បុរសម្នាក់មកជួលសណ្ឋាគារឡាក់គីស្ដារ២ដេក ដោយមិនឲ្យអត្តសញ្ញាណបណ្ណ ទៅម្ចាស់សណ្ឋាគារ ស្រាប់តែលោតសម្លាប់ខ្លួន
ភ្នំពេញ ៖ បុរសម្នាក់បានលោតសម្លាប់ខ្លួនដោយមិនដឹងមូលហេតុ បន្ទាប់ពី បានមកជួលបន្ទប់លេខ៧០៩ ជាន់ទី៧ នៃសណ្ឋាគារឡាក់គីស្ដារ២ ស្នាក់នៅមួយយប់តម្លៃ១៨$ (ដប់ប្រាំបីដុល្លារសហរដ្ឋអាមេរិក) រួចហើយក៏ជួលឲ្យភ្ញៀវនោះ សំរាកទៅ ដោយខាងអ្នកគិតលុយមិនបាន យកអត្តសញ្ញាណសម្គាល់របស់ភ្ញៀវនោះទេ ។ នេះបើតាមការបំភ្លឺរបស់ឈ្មោះ ថុក ថារី ភេទស្រី អាយុ២៧ឆ្នាំ ជនជាតិខ្មែរ មុខរបរ ជាអ្នកគ្រប់គ្រងផ្នែកសំអាត ។
ករណីអត្តឃាតលោតពីលើសណ្ឋាគារជាន់ទី៧ សំលាប់ខ្លួន បានកើតឡើងនៅក្នុងមូលដ្ឋាន សង្កាត់ផ្សារដើមគរ ខណ្ឌទួលគោក រាជធានីភ្នំពេញ កាលពីថ្ងៃទី១០ ខែឧសភា ឆ្នាំ២០២០ វេលាម៉ោងប្រហែល ២៣និង០០នាទី មាន នៅចំណុចបន្ទប់លេខ៧០៩ ជាន់ទី៧ នៃសណ្ឋាគារឡាក់គីស្ដារ២ ដែលមានទីតាំងដីឡូត៍លេខ ផ្លូវលេខ៣៣៦ ក្រុមទី២០ ភូមិ៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
តាមរបាយការណ៍បានឲ្យដឹងថា ជនរងគ្រោះមិនស្គាល់អត្តសញ្ញាណ ភេទប្រុស អាយុប្រហែល ២៨ទៅ៣០ឆ្នាំ ជនជាតិខ្មែរ មានភិនភាគ: សម្បុររសល្មម , សក់ស្លូតវែង , ពាក់អាវសាច់ក្រណាត់ពណ៌ទឹកក្រូចដៃខ្លី , ស្លៀកខោខូវប៊យពណ៌ទឹកប៊ិច និងពាក់ស្បែកជើងប៉ាត់តា ពណ៌ស ។
តាមដំណើររឿងហេតុ ៖ តាមការបំភ្លឺរបស់ឈ្មោះ ថុក ថារី ភេទស្រី អាយុ២៧ឆ្នាំ ជនជាតិខ្មែរ មុខរបរ ជាអ្នកគ្រប់គ្រងផ្នែកសំអាត បន្ទប់បានអះអាងថា ៖ នៅថ្ងៃទី១០ ខែឧសភា ឆ្នាំ២០២០ វេលាម៉ោងប្រហែល១៥និង៤០នាទី ខ្លួនកំពុងធ្វើការ ស្រាប់តែបុគ្គលិកផ្នែកគិតលុយបានឆាតមកប្រាប់ខ្លួនថា មានភ្ញៀវប្រុសម្នាក់អាយុប្រហែល២៨ទៅ៣០ឆ្នាំ ជនជាតិខ្មែរ បានមកជួលបន្ទប់លេខ៧០៩ ជាន់ទី៧ នៃសណ្ឋាគារឡាក់គីស្ដារ២ ស្នាក់នៅមួយយប់តម្លៃ១៨$ (ដប់ប្រាំបីដុល្លារសហរដ្ឋអាមេរិច) រួចហើយក៏ជួលឲ្យភ្ញៀវនោះ សំរាកទៅ ដោយខាងអ្នកគិតលុយមិនបាន យកអត្តសញ្ញាណសម្គាល់របស់ភ្ញៀវនោះទេ រហូតដល់ម៉ោងប្រហែល ២២និង១៥នាទីថ្ងៃដដែល អ្នកគិតលុយបានឆាតមកប្រាប់ខ្លួនថា ភ្ញៀវបន្ទប់លេខ៧០៩ បានលោតពីលើបន្ទប់ជាន់ទី៧ ធ្លាក់មកខាងក្រោមរបួសធ្ងន់ ត្រូវបានដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត លុះមកដល់ម៉ោងប្រហែល២និង០០នាទីរំលងអាធ្រាត្រ ជនរងគ្រោះខាងលើបានស្លាប់បាត់ហើយ ។
បច្ចុប្បន្ន សាសពជនរងគ្រោះកំពុងតម្កល់ទុកនៅក្នុងមន្ទីរពេទ្យកាល់ម៉ែត រង់ចាំការិយាល័យជំនាញ និងគ្រូពេទ្យកោសល្យវិច័យមកពិនិត្យ និងក្រុមគ្រួសារមក ទទួលយកទៅធ្វើបុណ្យតាមប្រពៃណី ៕