រថយន្ត ហាយឡែនដឺ បើកបុករះម៉ូតូ៣គ្រឿង បណ្តាលឲ្យស្លាប់មនុស្សម្នាក់ និង របួសធ្ងន់ស្រាល២នាក់

បន្ទាយមានជ័យ ៖ យ៉ាងហោចណាស់មានមនុស្សម្នាក់បានស្លាប់ និង២នាក់ផ្សេងទៀតរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរ រវាងរថយន្តហាយឡែនដឺ បើកបុកម៉ូតូ៣គ្រឿងទាំងកំរោល កាលពីយប់ថ្ងៃទី០៩ ខែឧសភា ឆ្នាំ២០២០ នៅលើកំណាត់ផ្លូវជាតិលេខ៥៦A ត្រង់ចំណុចមុខសាលាបឋមសិក្សាកកោះ​ ស្ថិតក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

នគរបាលបានឲ្យដឹងថា ករណីនេះ បង្កដោយរថយន្តហាយឡែនដឺ ១គ្រឿងពណ៌ទឹកប្រាក់ ពាក់ស្លាកលេខភ្នំពេញ 2K.5821 បើកបរក្នុងល្បឿនលឿន (តៃកុងរត់គេចខ្លួនបាត់) លុះដល់ចំណុចកើតហេតុក៏ទៅបុកម៉ូតូ ៣គ្រឿង ដែលកំពុងធ្វើដំណើរតាមផ្លូវបណ្តាលឲ្យអ្នកបើកម៉ូតូ Honda Winner ពណ៌ក្រហម គ្មានស្លាកលេខ ឈ្មោះ ហ៊ាង សិទ្ធិ ភេទប្រុស អាយុ១៧ ឆ្នាំ ស្លាប់នៅកន្លែងកើតហេតុ និងអ្នកបើកម៉ូតូ Yamaha Exciter ពណ៌ស ពាក់ស្លាកលេខបន្ទាមានជ័យ 1S-3699 ឈ្មោះ ឈាន ជាង ភេទប្រុស អាយុ ១៧ឆ្នាំ រងរបួសស្រាល និងអ្នកបើកម៉ូតូ Honda Dream ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ឧត្តរមានជ័យ 1C-5277 ឈ្មោះ អឿន សំនាង ភេទស្រី អាយុ៣៥ឆ្នាំ របួសបាក់ដៃខាងឆ្វេង ត្រូវបានបញ្ជូនទៅព្យាបាលនៅមន្ទីរពេទ្យបង្អែកកម្ពុជាជប៉ុនស្រុកមង្គលបូរី ។

ករណីនេះ សមត្ថកិច្ចសន្និដ្ឋានថា បណ្តាលមកពីអ្នកបើករថយន្ត បើកវ៉ាជែងក្នុងស្ថានភាពគ្រោះថ្នាក់ ។ ក្រោយហេតុការណ៍សពជនរងគ្រោះ ត្រូវបានសមត្ថកិច្ច ប្រគល់ជូន ក្រុមគ្រួសារ យកទៅធ្វើបុណ្យតាមប្រពៃណី ចំណែក វត្ថុតាងរថយន្ត និង ម៉ូតូ ត្រូវបានសមត្ថកិច្ចយកទៅរក្សាទុកដើម្បីដោះស្រាយតាមនីតិវិធីច្បាប់ ៕