ជួយសម្រួលដល់ការដឹកជញ្ជូន និងការឆ្លងកាត់ព្រំដែនរវាងកម្ពុជា-ថៃ និង កម្ពុជា-វៀតណាមឲ្យកាន់តែមានប្រសិទ្ធភាព
ភ្នំពេញ៖ លោក អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) បានដឹកនាំកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើលទ្ធភាពក្នុងការជំរុញ “ការអនុវត្តការត្រួតពិនិត្យច្រកចេញ-ចូលតែមួយ រវាងកម្ពុជា-ថៃ និង កម្ពុជា-វៀតណាម”, នារសៀលថ្ងៃទី ២៧ ខែ កុម្ភៈ ឆ្នាំ ២០២០, នៅទីស្ដីការក្រសួងសេដ្ឋកិច្ច និងហិរញ្ញវត្ថុ ។
បើតាមសេចក្តីប្រកាសព័ត៌មាន របស់ក្រសួងសេដ្ឋកិច្ចនិងហិរញ្ញវត្ថុ បានឲ្យដឹងថា ដើម្បីឆ្លើយតបនិងតម្រូវការក្នុងការជំរុញការដឹកជញ្ជូនឆ្លងកាត់ព្រំដែនការអភិវឌ្ឍន៍ច្រកចេញចូលតែមួយ ជាមួយប្រទេសជាប់ព្រំដែន ជាពិសេសប្រទេសថៃ និងវៀតណាម គឺជាកិច្ចការបន្ទាន់ចំពោះមុខរបស់កម្ពុជា។ ជាក់ស្ដែង ក្រោយពីការសាងសង់ស្ពាន់ត្សឺបាសា (អ្នកលឿង) រួចមក និងចរាចរឆ្លងកាត់ព្រំដែនអន្តរជាតិបាវិតម៉ុកបៃ បានកើនឡើងខ្ពស់ពីការរំពឹងទុក ស្របពេលដែលផ្លូវឆ្លងកាត់ព្រំដែនមានតែមួយខ្សែ និងតូចចង្អៀតដែលមិនអនុញ្ញាតឲ្យមានការបែងចែក តាមប្រភេទចរាចរណ៍ រឿងមធ្យោបាយដឹកជញ្ជូនឆ្លងកាត់បានប្រកប ដោយប្រសិទ្ធភាព។ ច្រកទ្វារព្រំដែននេះ ករងសម្ពាធពីល្បឿននៃការអភិវឌ្ឍយ៉ាងកំហុគ នាប៉ុន្មានឆ្នាំចុងក្រោយនេះ ។ ស្រដៀងគ្នាដែរ ស្ថានភាពនៃការកកស្ទះនៅច្រកទ្វារព្រំដែនអន្តរជាតិប៉ោយប៉ែត ទៅអារញ្ញប្រាថេត ក៏មានសភាពធ្ងន់ធ្ងរផងដែរ ខណៈ ច្រកទ្ធារអន្តរជាតិថ្មីស្ទឹងបត់បានណងអៀន នៅមិនទាន់អាចដាក់ឲ្យដំណើរការបាន។
ក្នុងបរិក្ខារនេះ គណៈកម្មការគោលនយោបាយសេដ្ឋកិច្ចនិងហិរញ្ញវត្ថុ បានចង្អុលបង្ហាញនូវវិធានការចំពោះមុខតាមរយៈមធ្យមនិងវែង ក្នុងនោះ សម្រាប់ច្រកទ្វារព្រំដែនអន្តរជាតិបាវិតម៉ុកបៃ គឺជំរុញការកែវលំអហេដ្ឋារចនាសម្ព័ន្ធរូបវន្ត ក្នុងទឹកដីកម្ពុជា ពិសេសផ្លូវតភ្ជាប់ច្រកទ្វារ ព្រំដែន ដើម្បីអនុវត្តឲ្យមានការបែងចែកតាមប្រភេទចរាចរណ៍ឬ ប្រភេទមធ្យោបាយដឹកជញ្ជូន។ បន្ត សហការ យ៉ាងជិតស្និទ្ធជាមួយសមភាគីវៀតណាម ក្នុងការបន្ស៊ីគ្នាររវាងបទដ្ឋានហេដ្ឋារចនាសម្ព័ន្ធរូបវន្ត និងពេលវេលាសាងសង់ដើម្បីលើកកម្ពស់ប្រសិទ្ធភាពការអនុវត្ត ។ បន្តផ្តោត លើផែនការរយៈពេលវែង ជាពិសេសជំរុញការសាងសង់ផ្លូវល្បឿនលឿនភ្នំពេញបាវិត និងហេដ្ឋារចនាសម្ព័ន្ធនៅច្រកទ្វារអន្តរជាតិថ្មី រាប់ទាំង ការសង់សង់តំបន់ត្រួតពិនិត្យរួម។ ជាមួយគ្នានេះ សម្រួលនីតិវិធីឆ្លងកាត់ព្រំដែន ដោយបង្កើនប្រសិទ្ធភាពការងារ តាមរយៈការបន្ស៊ីនីតិវិធីគយ ជាមួយដៃគូពាក់ព័ន្ធក្នុងស្រុក និងភាគីវៀតណាម ជាពិសេសជំរុញការអភិវឌ្ឍ ការត្រួតពិនិត្យច្រកចេញចូលតែមួយ។
សម្រាប់ច្រកទ្វារព្រំដែនកម្ពុជាថៃ កិច្ចការបន្ទាន់ចំពោះមុខ ស្វែងរក ការឯកភាពជាមួយភាគីថៃ ក្នុងឱកាសដាក់ឲ្យដំណើរការជាបណ្ដោះអាសន្ន នៅច្រកទ្វារព្រំដែនអន្តរជាតិស្ទឹងបត់បានណងអៀន ជំរុញការសាងសង់ហេដ្ឋារចនាសម្ព័ន្ធរឹងមាំឲ្យបានឆាប់ បង្កើនប្រសិទ្ធភាពនៃការអនុវត្តនីតិវិធី បញ្ចេញទំនិញឆ្លងកាត់ព្រំដែន តាមរយៈកិច្ចសហការជាមួយភាគីពាក់ព័ន្ធក្នុងស្រុកនិងភាគីថៃ។
លោកអូន ព័ន្ធមុនីរ័ត្ន ឧបនាយករដ្ឋមន្រ្តី និងជាប្រធានអង្គប្រជុំ បានអរគុណ និងវាយតម្លៃខ្ពស់ដល់គ្រប់ក្រសួងស្ថាប័ន ពាក់ព័ន្ធដែលបានខិតខំ និងចូលរួមយ៉ាងសកម្មក្នុងការរកដំណោះស្រាយ និងលើកទឹកចិត្តដល់ក្រសួងស្ថាប័នពាក់ព័ន្ធ បន្ទាប់ពីផ្ដល់កិច្ចសហការប្រកបដោយស្មារតីទទួលខុសត្រូវខ្ពស់ ដើម្បីជួយសម្រួលដល់ការដឹកជញ្ជូន និងការឆ្លងកាត់ព្រំដែនឲ្យកាន់តែមានប្រសិទ្ធភាព៕
