តុលាការផ្តន្ទាទោសលោកឧកញ៉ា គិត ធាង ឲ្យជាប់ពន្ធនាគារ៤ឆ្នាំ លើសំណុំរឿងគ្រឿងញៀន ៥០គីឡូក្រាម
ភ្នំពេញ៖ តុលាការរាជធានីភ្នំពេញ បានប្រកាសសាលក្រមនៅព្រឹកថ្ងៃទី២០ ខែមីនា ឆ្នាំ២០២០នេះ ដោយផ្តន្ទាទោសឧកញ៉ា គិត ធាង ម្ចាស់ក្លិប Rock ឲ្យជាប់ពន្ធនាគាររយៈពេល៤ឆ្នាំ ក្រោម បទចាត់ចែង សម្រួលឲ្យមានការប្រើប្រាស់ដោយខុសច្បាប់នូវសារជាតិញៀន និងបទសមគំនិត។
ពាក់ព័ន្ធករណីនេះ លោកវីល្លាម ប្រធានគណបក្សខ្មែរក្រោក បានសរសេរសារថា “ខណៈដែលមហាជនកំពុងវ៉ក់វីរឿង Covid19 ក្រុមប្រឹក្សាតុលាការប្រកាសសាលក្រមផ្តន្ទាទោស លោក គិតធាង ត្រឹមតែ៤ឆ្នាំ លើសំណុំរឿងគ្រឿងញៀន ៥០គីឡូក្រាម ។ ខ្ញុំគិតថាទំហំទោសនេះ ហាក់បីដូចជាមិនស័ក្តិសមនឹងទំហំប្រព្រឹត្តនោះឡើយ” ។
បើតាមលោក សួង ចាន់ថន មេធាវីម្នាក់របស់លោក គិត ធាង ដែលប្រាប់សារមាព័ត៌មានក្នុងស្រុកមួយ ថា លោក គិត ធាង កំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត។ លោកមេធាវី មានប្រសាសន៍ថា “គាត់សម្រាកព្យាបាលជំងឺធ្ងន់ធ្ងរ គាត់ មានជំងឺសួត”។
ចំណែកមនុស្សទាំង២៤នាក់នោះ ត្រូវបានកាត់ទោសឲ្យជាប់ពន្ធនាគារចាប់១ឆ្នាំ ទៅដល់ ៤ឆ្នាំ។ ឯមនុស្ស២នាក់ទៀត ដែលពាក់ព័ន្ធនឹងលោក គិត ធាង ដែរនោះ ត្រូវបានលើកលែងការចោទប្រកាន់។
កាលពីអំឡុងខែមីនា ឆ្នាំ២០១៩ សមត្ថកិច្ច បានទៅចាប់លោក គិត ធាង ដល់ភូមិគ្រឹះរបស់លោកតែម្តង ចំណែកក្លិបរបស់លោក ត្រូវបានបិទចោល។ កាលនោះ សមត្ថកិច្ច បានរកឃើញមនុស្សរាប់រយនាក់ ដែលសេពគ្រឿងញៀនក្នុងក្លិប Rock តែពួកគេទាំងនោះ ត្រូវបានដោះលែងវិញ ក្រោយទទួលការអប់រំ៕
