បងប្អូនប្រជាពលរដ្ឋទាំងអស់ បង្កើន និងបន្តការយកចិត្តទុកដាក់ប្រកបដោយការទទួលខុសត្រូវនិងការប្រុងប្រយ័ត្នខ្ពស់បំផុត ចំពោះស្ថានភាពជំងឺ COVID-19 នៅក្នុងប្រទេសកម្ពុជា
ភ្នំពេញ៖ ក្រសួងសុខាភិបាល បានធ្វើសន្និសីទសារព័ត៌មាន ស្ដីពីបច្ចុប្បន្នភាពជំងឺ COVID-19 នៅក្នុងប្រទេសកម្ពុជា នៅព្រឹកថ្ងៃទី១១ ខែឧសភា ឆ្នាំ២០២០ នាបរិវេណទីស្តីការក្រសួង ស្ថិតនៅក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដែលជាប្រធានសន្និសីទនេះ បានក្រើនរំលឹកថា យើងទាំងអស់គ្នា ត្រូវតែបន្តរក្សាកុំឲ្យមានការចម្លងជំងឺកូវីដ១៩ នៅក្នុងប្រទេសកម្ពុជា ហើយសូមបងប្អូនប្រជាពលរដ្ឋទាំងអស់ បង្កើន និងបន្តការយកចិត្តទុកដាក់ប្រកបដោយការទទួលខុសត្រូវនិងការប្រុងប្រយ័ត្នខ្ពស់បំផុត។
ឯកឧត្តមរដ្ឋមន្ត្រី បានស្នើដល់ពលរដ្ឋទាំងអស់ មិនត្រូវភ្លេចខ្លួនចំពោះលទ្ធផលដែលអាចកើតមានឡើងនូវរលក ទី២ នៃការចម្លងវីរុសកូវីដ១៩ នេះឲ្យសោះ ដោយត្រូវ ខិតខំបន្តអនុវត្តវិធានការការពារខ្លួន គ្រប់បែបយ៉ាងទាំងអស់ តាមការណែនាំនានា ដែលបានដាក់ចេញដោយប្រមុខរាជរដ្ឋាភិបាល និងដោយក្រសួងសុខាភិបាល។ លើសពីនេះ សូមបងប្អូនប្រជាពលរដ្ឋទាំងអស់ ត្រូវចេះផ្លាស់ប្តូរឥរិយាបថ និងទម្លាប់របស់ខ្លួន យើងត្រូវខិតខំប្រឹងប្រែងរៀបចំការរស់នៅ គន្លងថ្មីនៃជីវភាពធម្មតារបស់ខ្លួន ដោយមិនភ្លេចការធ្វើអនាម័យដៃស្អាត ប្រើប្រាស់ម៉ាស (ក្នុងករណីចាំបាច់) ឬក្រមា ឬកន្សែងដៃខ្ទប់មាត់ និងច្រមុះ នៅពេលក្អក កណ្តាស់ បរិភោគចំណីអាហារឆ្អិនល្អ ចៀសវាងនៅកន្លែងប្រមូលផ្តុំច្រើនគ្នា រក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល នៅតាមកន្លែងប្រមូលផ្តុំ និងនៅតាមភោជនីយដ្ឋាន អាហារដ្ឋាន ឬហាងនានា ហើយប្រសិនបើមានករណីសង្ស័យ ត្រូវរាយការណ៍ទៅលេខ១១៥ ជាបន្ទាន់។
បើតាមឯកឧត្តមសាស្ត្រាចារ្យ បានបញ្ជាក់ថា ចំនួសរុបវត្ថុសំណាកដែលបានធ្វើវិភាគ ទាំងអស់មានចំនួន ១៤.០៩៤សំណាក់សម្រាប់ទូទាំងប្រទេស (គិតចាប់តាំងពីខែមករា ឆ្នាំ២០២០ មកដល់ថ្ងៃទី១០ខែឧសភា ឆ្នាំ២០២០) ដែលក្នុងចំណោមប្រជាជនមួយលាននាក់ កម្ពុជាបានធ្វើវិភាគបានចំនួន ៨៦៧ សំណាក ដែលជាចំនួនច្រើនជាងបណ្តាលប្រទេសមួយចំនួននៅក្នុងតំបន់អាស៊ានយើងនេះ។
