ចាប់ខ្លួនជនល្មើសម្នាក់រត់ចេញពីតុលាការ កាលពី៩ខែមុន
ភ្នំពេញ៖ ជនល្មើសម្នាក់ដែលមាន រហស្សនាម “អាកណ្តុរ” ដែលរត់ចេញពីតុលាការ កាលពី៩ខែមុន ឥឡូវត្រូវបានកម្លាំងអន្តរាគមន៍ពិសេស នៃអធិការដ្ឋានខណ្ឌមានជ័យ និងប៉ុស្តិ៍ស្ទឹងមានជ័យ១ សហការគ្នា ឃាត់បានវិញហើយ បន្ទាប់ពីដើរធ្វើសកម្មភាពរកលួចកាច់កម៉ូតូរបស់ប្រជាពលរដ្ឋ។
អធិការដ្ឋាននគរបាលខណ្ឌមានជ័យ នៅថ្ងៃទី២១ខែមេសាឆ្នាំ២០២០ បានឲ្យដឹងថា “ដោយសារតែមានការចង្អុលបង្ហាញ និងយកចិត្តទុកដាក់របស់លោកវរសេនីយ៍ទោ ម៉េង វិមានតារា អធិការនគរបាលខណ្ឌមានជ័យ ទីបំផុតជនត្រូវចោទឈ្មោះ អឹម រតនៈ (រហស្សនាម អាកណ្តុរ) ដែលរត់ចេញពីតុលាការ កាលពី៩ខែមុន ឥឡូវត្រូវបានកម្លាំងអន្តរាគមន៍ពិសេស នៃអធិការដ្ឋានខណ្ឌមានជ័យ និងប៉ុស្តិ៍ស្ទឹងមានជ័យ១ សហការគ្នា ឃាត់បានវិញហើយ នៅយប់រំលងអាធ្រាត្រឈានចូលថ្ងៃទី២១ ខែមេសា ឆ្នាំ២០២០នេះ ខណៈពេលជិះម៉ូតូឌុបបក្ខពួកម្នាក់ទៀត ដើររកលួចកាច់កម៉ូតូរបស់ប្រជាពលរដ្ឋណា ដែលទុកប្រហែស តែមកដល់ក្នុងទឹកដីសង្កាត់ស្ទឹងមានជ័យទី១ បែរជាអស់លក្ខណ៍ ព្រោះត្រូវកម្លាំងល្បាតប្រទះឃើញក៏ឃាត់សួរនាំ សុំត្រួតពិនិត្យ រកឃើញឧបករណ៍កាច់សោរកមួយឈុត”។
សមត្ថកិច្ចបានឲ្យដឹងថា មុនពេលឃាត់ខ្លួនជនសង្ស័យ គឺកម្លាំងនគរបាលអន្តរាគមន៍ពិសេសខណ្ឌមានជ័យ បានចេញល្បាតក្នុងមូលដ្ឋានដើម្បី បង្ការនិងទប់ស្កាត់បទល្មើសផ្សេងៗ ដោយមានការបញ្ជាផ្ទាល់ពីលោកវរសេនីយ៍ទោ ម៉េង វិមានតារា អធិការនគរបាលខណ្ឌមានជ័យ ខណៈកម្លាំងនគរបាលល្បាតមកដល់ចំណុចកើតហេតុក៏បានប្រទះឃើញជនសង្ស័យ ពីរនាក់ជិះម៉ូតូមួយគ្រឿងម៉ាកហុងដា ឌ្រីម ស៊េរីចាស់ ដោយមានការសង្ស័យក៏បានហៅសួរនាំឆែកឆេ រកឃើញដែកចុងស្រួច១ សោទីបលេខ៨ ចំនួន១ និងដែកសរសៃចំនួន១ ដែលលាក់ក្នុងប្រអប់ពណ៌ខ្មៅ។ ភ្លាមៗកម្លាំងនគរបាលបានឃាត់ខ្លួនជនសង្ស័យទាំងពីរនាក់យកមកធ្វើការសាកសួរនៅប៉ុស្តិ៍នគរបាលស្ទឹងមានជ័យទី១តែម្ដង។ ជនសង្ស័យទាំងពីរនាក់ដែលឃាត់ខ្លួនមានម្នាក់ឈ្មោះ អឹម រតនៈ ហៅ អាកណ្ដុរ ភេទប្រុស អាយុ៣២ឆ្នាំ មុខរបរមិនពិតប្រាកដ អតីតជាមន្ត្រីនគរបាលរដ្ឋបាលប៉ុស្តិ៍បឹងទំពុន មានស្រុកកំណើតនៅភូមិភ្នាត សង្កាត់ស្ទឹងមានជ័យទី២ ខណ្ឌមានជ័យ ស្នាក់នៅបន្ទប់ផ្ទះជួលនៅ ម្ដុំចំការដូង ខណ្ឌដង្កោ រាជធានីភ្នំពេញ ។
ជនសង្ស័យរូបនេះកាលពីម៉ោង៤និង៥០នាទី ល្ងាចថ្ងៃទី១៨ ខែសីហា ឆ្នាំ២០១៩ កន្លងទៅ ធ្លាប់បានយកឈើចាក់ធ្មេញ ឆ្កឹះសោខ្នោះដៃ រត់គេចខ្លួនចេញពីសាលាដំបូងរាជធានីភ្នំពេញ បាត់ដោយសុវត្ថិភាព។
ចំណែកម្នាក់ទៀតមានឈ្មោះ លី តុងហួរ ភេទប្រុស អាយុ២៧ឆ្នាំ មានស្រុកកំណើតនៅភូមិថ្មី សង្កាត់ស្ទឹងមានជ័យ១ខណ្ឌមានជ័យស្នាក់នៅផ្ទះលេខ២៣៥ ភូមិថ្មី សង្កាត់ស្ទឹងមានជ័យទី១ ខណ្ឌមានជ័យ ។
បច្ចុប្បន្នជនសង្ស័យទាំងពីរនាក់រួមនិងវត្ថុតាង ត្រូវបានបញ្ជួនទៅកាន់អធិការដ្ឋាននគរបាលខណ្ឌមានជ័យ ដើម្បីកសាងសុំណំរឿងចាត់ការបន្តតាមនីតិវិធីច្បាប់ ៕
