ឃាត់ខ្លួនជនបំពុលព័ត៌មាន យកវីដេអូព្រះសង្ឃស្រោចទឹក បំភ្លៃថា ជាករណីបណ្តេញមេរោគកូវីដ១៩
សៀមរាប ៖ សមត្ថកិច្ចខេត្តសៀមរាប បន្តចុះស្រាវជ្រាវ និងនាំខ្លួនជនបំពុលព័ត៌មាន តាមបណ្តាញសង្គម អំពី ការយកវីដេអូ កាលពីឆ្នាំ២០១៩ មកបំផុសបំផុល និងផុសប្រើសម្តីមិនសមរម្យ ចំពោះព្រះសង្ឃ។
ស្នងការដ្ឋាននគរបាលខេត្តសៀមរាប ថ្ងៃទី២៦ ខែមីនា ឆ្នាំ២០២០ បានឲ្យដឹងថា កាលពីថ្ងៃទី២៥ ខែមីនា ឆ្នាំ២០២០ កម្លាំងជំនាញមានសមត្ថកិច្ច នៃស្នងការដ្ឋាននគរបាលខេត្តសៀមរាប បានសហការជាមួយអធិការដ្ឋាននគរបាលស្រុកនគរធំ ចុះធ្វើការអញ្ជើញឈ្មោះ ជឿន ដា ភេទប្រុស អាយុ៣៣ឆ្នាំ រស់នៅភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប មុខរបរ មគ្គុទេសទេសចរណ៍ ដែលជាម្ចាស់ផេកហ្វេសប៊ុកឈ្មោះ Tour arrangement in Siem Reap ដែលបានបង្ហោះសារ លើបណ្តាញសង្គម ពាក់ព័ន្ធ នឹងព័ត៌មានមិនពិត (វីដេអូកាលពីឆ្នាំ2019) ពិធីស្រោចទឹក នឹងបានប្រើពាក្យមិនសមរម្យចំពោះ ព្រះសង្ឃ ។
ក្រោយការសាកសួររបស់សមត្ថកិច្ច សាមីខ្លួន ជឿន ដា បានសារភាពទទួលស្គាល់ នូវទោសកំហុស ដែលបានប្រព្រឹត្តិ ហើយសមត្ថកិច្ច ក៏បានធ្វើការណែនាំ អប់រំ និងធ្វើកិច្ចសន្យា ព្រមទាំងមានការធានាពីក្រុមគ្រួសារទើប អនុញ្ញាតឲ្យត្រឡប់ទៅវិញ ដើម្បីកសាងខ្លួន ។
នៅចំពោះមុខសមត្ថកិច្ចខេត្តសៀមរាប ជឿន ដា បានសារភាព និងសរសេរសារសុំទោស លើផេកហ្វេសប៊ុកថា “ខ្ញុំបាទ ជឿន ដា ភេទ ប្រុស អាយុ ៣៣ ឆ្នាំ។ ខ្ញុំបាទសុំទោសចំពោះរាជរដ្ឋាភិបាលកម្ពុជា រដ្ឋមន្ត្រីក្រសួងសារព័ត៌មាន ឯកឧត្តមគណៈអភិបាលខេត្តសៀមរាប ព្រះសង្ឃទាំងពីរគណៈ បងប្អូនប្រជាពលរដ្ឋកម្ពុជា ជាពិសេសប្រជាពលរដ្ឋស្រុកអង្គរធំ ។ កាលពីថ្ងៃទី ២៤ ខែ មីនា ឆ្នាំ ២០២០
ខ្ញុំបាទបង្ហោះ វីដេអូ ដែលមានខ្លឹមសារដូចខាងក្រោម តាមពិតវាជាព័ត៌មានមិនពិត ។ ខ្ញុំបាទមានការសោកស្តាយ និង ទទួលកំហុស។
ខ្ញុំបាទសុំទោសចំពោះព្រះសង្ឃ ដែលខ្ញុំបាទបានប្រើប្រាស់ពាក្យមិនសមរម្យចំពោះព្រះអង្គ។ ខ្ញុំបាទសុំសន្យាថា ខ្ញុំនិងមិនផុសផ្សព្វផ្សាយព័ត៌មាន មិនពិតតទៅទៀតទេ បើខ្ញុំបាទប្រព្រឹត្តិខុស ខ្ញុំបាទសុំទទួលខុសត្រូវចំពោះមុខច្បាប់”៕