ពាក់ព័ន្ធនឹងវិធានការចត្តាឡីស័កសម្រាប់អ្នកដំណើរចូលមកកម្ពុជា ត្រូវឯកឧត្តម ម៉ម ប៊ុនហេង បានលើកឡើងថា តាមស្ថានភាពនៃការឆ្លងវីរុសកូវីដ១៩ កន្លងមកនេះ ភាគច្រើននៃករណីដែលបានរកឃើញថាមានវីរុសនេះ សុទ្ធតែជាករណីដែលនាំចូលមកពីក្រៅប្រទេស ដែលយើងត្រូវបន្តការយកចិត្តទុកដាក់លើវិធានការរឹតបន្តឹងការធ្វើដំណើរ មកពីប្រទេសដែលមានការឆ្លងច្រើន ដូចជា ប្រទេសអាមេរិក អ៊ីតាលី អាល្លឺម៉ង់ អេស្ប៉ាញ បារាំង និងអ៊ីរ៉ង់ ហើយការរឹតបន្តឹងនេះ បានពន្យារសុពលភាពរហូតដល់ស្ថានភាពនាំការឆ្លងវីរុសនេះ មានការធូរស្រាលដោយមានការវាយតម្លៃរួមគ្នាជាមួយអង្គការសុខភាពពិភពលោក។ សូមបងប្អូនប្រជាពលរដ្ឋទាំងអស់ ចូលរួមអនុវត្តវិធានការចត្តាឡីស័ក ចំនួន១៤ថ្ងៃនេះ ឲ្យបានខ្ជាប់ខ្លួន ដើម្បីចូលរួមចំណែកការពារកុំឲ្យមានការចម្លងវីរុសកូវីដ១៩ មកក្នុងប្រទេសកម្ពុជា និងសូមអាជ្ញាធរពាក់ព័ន្ធ សហការបន្តអនុវត្តការតាមដានអ្នកដំណើរចូលមកក្នុងប្រទេស និងអនុវត្តការធ្វើចត្តាឡីស័កនេះ ឲ្យមានប្រសិទ្ធភាព។
ក្រសួងសុខាភិបាលកម្ពុជា សូមធ្វើការកត់សម្គាល់ថា មកដល់ពេលនេះ ស្ថានភាពជំងឺកូវីដ១៩ នៅលើពិភពលោក នៅតែមានការកើនឡើង និងនៅតែមានរកឃើញករណីវិជ្ជមានកូវីដ១៩ ថ្មី បន្ថែមទៀត ដែលធ្វើឲ្យចំនួនអ្នកមានវីរុសកូវីដ១៩ បានកើនឡើងរហូតដល់ ៣.៨៥៥.៧៨៨នាក់ បើធៀបទៅនឹងសប្តាហ៍មុនដែលមាន៣.២៦៧.១៨៤នាក់ នោះ គឺមានការកើនចំនួនដល់ ៥៨៨.៦០៤នាក់ និងមានអ្នកស្លាប់ចំនួន ២៦៥.៨៦២នាក់ ដែលក្នុងសប្តាហ៍មុនមានចំនួន ២២៩.៩៧១នាក់ គឺកើនចំនួនអ្នកស្លាប់ដល់ទៅ៣៥.៨៩១នាក់ គ្រាន់តែមួយសប្តាហ៍កន្លងទៅ នេះបើយោងតាមរបាយការណ៍របស់អង្គការសុខភាពពិភពលោក ចេញផ្សាយនៅថ្ងៃទី៩ខែឧសភាឆ្នាំ២០២០។ នេះបានបញ្ជាក់ថា ការចម្លងវីរុសកូវីដ១៩នេះ នៅតែសកម្មខ្លាំងក្លានៅឡើយ ដែលយើងទាំងអស់គ្នាត្រូវយល់ថា យើងកំពុងតែបន្តធ្វើសង្គ្រាមជាមួយសត្រូវកូវីដ១៩នេះមិនទាន់ចប់នៅឡើយទេ។ សម្រាប់ប្រទេសកម្ពុជា ត្រូវរយៈពេលជិតមួយខែកន្លងមកនេះ មិនមានរកឃើញអ្នកឆ្លងរីវុសកូវីដ១៩ ហើយអ្នកព្យាបាលជាសះស្បើយក៏បានកើនដល់ជិត១០០ភាគរយ និងមិនមានស្លាប់នោះឡើយ។ លទ្ធផលល្អប្រសើរនេះជាការបង្ហាញថា អន្តរាគមន៍បុរសសកម្ម និងបទបញ្ជានានា ត្រូវបានអនុវត្តបានទាន់ពេលវេលា ដែលអាចឲ្យទប់ស្កាត់បាននូវការចម្លងចូលក្នុងសហគមន៍ ក្រោមការយកចិត្តទុកដាក់ខ្ពស់បំផុតលើសុខភាព ប្រជាពលរដ្ឋកម្ពុជា ព្រមទាំងការដឹកនាំប្រកបដោយភាពឈ្លាសវៃ និងប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា៕
