នគរបាលរឹតបន្តឹងច្បាប់ចរាចរណ៍ ឃាត់បុរស២នាក់ រក្សាទុកកាំភ្លើងAK១ដើមក្នុងរថយន្ត
ភ្នំពេញ : នគរបាលរឹតបន្តឹងនិងឆែកជាតិអាល់កុល លើអ្នកបើកបរយានយន្តប្រទះឃើញបុរស២នាក់ កម្លាំងនគរបាលចម្រុះឃាត់ ពេលបើករថយន្ត១គ្រឿង ឆែករកឃើញរក្សាទុកកាំភ្លើងម៉ាកAK ចំនួន១ដើម គ្មានលិខិតស្នាម នាយប់ថ្ងៃទី៩ ខែឧសភា ឆ្នាំ ២០២០ នៅចំណុចមុខក្លឹបហាត់ប្រាណភ្នំពេញស្ព័ត ផ្លូវ២៧១ សង្កាត់ទួលទំពួង ២ ខណ្ឌចំការមន ។
ជនសង្ស័យឈ្មោះ លី ហរអាង ភេទ ប្រុស អាយុ ២៥ឆ្នាំ មុខរបរ លក់ដូរ នៅផ្ទះលេខ៣៤០ ផ្លូវ B១២ សង្កាត់ទឹកថ្លា ខណ្ឌសែនសុខ ជាម្ចាស់រថយន្ត ឃាត់ខ្លួនរក្សាអាវុធម៉ាក AK ៤៧ ផលិតនៅប្រទេស សូវៀត នៅឆ្នាំ ១៩៦៥គ្មានលិខិតស្នាម និងគ្មានការអនុញ្ញាត។
នគរបាលបានឲ្យដឹងថា មុនកើតហេតុកម្លាំងចម្រុះសហការជាមួយកម្លាំងស្នងការ ដាក់គោលដៅរឹតបន្តឹងច្បាប់ចរាចរណ៍ និងឆែកជាតិអាល់កុលលើអ្នកបើកបរយានយាន្តលើផ្លូវសាធារណៈ ក្រោយមកក៏ឃាត់រថយន្តព្រូស១គ្រឿង ជិះគ្នា២នាក់ ហើយក៏ឆែករកឃើញកាំភ្លើងម៉ាកAK ១ដើម។ ក្រោយមក តាមការបំភ្លឺរបស់ឈ្មោះ លី ហរអាង បានប្រាប់ថា មានបងធម៌ខ្ញុំម្នាក់ឈ្មោះ ប៉េ ស៊ីណា ភេទប្រុស មុខរបរ យោធាម្នាក់ ឋានៈ វរសេនីយ៍ទោ បានឲ្យខ្ញុំយកអាវុធនេះ ទៅឲ្យគាត់នៅផ្ទះម្តុំសំណង់ ១២ ខ្ញុំបាទក៏បបួលប្អូនប្រុសរបស់ខ្ញុំ ទៅជាមួយបានជាគ្នា ចេញពីហ្គារ៉ាស់ជួសជុលរថយន្តនៅផ្លូវ ៣៧១ រួចបត់តាមផ្លូវ ២៧១ មកដល់ចំណុចភ្នំពេញស្ពតក្លឹប ត្រូវបានកម្លាំងសមត្ថកិច្ចត្រួតពិនិត្យ អាវុធជាតិផ្ទុះរកឃើញតែម្តង ។ បច្ចុប្បន្ន ជនសង្ស័យម្នាក់ ចំណែកប្អូនប្រុស មិនពាក់ព័ន្ធឲ្យត្រឡប់ទៅវិញ ដោយមានក្រុមគ្រួសារមកធានា ។ អ្នកបើករថយន្តបាននាំមកអធិការខណ្ឌចំការមន ដើម្បីធ្វើការសាកសួរបន្ត ។ សម្ភារដកហូត អាវុធវែង ១ដើម ម៉ាក AK 47 ផលិតនៅប្រទេស សូវៀត នៅឆ្នាំ 1965 លេខអាវុធ CT1528 និងរថយន្ត ១គ្រឿងម៉ាក ព្រូស ពណ៌ខ្មៅ ផ្លាកលេខ ២BB-០៧១៥ និងកសាងសំណុំរឿងបញ្ជូន ទៅកាន់តុលាការ ៕
