ស្ត្រីអ្នកទោសជាម្តាយរបស់ទារក ដែលស្លាប់ក្នុងពន្ធនាគារ ត្រូវបានដោះលែងឱ្យមានសេរីភាព
ភ្នំពេញ ៖ គណៈកម្មាធិការសិទ្ធិមនុស្ស នៅថ្ងៃទី២៨ខែកុម្ភៈ បានឱ្យដឹងថា តុលាការបានសម្រេចដោះលែងស្ត្រីម្នាក់ ដែលជាម្តាយរបស់ទារកអាយុ៥ខែដែលស្លាប់ក្នុងពន្ធនាគារ ឱ្យមានសេរីភាពឡើងវិញ ។
ក្រោមកិច្ចអន្តរាគមន៍ ជំនួយផ្នែកច្បាប់របស់ក្រុមមេធាវីសិទ្ធិមនុស្ស នៃគណៈកម្មាធិការសិទ្ធិមនុស្សកម្ពុជា ស្រ្តីជាប់ឃុំរូបនោះ បានចាកចេញ ពីពន្ធនាគារហើយ នៅព្រឹកថ្ងៃទី២៨ ខែកុម្ភៈ ឆ្នាំ២០២០ ។ ចំណែកឯទោស ដែលនៅសល់ត្រូវព្យួរ។
ក្នុងសេចក្តីប្រកាសរបស់គណៈកម្មាធិការសិទ្ធិមនុស្ស បានឱ្យដឹងថា ក្រោយពីបានទទួលព័ត៌មានស្តីពីការស្លាប់របស់ទារិកាអាយុ៥ខែ ដែលរស់នៅជាមួយម្តាយនៅមណ្ឌលអប់រំកែប្រែទី២ (ម២) នៅមន្ទីរពេទ្យមិត្តភាពខ្មែរ-សូវៀត ដោយសារជំងឺរលាកសួតធ្ងន់ធ្ងរ។
ករណីនេះ គណៈកម្មាធិការសិទ្ធិមនុស្សកម្ពុជា (គ.ស.ម.ក.) បានផ្តល់មេធាវីដោយឥតគិតថ្លៃជួយការពារក្តី ក្រោយពីសវនាការលើសំណុំរឿងនេះ តុលាការបានប្រកាសសាលក្រមជាសាធារណៈ នៅថ្ងៃទី២៥ ខែកុម្ភៈ ពីបទល្មើសជួញដូរដោយខុសច្បាប់ នូវសារធាតុញៀន និងបទប្រើប្រាស់ដោយខុសច្បាប់នូវសារធាតុញៀន និងផ្តន្ទាទោសដាក់ពន្ធនាគារ២ឆ្នាំ ដោយអនុវត្តទោសក្នុងពន្ធនាគាររយៈពេល ៨ខែ ១០ថ្ងៃ ហើយទោសដែលនៅសល់ត្រូវអនុវត្តទោសព្យួរធម្មតា។
គណៈកម្មាធិការសិទ្ធិមនុស្សកម្ពុជា សង្ឃឹមថា ស្រ្តីជាប់ឃុំដែលត្រូវបានដោះលែងឱ្យមានសេរីភាពនោះ នឹងខិតខំកែប្រែកសាងខ្លួន ឈប់ពាក់ព័ន្ធជាមួយគ្រឿងញៀន និងក្លាយជាពលរដ្ឋល្អក្នុងសង្គម។
គណៈកម្មាធិការសិទ្ធិមនុស្សកម្ពុជា អះអាងថា នៅតែចាត់ក្រុមការងារបន្តតាមដាន និងត្រួតពិនិត្យយ៉ាងយកចិត្តទុកដាក់ លើករណីផ្សេងៗទៀតពាក់ព័ន្ធនឹងស្ត្រីជាប់ឃុំ ដែលមានកូននៅជាមួយក្នុងពន្ធនាគារ ដើម្បីធានាថា សិទ្ធិរបស់ពួកគេ រួមទាំងកុមារដែលនៅជាមួយត្រូវបានធានា និងការពារ ស្របតាមបទដ្ឋានសិទ្ធិមនុស្សជាតិ និងអន្តរជាតិ និងគោលការណ៍មនុស្សធម៌។
