អតីតរដ្ឋមន្ត្រីក្រសួងធម្មការ និងសាសនា ឯកឧត្តមហ៊ឹម ឆែម ទទួលមរណភាព ក្នុងជន្មាយុ ៨២ឆ្នាំ
ភ្នំពេញ៖ ឯកឧត្តម ហ៊ឹម ឆែម អតីតរដ្ឋមន្ត្រីក្រសួងធម្មការ និងសាសនា ទទួលមរណភាព នៅថ្ងៃសៅរ៍ ទី១៦ ខែឧសភា ឆ្នាំ២០២០នេះ ក្នុងជន្មាយុ ៨២ឆ្នាំ ដោយរោគាពាធ។
អគ្គាធិការដ្ឋានពុទ្ធិកសិក្សាជាតិ នៃក្រសួងធម្មការ និងសាសនា បានផ្សព្វផ្សាយសាររំលែកចំពោះការទទួលមរណភាព របស់អតីតរដ្ឋមន្ត្រីក្រសួងធម្មការ និង សាសនានៅព្រឹកថ្ងៃសៅរ៍ ទី១៦ឧសភានេះ។ សាររំលែកទុក្ខ៖ “សូមចូលរួមសោកស្តាយ សង្វេគ តក់ស្លុត ជាទីបំផុត និងរំលែកនូវសេចក្តីទុក្ខដ៏ក្រៀមក្រំ ជាមួយនឹងក្រុមគ្រួសារនៃសព ចំពោះការបាត់បង់ ឯកឧត្ដម ទេសរដ្ឋមន្ត្រី ហ៊ឹម ឆែម រដ្ឋមន្ត្រីទទួលបន្ទុកបេសកកម្មពិសេស ដែលបានទទួលមរណភាព នាព្រឹកថ្ងៃសៅរ៍ ១០រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែឧសភា ឆ្នាំ២០២០ ដោយជរាពាធ”។
សពរបស់លោក ហ៊ឹម ឆែម កំពុងតម្កល់ធ្វើបុណ្យតាមប្រពៃណី នៅគេហដ្ឋានក្នុងបុរីប៉េងហួត បឹងស្នោខណ្ឌច្បារអំពៅ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី១៦ ខែឧសភា ឆ្នាំ២០២០នេះ បានផ្ញើសារលិខិតចូលរួមរំលែកមរណទុក្ខ ជូនលោកស្រី សួស ណារ៉ា ហ៊ឹមឆែម ចំពោះមរណភាពទេសរដ្ឋមន្ត្រី ហ៊ឹម ឆែម ទទួលបន្ទុកបេសកកម្មពិសេស និងជាអតីតរដ្ឋមន្ត្រីក្រសួងធម្មការ និង សាសនា។
ក្នុងសារលិខិតរបស់សម្តេចតេជោ ហ៊ុន សែន បានលើកឡើងយ៉ាងដូច្នេះថា “ខ្ញុំ និងភរិយា មានក្ដីខ្សឹកខ្សួលរំជួលចិត្តឥតឧបមា ដោយបានទទួលដំណឹងថា ឯកឧត្តម ទេសរដ្ឋមន្ត្រី ហ៊ឹម ឆែម ទទួលបន្ទុកបេសកកម្មពិសេស និងជាអតីតរដ្ឋមន្ត្រីក្រសួងធម្មការ និងសាសនា ទទួលមរណភាពនៅថ្ងៃសៅរ៍ ១០រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹង ថ្ងៃទី១៦ ខែឧសភា ឆ្នាំ២០២០ វេលាម៉ោង ១០:៥៥ នាទីព្រឹក ក្នុងជន្មាយុ ៨២ ឆ្នាំ ដោយរោគាពាធ”។
ក្នុងឱកាសប្រកបដោយសមានទុក្ខនេះ ខ្ញុំ និងភរិយា សូមសម្ដែងនូវការសោកស្ដាយ ស្រណោះ អាឡោះអាល័យ សង្វេគស្ទើររកទីបំផុតគ្មាន ព្រោះថា ការបាត់បង់ ឯកឧត្តមទេសរដ្ឋមន្ត្រី ហ៊ឹម ឆែម គឺជាការបាត់បង់នូវស្វាមី ប្រកបដោយសង្គហធម៌ដ៏ល្អ និងជាការបាត់បង់ឪពុក ជីតា ប្រកបដោយ ព្រហ្មវិហារធម៌មិនចេះរីងស្ងួត ព្រមទាំងការបាត់បង់នូវវីរកុលបុត្រខ្មែរដ៏ឆ្នើមមួយរូប ដែលពោរពេញ ដោយឆន្ទៈ មនសិកាក្នុងការបម្រើបុព្វហេតុ ជាតិ សាសនា ព្រះមហាក្សត្រ គ្រប់កាលៈទេសៈ ពិសេសបានរួមចំណែកយ៉ាងសកម្ម ក្នុងការលើកស្ទួយតម្លៃវប្បធម៌ ព្រះពុទ្ធសាសនា ប្រកបដោយ ស្មារតីទទួលខុសត្រូវខ្ពស់។ ខ្ញុំ និងភរិយាសូមឧទ្ទិសបួងសួង ដល់ដួងវិញ្ញាណក្ខន្ធសព ឯកឧត្តមទេសរដ្ឋមន្ត្រី ហ៊ឹម ឆែម សូមឆាប់បានចាប់កំណើតកើត ក្នុងសុគតិភពគ្រប់ៗជាតិ កុំបីឃ្លៀងឃ្លាតក្លាយជាបការដទៃឡើយ៕
