អនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ឆ្នាំ២០១៩ ក្រសួងសេដ្ឋកិច្ច ប្រមូលចំណូលបាន ២៧.១៥៩ ប៊ីលានរៀល
ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានប្រកាសថា វឌ្ឍនភាពប្រចាំឆ្នាំ២០១៩ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ សម្រេចបានល្អប្រសើរដោយ ប្រមូលចំណូល សម្រេចបាន ១២៨,២ភាគរយ នៃច្បាប់ថវិកាឆ្នាំ២០១៩ ឬស្មើនឹង ២៧.១៥៩ ប៊ីលានរៀល និងចំណាយថវិកាជាតិ សម្រេចបាន ៩៥,៤ភាគរយ ឬស្មើ១៩.៧៥១ ប៊ីលានរៀល (ទិន្នន័យបណ្ដោះអាសន្ន)។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ បានដឹកនាំកិច្ចប្រជុំគណៈកម្មការកែទម្រង់ការគ្រប់គ្រងហិរញ្ញវត្ថុសាធារណៈ តាមរយៈប្រព័ន្ធវីឌីអូ ដោយប្រើប្រាស់ប្រព័ន្ធ Intranet របស់ក្រសួងសេដ្ឋកិច្ច និងហិរញ្ញវត្ថុ និងដោយមានការចូលរួមពីសំណាក់ឯកឧត្តម លោកជំទាវ ជាថ្នាក់ដឹកនាំ និងក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃអង្គភាពក្រោមឱវាទក្រសួងសេដ្ឋកិច្ច និងហិរញ្ញវត្ថុ, នាព្រឹកថ្ងៃទី ១៩ ខែ ឧសភា ឆ្នាំ ២០២០ វេលាម៉ោង ០៩:០០នាទីព្រឹក, នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
ឯកឧត្តមអគ្គបណ្ឌិតសភាចារ្យ ឲ្យដឹងបន្តថា ប្រព័ន្ធគណនេយ្យភាពហិរញ្ញវត្ថុ ត្រូវបាន និងកំពុងកសាង តាមរយៈការដាក់ឲ្យប្រើប្រាស់ ប្រព័ន្ធបច្ចេកវិទ្យាព័ត៌មាន សម្រាប់ការគ្រេប់គ្រង ហិរញ្ញវត្ថុសាធារណៈ (FMIS) ជំហ៊ានទី១ និងទី២ ។ មកដល់ពេលនេះ, ប្រព័ន្ធ FMIS ត្រូវបានដាក់ឲ្យប្រើប្រាស់ ជាផ្លូវការនៅថ្នាក់កណ្ដាល នៃក្រសួងសេដ្ឋកិច្ចហិរញ្ញវត្ថ, រតនាគាររាជាធានី-ខេត្ត មន្ទីរសេដ្ឋកិច្ចនិងហិរញ្ញវត្ថុ រាជធានី-ខេត្តនិងក្រសួង-ស្ថាប័នចំនួន៣៧ ។
ឯកឧត្តម បានបន្តថា ការពង្រឹងនិងពង្រីក ការអនុវត្តថវិកាកម្មវិធី ជាមូលដ្ឋានគ្រឹះសម្រាប់រៀបចំ និងកំណត់ការផ្លាស់ប្ដូរ ប្រព័ន្ធថវិកាកម្ពុជា ដើម្បីក្លាយជាឧបករណ៍ សម្រាប់ការផ្សារភ្ជាប់ថវិកា ទៅនឹងគោលនយោបាយ ។ គិតត្រឹមឆ្នាំ២០១៩ ថវិកាកម្មវិធី ត្រូវបានដាក់ឲ្យអនុវត្តគ្រប់ក្រសួង-ស្ថាប័ន និងរដ្ឋបាលខេត្តចំនួន ១៨ ហើយរដ្ឋបាលរាជធានី-ខេត្ត ផ្សេងទៀត នឹងត្រូវដាក់ឲ្យអនុវត្តជាបន្តបន្ទាប់ រហូតដល់ឆ្នាំ២០២១ ។
សេចក្ដីប្រកាសព័ត៌មានបញ្ជាក់ថា សម្រាប់ការត្រៀមខ្លួនជំហានបន្ទាប់ ឬគណនេយ្យភាពសមិទ្ធកម្ម ក្រសួងសេដ្ឋកិច្ច និងហិរញ្ញវត្ថុ បាននិងកំពុងរៀបចំច្បាប់ស្ដីពី ប្រព័ន្ធហិរញ្ញវត្ថុថ្មី, កែសម្រួលអនុក្រឹត្យ ៨១ អនក្រ.បក ចុះថ្ងៃទី១៦ ខែវិច្ឆិកា ឆ្នាំ១៩៩៥ ស្ដីពីការបង្កើតការត្រួតពិនិត្យហិរញ្ញវត្ថុ លើចំណាយថវិការដ្ឋនៅតាមក្រសួង ខេត្ត ក្រុង ក្រុងស្វយ័ត រាជធានីភ្នំពេញ និងអង្គការសាធារណៈ និងអនុក្រឹត្យលេខ ៨២ អនក្រ.