រឿងប៉ូលិសស៊ីគ្រឿងឡាន ឥឡូវជួបហើយ ! ស្នងការ បញ្ជាឲ្យអធិការដ្ឋាននគរបាលស្រុកអង្គស្នួល ដោះស្រាយជាមួយម្ចាស់រថយន្ត រឿងស៊ីគ្រឿងរថយន្តកាមរីបាឡែន
កណ្តាល៖ ស្នងការដ្ឋាននគរបាលខេត្តកណ្តាល បានបញ្ជាក់ថា សូមសាធារណជនមេត្តាជ្រាប ពាក់ព័ន្ធជាមួយករណីរថយន្ត
បាឡែន (ពណ៌ស) ដែលជួបគ្រោះថ្នាក់ចរាចរណ៍ ហើយត្រូវបានរក្សាទុកនៅអធិការដ្ឋាននគរបាលស្រុកអង្គស្នួល
ហើយបានបាត់សម្ភារមួយចំនួន ដូចជា ធុងទឹក ម៉ាញ៉េ ចង្កៀងមុខមួយគូរ។
ឯកឧត្តម ឈឿន សុចិត្ត ស្នងការនគរបាលខេត្តកណ្តាល បានបញ្ជាក់ថា “បញ្ហាខាងលើនេះ អង្គភាពអធិការដ្ឋាននគរបាលស្រុកអង្គស្នួល
ទទួលស្គាល់កំហុស លើកង្វះខាតនៃការគ្រប់គ្រង។ ចំណែក សម្ភារមួយចំនួន ដែលបាត់បង់ អធិការដ្ឋាននគរបាលស្រុកអង្គស្នួល
នឹងដោះស្រាយជាមួយម្ចាស់រថយន្ត”។
បុរសម្នាក់ជាម្ចាស់រថយន្ត បានសរសេរសារលើហ្វេសប៊ុក Hok Tanghong នៅព្រឹកថ្ងៃទី ១៣ ខែ ឧសភា ឆ្នាំ ២០២០ ថា
“នេះហើយឡានខ្ញុំ ដែលបានរក្សាទុកនៅ ក្នុងអធិការនគរបាលស្រុកអង្គស្នួល ខេត្តកណ្តាល ហើយពេលមកគ្រឿងពេញ
ដល់ពេលមកដកឡានវិញស៊ីគ្រឿងអស់សុំខ្លាច ហើយលោកប៉ូលិសអើយធ្លាប់តែឮគេថា ឥឡូវជួបផ្ទាល់ខ្លួនឯងបានដឹង”។
បន្ទាប់ពីម្ចាស់រថយន្ត បានបង្ហោះអំពីការបាត់បង់គ្រឿងរថយន្តស្ទើរតែអស់ ខណៈរក្សាទុកនៅអធិការដ្ឋាននគរបាលស្រុក អង្គស្នួល
មហាជនរិះគន់ខ្លាំងទៅលើមន្រ្តីនគរបាលស្រុកអង្គស្នួល៕
