បញ្ឈប់អ្នកបើករថយន្តក្រុងម្នាក់ ដោយសារនោមដាក់កង់រថយន្តក្រុង
ភ្នំពេញ៖ រដ្ឋាករស្វយ័តដឹកជញ្ជូនសាធារណៈរថយន្តក្រុង(City Bus) បានបញ្ឈប់បុគ្គលិកអ្នកបើកបររថយន្តម្នាក់ ដោយសារធ្វើឲ្យប៉ះពាល់ដល់សេចក្តីថ្លៃថ្នូរ សុជីវធម៌ អនាម័យ ជាពិសេសសោភ័ណភាពរាជធានីភ្នំពេញ។
នេះបើតាមសេចក្តីប្រកាសព័ត៌មានរបស់រដ្ឋាករស្វយ័ត នៅថ្ងៃទី២៨ ខែកុម្ភៈនេះ បានបញ្ជាក់ថា ប្រធានCity Bus បានបញ្ជាក់ថា ការដែលបញ្ឈប់អ្នកបើកបររូបនោះ ដោយសារតែបន្ទោបង់ទឹកនោមដាក់កង់រថយន្តក្រុងនៅទីសាធារណៈ។
សូមបញ្ជាក់ថា កាលពីថ្ងៃទី២៧ខែកុម្ភៈនេះ បណ្តាញសង្គមហ្វេសប៊ុក បានចែកចាយនូវរូបភាពអ្នកបើកបរថយន្តក្រុងម្នាក់ ក្នុងរាជធានីភ្នំពេញ បាននោមដាក់កង់រថយន្តនៅទីធ្លាសាធារណៈ ដែលធ្វើឲ្យមានការរិះគន់ជាខ្លាំងពីសំណាក់អ្នកប្រើប្រាស់បណ្តាញសង្គមហ្វេសប៊ុក ចំពោះឥរិយាបថ និងអាកប្បកិរិយាមាយាទរបស់អ្នកបើកបររថយន្តក្រុងរូបនេះ។
ក្នុងសេចក្តីប្រកាស បានឲ្យដឹងថា បន្ទាប់ពីទទួលបានព័ត៌មាន និងរូបភាពបុគ្គលិក ឈ្មោះ ចេង ចិត្រា ភេទប្រុស បើកបររថយន្តក្រុងផ្លាកលេខ ៣-០១៩៧ ធ្វើការបន្ទោបង់ទឹកនោមដាក់កង់រថយន្តក្រុងនៅទីសាធារណៈ ស្ថិតនៅចំណុចប្រសព្វផ្លូវលេខ១៣០ កែងមហាវិថីព្រះនរោត្តម កាលពីថ្ងៃទី២៧ ខែកុម្ភៈ ឆ្នាំ២០២០ វេលាម៉ោង១២និង០០នាទីនោះ រដ្ឋាករពិនិត្យឃើញថា ទង្វើរនេះ បានធ្វើឲ្យប៉ះពាល់ដល់កិត្តិយសដល់សេចក្តីថ្លៃថ្នូរ សុជីវធម៌ អនាម័យ សណ្តាប់ធ្នាប់សាធារណៈ និងសោភ័ណភាពរាជធានីភ្នំពេញផងដែរ។ ពាក់ព័ន្ធករណីខាងលើនេះ រដ្ឋាករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ បានចាត់វិធានការបញ្ឈប់បុគ្គលិកបើកបររូបនេះពីរដ្ឋាករចាប់ពីពេលនេះតទៅ៕
