានគោលដៅគ្មានមីននៅឆ្នាំ២០២៥ តាមរយៈគម្រោងបោសសម្អាតមីនដើម្បីលទ្ធផល។
នៅព្រឹកថ្ងៃទី២៤ ខែកុម្ភៈ ឆ្នាំ២០២០ អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន បានរៀបចំប្រារព្ធខួបលើកទី២១នៃទិវាជាតិយល់ដឹងអំពីមីន នៅវិទ្យាល័យប្រម៉ោយ ឃុំប្រម៉ោយ ស្រុកវាលវែង ខេត្តពោធិ៍សាត់ ក្រោមអធិបតីភាព លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការចូលរួមពីឯកអគ្គរដ្ឋទូតអូស្ត្រាលីប្រចាំនៅកម្ពុជា សេនានុព័ន្ធយោធាកូរ៉េខាងត្បូង អនុប្រធានស្ថានបេសកកម្មវៀតណាម តំណាងអង្គការយូអិនឌីភី អង្គការយូនីសេហ្វ ក្រសួង-ស្ថាប័ន អាជ្ញាធរខេត្តពាក់ព័ន្ធ ប្រតិបត្តិករ សកម្មភាពមីន អង្គការពាក់ព័ន្ធនានា ប្រជាពលរដ្ឋ លោកគ្រូ អ្នកគ្រូ និងសិស្សានុសិស្សប្រមាណជាង១.៦០០នាក់។
បន្ទាប់ពីសុន្ទរកថាស្វាគមន៍ដោយ លោក សាយ សុជាតិ អភិបាលរងនៃគណៈអភិបាលខេត្តពោធិ៍សាត់រួចមក លោក ព្រំ សុភមង្គល អគ្គលេខាធិការអាជ្ញាធរមីន បានអានសារលិខិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសប្រារព្ធខួបលើកទី២១ នៃទិវាជាតិយល់ដឹងអំពីមីន ២៤ កុម្ភៈ ២០២០។
លោកស្រី Cristian Munduate តំណាងប្រចាំប្រទេសរបស់អង្គការយូនីសេហ្វ បានមានប្រសាសន៍ថា នឹងបន្តកិច្ចសហប្រតិបត្តិការ និងគាំទ្ររាជរដ្ឋាភិបាលកម្ពុជា និងដៃគូពាក់ព័ន្ធ ចូលរួមកាត់បន្ថយការគំរាមកំហែងខាងសេដ្ឋកិច្ចសង្គម ដែលបង្កឡើងដោយសារមីន និងសំណល់ជាតិផ្ទុះពីសង្គ្រាម និងជួយដល់ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងលើកកម្ពស់សិទ្ធិរស់នៅរបស់ជនពិការ ជាពិសេសកុមារ។
លោក Pablo Chiho Kang ឯកអគ្គរដ្ឋទូតអូស្ត្រាលីប្រចាំនៅកម្ពុជា បានមានប្រសាសន៍ ចាត់ទុកការអប់រំកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម គឺជាកត្តាដ៏សំខាន់មួយក្នុងធ្វើឲ្យអត្រាគ្រោះថ្នាក់ដោយសារមីន មានការថយចុះប្រមាណ ៤០០០នាក់ ក្នុង១៩៩៦ មក ៧៧នាក់ ក្នុងឆ្នាំ២០១៩ និងបានប្តេជ្ញាបន្តគាំទ្ររាជរដ្ឋាភិបាលកម្ពុជា សម្រេចបានគោលដៅគ្មានមីននៅឆ្នាំ២០២៥ តាមរយៈគម្រោងបោសសម្អាតមីនដើម្បីលទ្ធផល។
