ឃាត់ខ្លួនបុរសម្នាក់ករណីរំលោភសេពសន្ថវៈលើអនីតិជន
ពោធិ៍សាត់ ៖ សមត្ថកិច្ចនគរបាលស្រុកភ្នំក្រវាញ បានឃាត់ខ្លួនជនសង្ស័យម្នាក់ ឈ្មោះ ធី ចាន់ធាង ភេទប្រុស អាយុ ១៩ ឆ្នាំ រស់នៅភូមិអូរទង សង្កាត់ចំរើនផល ក្រុងពោធិ៍សាត់ ពីបទរំលោភសេពសន្ថវៈលើអនីតិជន(ក្មេងស្រីអាយុក្រោម១៥ឆ្នាំ) តាមបណ្តឹងតាមរបស់ក្រុមគ្រួសារជនរងគ្រោះ ។
សមត្ថកិច្ចនគរបាលមូលដ្ឋានបានឲ្យដឹងថា ជនសង្ស័យបានធ្វើសកម្មភាពចាប់រំលោភក្មេងស្រី ឈ្មោះ រ ស.ប.ញ អាយុ១៣ឆ្នាំ រស់នៅភូមិអូរបាក់ត្រា ឃុំព្រងិល ស្រុកភ្នំក្រវាញ ខេត្តពោធិ៍សាត់ កាលពីថ្ងៃទី១២ ខែឧសភា ឆ្នាំ២០២០ វេលាម៉ោង១៩និង៣០នាទី លើកំណាត់ផ្លូវជាតិលេខ២ ហើយត្រូវបានសមត្ថកិច្ចឃាត់ខ្លួននៅថ្ងៃទី១៣ ឧសភា២០២០ វេលាម៉ោង១១និង៥៥នាទីព្រឹក ។
សមត្ថកិច្ចនគរបាលបានបន្តថា តាមការឲ្យដឹងពីឪពុកជនរងគ្រោះឈ្មោះ រឿន សារីម បានឲ្យដឹងថា ដោយតែមានការសង្ស័យរបស់គាត់ ទៅលើជនសង្ស័យ គាត់ក៏ឃ្លាំមើលគ្រប់សកម្មភាពដែលជនសង្ស័យបានទាក់ជាមួយកូនរបស់គាត់ ។ រហូតមកដល់យប់កើតហេតុ គាត់តាមទាន់ឃើញសកម្មភាពដែលជនសង្ស័យបានប្រព្រឹត្តក្នុងហេតុការណ៍នេះ ហើយចាប់ឃាត់ខ្លួនជនសង្ស័យប្រគល់ឲ្យសមត្ថកិច្ចយកមកធ្វើការសួរនាំនៅអធិការដ្ឋាននគរបាលស្រុកភ្នំក្រវាញ ។
បច្ចុប្បន្ន ជនសង្ស័យត្រូវបានសមត្ថកិច្ចធ្វើការឃាត់ខ្លួន ដើម្បីកសាងសំណុំរឿងអនុវត្តបន្តតាមនីតិវិធី ៕