តាមចាប់ខ្លួនជនបំពុលសង្គម ដែលយករូបភាពសមត្ថកិច្ចអនុវត្តរឹតបន្តឹងច្បាប់ចរាចរណ៍ផ្លូវគោក ទៅកាត់ត សរសេរបំផ្លើស ខុសពីការពិត
ភ្នំពេញ៖ បន្ទាប់ពីបណ្តាញសង្គមហ្វេសប៊ុក បានយករូបថតរបស់នគរបាលដែលដាក់គោលដៅអនុវត្តច្បាប់ចរាចរណ៍ ទៅកាត់តក្នុងន័យបំភ័ន្តសាធារណជន មកនោះ ស្នងការដ្ឋាននគរបាលរាជធានីភ្នំពេញ សូមធ្វើការបដិសេធ និងថ្កោលទោសចំពោះ គណនីហ្វេសប៊ុក។
បើតាមសេចក្តីបដិសេធ និងបកស្រាយបំភ្លឺ របស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី៩ ខែឧសភា ឆ្នាំ២០២០នេះថា ស្នងការដ្ឋាននគរបាលរាជធានីភ្នំពេញ សូមធ្វើការបដិសេធ និងថ្កោលទោសចំពោះ គណនីហ្វេសប៊ុកចំនួន២ ដែលបានយករូបភាពសមត្ថកិច្ចអនុវត្តរឹតបន្តឹងច្បាប់ចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ យកទៅកាត់ត សរសេរបំផ្លើសខុសពីការពិតទាំងស្រុង ។
សមត្ថកិច្ចនៃស្នងការដ្ឋាននគរបាលរាជធានីភ្នំពេញ បាននិងកំពុងតែចាត់វិធានការតាមផ្លូវច្បាប់ ដើម្បីតាមចាប់ខ្លួនជនបំពុលសង្គមទាំងនោះ យកមកផ្តន្ទាទោសតាមច្បាប់ ។ សូមចូលរួមផ្សព្វផ្សាយតែព័ត៌មានពិត និងទប់ស្កាត់រាល់ព័ត៌មានមិនពិត ។
ចំណែកនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ
សូមធ្វើការបដិសេធទាំងស្រុង ចំពោះការចុះផ្សាយព័ត៌មាន ក្នុងបណ្តាញសង្គម ដែលបានសរសេរថា នគរបាលចរាចរណ៍ នឹងផ្អាកការត្រួតពិនិត្យឯកសារយានយន្ត។
នាយកដ្ឋាន សូមបញ្ជាក់ថា ព័ត៌មាននេះ គឺជាព័ត៌មានមិនពិត និងបំផ្លើស ដែលបានយកព័ត៌មានចាស់យកមកផ្សព្វផ្សាយ ពាក់ព័ន្ធនឹងនគរបាលចរាចរណ៍ នឹងផ្អាកការត្រួតពិនិត្យឯកសារយានយន្ត ដែលព័ត៌មាននេះ តាំងពីខែមករា ឆ្នាំ២០១៦ មកម្លេះ។
ដោយឡែកព័ត៌មានដែលសរសេរថា អគ្គស្នងការនគរបាលជាតិ ប្រកាសលើកពេលពិន័យឡាន ម៉ូតូ ដែលគ្មានប័ណ្ណបើកបរ ក៏ជាព័ត៌មានចាស់ តាំពីឆ្នាំ២០១៥ដែរ។
ដែលព័ត៌មានទាំងនេះ នាំឲ្យមានការយល់ច្រឡំ ចំពោះការរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោក។
នាយកដ្ឋាន សូមជម្រាបជូនសាធារណជនថា នគរបាលចរាចរណ៍ផ្លូវគោក គឺនៅបន្តរឹតបន្តឹងការអនុវត្តច្បាប់ ស្ដីពីចរាចរណ៍ផ្លូវគោកក្នុងក្របខ័ណ្ឌទូទាំងប្រទេសដដែល៕