លោក Nick Beresford តំណាងប្រចាំប្រទេសរបស់អង្គការយូអិឌីភី បានមានប្រសាសន៍ថា អង្គការយូអិនឌីភី សូមបញ្ជាក់សារជាថ្មីនូវការប្តេជ្ញាចិត្តគាំទ្រដល់កិច្ចប្រតិបត្តិការបោសសម្អាតមីនមីន និងសំណល់ជាតិផ្ទុះពីសង្គ្រាម និងជួយដល់ជនរងគ្រោះថ្នាក់ដោយសារមីន។
លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានមានប្រសាសន៍ថា កម្ពុជាបានចាប់ផ្តើមការងារបោសសម្អាតមីន ជាលក្ខណៈមនុស្សធម៌ចាប់តាំងពីឆ្នាំ១៩៩២ ដើម្បីធានាសុវត្ថិភាព និងផ្តល់ដីបង្កបង្កើនផលសម្រាប់ប្រជាជនភៀសសឹកដែលធ្វើមាតុភូមិនិវត្តន៍ បន្ទាប់មកការបោសសម្អាតមីនត្រូវបានធ្វើឡើង ដើម្បីសង្គ្រោះជីវិត កាត់បន្ថយគ្រោះថ្នាក់ និងគាំទ្រដល់កិច្ចអភិវឌ្ឍន៍នានា។ ក្រោមនយោបាយ ឈ្នះ ឈ្នះ របស់ សម្តេចអគ្គមហាសេនាបតីតេជោ ហ៊ុន សែន នៅឆ្នាំ១៩៩៨ កម្ពុជាទទួលបានសន្តិភាពពេញលេញទូទាំង ប្រទេសដែលអនុញ្ញាតឱ្យរាជរដ្ឋាភិបាលមានលទ្ធភាពគ្រប់គ្រាន់ ចាត់ចែងការងារវិស័យសកម្មភាពមីននៅគ្រប់តំបន់ ដែលរងការគំរាមកំហែងដោយសារគ្រាប់ទាំងនោះ ប្រកបដោយប្រសិទ្ធភាព និងបានកំណត់រៀបចំ ទិវាជាតិយល់ដឹងអំពីមីន ២៤ កុម្ភៈ ជារៀងរាល់ឆ្នាំតាំងពីឆ្នាំ១៩៩៩មកម្ល៉េះ ដើម្បីជាការក្រើនរំលឹកដល់ប្រជាពលរដ្ឋទូទាំងប្រទេស ជាពិសេសបងប្អូនដែលកំពុងរស់នៅតំបន់ប្រឈម ឲ្យមានការប្រុងប្រយ័ត្នខ្ពស់ពីគ្រោះថ្នាក់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាម។
ឆ្លៀតក្នុងឱកាសដ៏ថ្លៃថ្លានេះ ក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាជ្ញាធរមីន លោកទេសរដ្ឋមន្ត្រី លី ធុជ បានអំពាវនាវដល់អាជ្ញាធរដែនដីគ្រប់លំដាប់ថ្នាក់ ដៃគូពាក់ព័ន្ធ ប្រតិបត្តិករសកម្មភាពមីនជាតិ-អន្តរជាតិ ជាពិសេសបងប្អូនប្រជាពលរដ្ឋទាំងអស់ ដូចតទៅ៖
១. អាជ្ញាធរដែនដី ត្រូវផ្សព្វផ្សាយឱ្យប្រជាពលរដ្ឋបានដឹងពីតំបន់ ដែលមានផលប៉ះពាល់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមនៅក្នុងភូមិសាស្រ្តភូមិ ឃុំរបស់ខ្លួន។
២. សូមពិតទូលព្រះសង្ឃ ព្រះថេរានុថេរៈ ក៏ដូចជាបងប្អូន ត្រូវចូលរួមជួយពន្យល់បន្ត ទៅពុទ្ធបរិស័ទចំណុះជើងវត្ត ក៏ដូចជាក្រុមគ្រួសារ និងអ្នកជិតខាងខ្លួន ឲ្យគោរពតាមការណែនាំពីសំណាក់អាជ្ញាធរមូលដ្ឋាន អង្គការ ឬប្រតិបត្តិករ ដែលបានផ្តល់នូវការអប់រំអំពីគ្រោះថ្នាក់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាម។