គួរបញ្ជាក់ថា ទារកម្នាក់អាយុ៥ខែ ដែលរស់នៅជាមួយម្ដាយនៅក្នុងមណ្ឌលអប់រំកែប្រែទី២ ឬពន្ធនាគារព្រៃស បានស្លាប់ កាលពីថ្ងៃអាទិត្យ ទី២៦ ខែមករា កន្លងទៅ នៅឯមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ។ ទារកនោះត្រូវបានសមត្ថកិច្ចអះអាងថា ស្លាប់ដោយសារតែជំងឺរលាកសួត និងកង្វះអាហារូបត្ថម្ភ។
ស្រ្តីជាម្ដាយក្មេងរងគ្រោះ ត្រូវបានបញ្ជូនទៅឃុំខ្លួនក្នុងពន្ធនាគារបណ្ដោះអាសន្នរង់ចាំសវនាការ កាលពីពាក់កណ្ដាលឆ្នាំ២០១៩ បន្ទាប់ពីរងការចោទប្រកាន់ពីអាជ្ញាធរថា បានកាន់កាប់កញ្ចប់ថ្នាំញៀនប្រភេទមេតំហ្វេតាមីនដែលមានតម្លៃត្រឹមតែមួយម៉ឺនរៀល ឬ២,៥ដុល្លារ។ អ្នកស្រីមិនត្រូវបានផ្ដល់មេធាវីការពារក្ដីទេ ហើយក៏មិនបានដឹងពីសិទ្ធិក្នុងការស្នើសុំនៅក្រៅឃុំផងដែរ។ អ្នកស្រីមានផ្ទៃពោះ៨ខែ នៅពេលត្រូវបានបញ្ជូនទៅឃុំខ្លួនក្នុងពន្ធនាគារ។
យើងខ្ញុំ សូមស្នើសុំដោយទទូចឱ្យអាជ្ញាធរចាត់វិធានការឱ្យបានឆាប់រហ័ស ដើម្បីធានាថាករណីបែបនេះមិនកើតមានឡើងម្ដងទៀត។
តាមរបាយការណ៍លីកាដូចេញផ្សាយនៅចុងខែកុម្ភៈ ឆ្នាំ២០២០នេះ បានឱ្យដឹងថា បច្ចុប្បន្ននេះ មានកុមារចំនួន១០៣នាក់ និងស្រ្តីមានផ្ទៃពោះចំនួន៤៣នាក់ កំពុងជាប់ឃុំក្នុងពន្ធនាគារចំនួន១៨ ដែលអង្គការលីកាដូបានធ្វើការឃ្លាំមើល ហើយតួលេខនេះកើនឡើងស្ទើរតែ២ដង គិតចាប់តាំងពីថ្ងៃទី១ ខែមករា ឆ្នាំ២០១៧មក ព្រោះថា ថ្ងៃនោះគឺជាពេលដែលមាន យុទ្ធនាការបង្ក្រាបគ្រឿងញៀន នៅទូទាំងប្រទេស។
ក្នុងកិច្ចប្រជុំបូកសរុបការងាររបស់ក្រុមប្រឹក្សាជាតិកម្ពុជា ដើម្បីស្ត្រី នៅថ្ងៃទី១៧ ខែកុម្ភៈ ឆ្នាំ២០២០ សម្តេចតេជោនាយករដ្ឋមន្ត្រី ហ៊ុន សែន ជំរុញឱ្យភាគីពាក់ព័ន្ធពន្លឿន បើកសវនាការលើអ្នកជាប់ឃុំជាស្ត្រី ហើយសម្តេចបានបញ្ជាក់ថា បើសិនតុលាការមិនមានបន្ទប់គ្រប់គ្រាន់ សម្រាប់បើកសវនាការនោះ អាចជួលសណ្ឋាគារជំនួសបាន៕
