ត្រាក់ទ័រកាយដីមួយគ្រឿង បានបើកជាន់មីនតោន កប់ក្នុងដីហើយបានផ្ទុះឡើងបណ្តាលឱ្យអ្នកបើកបររងរបួស
ខេត្តព្រះវិហារ៖ អាជ្ញាធរមីន បានឲ្យដឹងថា ព្រឹកថ្ងៃទី១៧ ខែឧសភា ឆ្នាំ២០២០ វេលាម៉ោង០៦និង១០នាទី មានករណីផ្ទុះមីនតោន នៅភូមិអន្ទិល ឃុំយាង ស្រុកជាំក្សាន្ត ខេត្តព្រះវិហារ ហេតុការណ៍នេះកើតឡើងដោយសារត្រាក់ទ័រកាយដីមួយគ្រឿងបានបើកជាន់មីនតោនកប់ក្នុងដីហើយបានផ្ទុះឡើងបណ្តាលឱ្យអ្នកបើកបររងរបួស និងខូតខាតត្រាក់ទ័រមួយគ្រឿង។
ជនរងគ្រោះត្រូវបានសមាជិកសហគមន៍បញ្ជូនទៅព្យាបាលនៅមណ្ឌលសុខភាពឃុំយាង។
មីន និងគ្រាប់មិនទាន់ផ្ទុះ នៅតែបង្កអោយប្រជាពលរដ្ឋយើង ធ្លាក់ខ្លួនពិការ របួស និងស្លាប់ និងជាឧបសគ្គដល់ការអភិវឌ្ឍប្រទេសជាតិ។
អាជ្ញាធរមីន សូមអំពាវនាវដល់បងប្អូនប្រជាពលរដ្ឋទាំងអស់កុំចូលទៅតំបន់ណាដែលមិនច្បាស់លាស់ ឫមានការសង្ស័យថាមានមីន និងគ្រាប់មិនទាន់ផ្ទុះ ត្រូវសាកសួរព័ត៍មានពីមេភូមិ មេឃុំ និងអាជ្ញាធរមានសមត្ថកិច្ចមុននឹងសំរេចចិត្តចូលទៅតំបន់នោះ។
លោកហេង រតនា អគ្គនាយកស៊ីម៉ាក់ បានឲ្យដឹងតាមរយៈហ្វេសប៊ុក ថា ពិតជាមានការសោកស្តាយខ្លាំងបំផុត ដែលឃេីញប្រជាកសិករបានទទួលរងគ្រោះថ្នាក់ដោយសារគ្រាប់មីននិងគ្រាប់សំណល់ពីសង្គ្រាមនៅលេីដីស្រែចំការខ្លួនឯង! ដោយសារពួកគាត់បានខិតខំកសាងសេដ្ឋកិច្ចគ្រួសារឡេីងវិញក្រោយសង្គ្រាមបានបញ្ចប់ រហូតគ្រួសារកសិករខ្លះមានត្រាក់ទ័រថ្មី ឬគោយន្តថ្មីៗ តែបែរជាមានគ្រោះថ្នាក់ដោយសារគ្រាប់មីននិងសំណល់ជាតិផ្ទុះលេីដីស្រែចំការខ្លួនឯង! មានគ្រោះថ្នាក់ខ្លះលេីដីស្រែចំការដែលបានប្រេីប្រាស់ជាច្រេីនឆ្នាំហេីយជាង១០-២០ឆ្នាំក៏មាន ឬ៤-៥ឆ្នាំក៏មាន។ សោកវិនាសកម្មបែបនេះ បានបង្កឱ្យរបួស ស្លាប់ និងខាតបង់ទ្រព្យសម្បតិ្ត ព្រមទាំងក្លាយជាបច្ច័យបង្កឱ្យគ្រួសារកសិករទាំងនោះ ធ្លាក់ខ្លួនក្រីក្រជាថ្មី!
សូមអំពាវនាវដល់អ្នកប្រេីប្រាស់ដីធ្លីដែលដឹងថាជាអតីតសមភូមិ និងតំបន់គ្រាប់មីន មានព័ត៌មាននិងមានភស្តុតាងទាក់ទងនឹងសំណល់ជាតិផ្ទុះពីសង្គ្រាម! សូមរាយការណ៍ ជូនប្រធានភូមិ ឬក្រុមប្រឹក្សាឃុំ ឬប៉ូលិសប៉ុស្តិ៍ ឬមន្ត្រីអង្គភាពសុីម៉ាក់ ដេីម្បីទទួលបានសេវាពិគ្រោះយោបល់ និងការបោសសម្អាតសំណល់ពីសង្គ្រាម! ចៀសវាងប្រថុយប្រថាននឹងគ្រោះថ្នាក់កេីតឡេីងចំពោះខ្លួនឯង សមាជិកគ្រួសារ ឬអ្នកដទៃលេីដីស្រែចំការទាំងឡាយនោះ៕