បក ចុះថ្ងៃទី១៦ ខែវិច្ឆិកា ឆ្នាំ១៩៩៥ ស្ដីពីបទបញ្ជាទូទៅ នៃគណនេយ្យសាធារណៈ ។ ទន្ទឹមនឹងនេះ, រាជរដ្ឋាភិបាលកម្ពុជា បានដាក់ឲ្យអនុវត្ត យុទ្ធសាស្ត្រនៃការកែទម្រង់ ប្រព័ន្ធថវិកា ឆ្នាំ២០១៨-២០២៥ យុទ្ធសាស្ត្រកៀរគរចំណូលឆ្នាំ ២០១៩-២០២៣ យុទ្ធសាស្ត្រ នៃការកែទម្រង់ប្រព័ន្ធថវិកា រដ្ឋបាលថ្នាក់ក្រោមជាតិ ឆ្នាំ២០១៩-២០២៥ យុទ្ធសាស្ត្រ នៃការកែទម្រង់ប្រព័ន្ធលទ្ធកម្ម សាធារណៈឆ្នាំ២០២៩-២០២៥ យុទ្ធសាស្ត្រស្ដីពីការកែទម្រង់ប្រព័ន្ធគ្រប់គ្រងការវិនិយោគសាធារណៈឆ្នាំ ២០១៩-២០២៥ និងយុទ្ធសាស្ត្រស្ដីពីការគ្រប់គ្រងបំណុលសាធារណៈឆ្នាំ២០១៩-២០២៣ ហើយយុទ្ធសាស្ត្រនីមួយៗ មានផែនការសកម្មភាពលម្អិត ដើម្បីឲ្យការអនុវត្តប្រកដដោយស្មារតី ទទួលខុសត្រូវ ប្រសិទ្ធភាពនិងស័ក្តិសិទ្ធភាព ។
ជាយន្តការសម្រាប់ការគាំទ្រ ការអនុវត្តកម្មវិធី កែទម្រង់ការគ្រប់គ្រងហិរញ្ញវត្ថុសាធារណៈ ប្រកដដោយជោគជ័យ និងចីរភាព ក្រសួងសេដ្ឋកិច្ច និងហិរញ្ញវត្ថុ បានបណ្ដុះបណ្ដាល មន្ត្រីរាជការនៃក្រសួងសេដ្ឋកិច្ចនិងហិរញ្ញវត្ថុ និងក្រសួង ស្ថាប័ន ចំនួន ១០៥៩ លើជំនាញសេដ្ឋកិច្ច និងហិរញ្ញវត្ថុ ហើយកំពុងរៀបចំការបណ្តុះបណ្តាលតាមប្រព័ន្ធអនឡាញ និងរៀបចំផែនការយុទ្ធសាស្ត្រ ស្ដីពីការកសាង និងអភិវឌ្ឍសមត្ថភាព ក្នុងក្របខ័ណ្ឌកម្មវិធីកែទម្រង់ ការគ្រប់គ្រងហិរញ្ញវត្ថុ សាធារណៈដំណាក់កាលទី៤ ។
ពាក់ព័ន្ធនឹងការពិនិត្យវឌ្ឍនភាពនៃការអនុវត្តផែនការសកម្មភាព ដំណាក់កាលទី៣ ឆ្នាំ២០១៦ -២០១៩ និងការត្រៀមរៀបចំក្របខ័ណ្ឌផែនការសកម្មភាពរួមដំណាក់កាលទី៤ គឺការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ ឆ្នាំ២០១៦ -២០១៩ សម្រេចបានវឌ្ឍនភាពតាមការគ្រោងទុក ជាពិសេសលើការរៀបចំយុទ្ធសាស្ត្រ ផែនការ និងគោលការណ៍ណែនាំ ដែលបានបង្កើតជាមូលដ្ឋានគ្រឹះ ដើម្បីពង្រឹងការគ្រប់គ្រងហិរញ្ញវត្ថុសាធារណៈប្រកបដោយប្រសិទ្ធភាព និងស័ក្តិសិទ្ធិភាព។
ជាមួយគ្នានេះ ក្រសួងសេដ្ឋកិច្ច ក៏បាននិងកំពុងរៀបចំរបាយការណ៍វាយតម្លៃចំណាយសាធារណៈ និងគណនេយ្យភាពហិរញ្ញវត្ថុ (PEFA) ថ្នាក់ជាតិ និងថ្នាក់ក្រោមជាតិ ពីឆ្នាំ២០២០ ដែលមានការគាំទ្រជាជំនួយបច្ចេកទេស ពីសហភាពអឺរ៉ុប និងមូលនិធិរូបិយវត្ថុអន្តរជាតិ ដែលគ្រោងបញ្ចប់ក្នុងឆ្នាំ២០២០នេះ។ លទ្ធផលនៃការវាយតម្លៃការអនុវត្តផែនការសកម្មភាព រួម ដំណាក់កាលទី៣ និងPEFA នឹងក្លាយជាធាតុចូលដ៏សំខាន់សម្រាប់រៀបចំក្របខ័ណ្ឌផែនការសកម្មភាពរួម ដំណាក់កាលទី៤។
ឯកឧត្តមឧបនាយករដ្ឋមន្ត្រី បានផ្តល់អនុសាសន៍ណែនាំគ្រប់អង្គភាពក្រោមឱវាទ ក្រសួងសេដ្ឋកិច្ច បន្តជំរុញការអនុវត្តន៍ផែនការសកម្មភាពរួម ដំណាក់កាលទី៣ និងការងារប្រទាក់ក្រឡាគ្នារវាងការដ្ឋានកែទម្រង់បី បូកមួយ (ការកែទម្រង់ការគ្រប់គ្រងហិរញ្ញវត្ថុសាធារណៈ វិមជ្ឈការ និងវិសហមជ្ឈការ រដ្ឋបាលសាធារណៈ និងច្បាប់និងប្រព័ន្ធយុត្តិធម៌) ៕
