មុខសញ្ញាជួញដូរ និងប្រើប្រាស់គ្រឿងញៀនខុសច្បាប់ចំនួន ៥ នាក់ ត្រូវបានសមត្ថកិច្ចឃាត់ខ្លួន
កោះកុង ៖ ស្នងការដ្ឋាននគរបាលខេត្តកោះកុង នៅថ្ងៃទី១២ខែឧសភា ឆ្នាំ២០២០ បានបញ្ជូនមុខសញ្ញាសង្ស័យ ចំនួន ៥ នាក់ ពាក់ព័ន្ធនឹងករណីជួញដូរ និងប្រើប្រាស់គ្រឿងញៀនខុសច្បាប់ ទៅសាលាដំបូងខេត្ត ចាត់ការតាមនីតិវិធីច្បាប់។
សូមបញ្ជាក់ថា កាលពីថ្ងៃទី ៨ ខែឧសភា ឆ្នាំ២០២០ កម្លាំងអធិការដ្ឋាននគរបាលស្រុកមណ្ឌលសីមា បង្ក្រាបមុខសញ្ញារក្សាទុក ជួញដូរ និងប្រើប្រាស់គ្រឿងញៀន ១ លើក នៅចំណុចភូមិនាងកុក ឃុំប៉ាក់ខ្លង ស្រុកមណ្ឌលសីមា ឃាត់ខ្លួនបានជនសង្ស័យ ១ នាក់ (ប្រុស) ដកហូតមេតំហ្វេតាម៉ីន ICE ឬម៉ាទឹកកក ៣ កញ្ចប់ និង ៩ កំណាត់ទុយោបំពង់បឺត ស្មើនឹង ៦,២៦ ក្រាម ។
ក្រោយពីធ្វើការសាកសួរ ក៏ឈានដល់ឃាត់ខ្លួន មុខសញ្ញាសង្ស័យបានចំនួន ៤ នាក់ (ស្រី ១ នាក់) បន្ថែមទៀត កាលពីល្ងាច ថ្ងៃទី៩ ខែឧសភា ឆ្នាំ២០២០ នៅចំណុចព្រែកទី១ ភូមិ២ ឃុំពាមក្រសោប ស្រុកមណ្ឌលសីមា ដកហូតមេតំហ្វេតាម៉ីន ICE ឬម៉ាទឹកកក ៦ កញ្ចប់ធំ ស្មើនឹង ១៩៥,៣៤ក្រាម និងអាវុធកែច្នៃ ១ ដើមរួមនឹងរំសេវ ២ ដប កាំបិត ពូថៅ និងឧបករណ៍វិចខ្ចប់ចែកចាយ និងសម្រាប់ប្រើប្រាស់គ្រឿងញៀនមួយចំនួន ។បច្ចុប្បន្ន មុខសញ្ញាសង្ស័យ បានបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់ ៕