៣. ចៀសវាងការរុករកកាកសំណល់អេតចាយដែលជាគ្រឿងផ្ទុះ ឬវត្ថុដែលសង្ស័យថាជាគ្រឿងផ្ទុះ។ មិនត្រូវកែច្នៃគ្រាប់ ឬរំសេវផ្ទុះ។ មិនត្រូវប្រថុយប្រថានចូលទៅតំបន់ ដែលមិនស្គាល់ទីតាំងភូមិសាស្រ្ត ច្បាស់លាស់ក្នុងបំណងណាមួយ ដូចជាប្រើប្រាស់ដី រុករកអនុផលព្រៃឈើ ឬធ្វើដំណើរឆ្លងកាត់ទាំងប្រថុយប្រថាន។ មិនត្រូវ ប៉ះពាល់គ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាមជាដាច់ខាត ហើយត្រូវរាយការណ៍ជូនអាជ្ញាធរមូលដ្ឋាន ប្រតិបត្តិករបោសសម្អាតមីន ឬសមត្ថកិច្ចនគរបាលជាបន្ទាន់ នៅពេលបានឃើញ បានដឹង ពីទីកន្លែងដែលមានមីន គ្រាប់បែកចង្កោម ឬសំណល់ជាតិផ្ទុះពីសង្គ្រាម។
៤. ស្នើសុំប្រតិបត្តិករទាំងអស់ ចូលរួមអប់រំប្រជាពលរដ្ឋឲ្យបានសកម្ម និងជាប្រចាំ ជាពិសេសត្រូវយកចិត្តទុកដាក់ពិនិត្យតាមដាន និងកំណត់មុខសញ្ញាជនដែលងាយរងគ្រោះថ្នាក់ ដើម្បីធ្វើការអប់រំ។ ជាមួយគ្នានេះ ត្រូវខិតខំឆ្លើយតបដោះស្រាយប្រកបដោយប្រសិទ្ធភាព និងទាន់ពេលវេលា នូវសំណូមពររបស់ប្រជាពលរដ្ឋ ដោយប្រមូលនិងកម្ទេចចោលគ្រាប់មីន គ្រាប់បែកចង្កោម ឬសំណល់ជាតិផ្ទុះពីសង្គ្រាម ដែលប្រជាពលរដ្ឋ បានរាយការណ៍ ។
លោកទេសរដ្ឋមន្ត្រី បានអំពាវនាវដល់ដៃគូអភិវឌ្ឍន៍ អង្គការជាតិ-អន្តរជាតិ និងវិស័យឯកជននានា សូមបន្តជួយឧបត្ថម្ភគាំទ្រទាំងស្មារតី សម្ភារៈ និងថវិកា ដើម្បីបន្តនិរន្តរភាពក្នុងការអនុវត្តសកម្មភាពអប់រំកាត់បន្ថយគ្រោះថ្នាក់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាម និងសូមថ្លែងអំណរគុណយ៉ាងជ្រាលជ្រៅ និងស្មោះស្ម័គ្របំផុតជូនចំពោះប្រទេសជាមិត្ត ដៃគូអភិវឌ្ឍន៍ បណ្តាអង្គការជាតិ-អន្តរជាតិ និងប្រតិបត្តិករសកម្មភាពមីនទាំងអស់ ដែលបានចូលរួមយ៉ាងសកម្មជាមួយរាជរដ្ឋាភិបាលកម្ពុជា ក្នុងសកម្មភាពបោសសម្អាតមីន និងអប់រំយល់ដឹងអំពីមីន ដើម្បីសង្រ្គោះជីវិត កាត់បន្ថយគ្រោះថ្នាក់ ផ្តល់នូវសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋ៕
