ជិះឌុបប្រពន្ធដើរលក់សាច់គោ ជួបគ្រោះអកុសល ស្រាប់តែជាយសំពត់ប្រពន្ធស្រូបចូលមីញ៉ុងម៉ូតូ ធ្លាក់បោកក្បាលនឹងថ្នល់ស្លាប់ភ្លាមៗ
កណ្តាល៖ ការជិះម៉ូតូ នោះស្ត្រីៗត្រូវបានគេកង្វល់ជារឿយៗ ថាអាចនឹងកើតមានគ្រោះថ្នាក់នៅពេលណាមួយពុំខាន ដោយសារការធ្វេសប្រហែសមួយនេះ ។ ពិតណាស់ ការជិះម៉ូតូស្ថិតក្នុងស្ថានភាពស្លៀកសំពត់ ឬ សារ៉ុងនេះឯង គឺអាចប្រឈមនឹងហានិភ័យគ្រោះថ្នាក់ខ្លាំងណាស់ ព្រោះថា ជាយសំពត់របស់អ្នក នឹងអាចត្រូវបានស្រូបចូលទៅក្នុងមីញ៉ុងម៉ូតូយ៉ាងងាយបំផុត ប្រសិនបើមានការធ្វេសប្រហែសតែបន្តិច។
ជាក់ស្តែង ដូចករណីស្ត្រីខ្មែរឥស្លាមម្នាក់ បានត្រូវស្លាប់យ៉ាងអាណោចអាធមជាទីបំផុត បន្ទាប់ពីជួបគ្រោះថ្នាក់ធ្លាក់ពីម៉ូតូបោកក្បាលនឹងថ្នល់ ដោយសារតែជាយសំពត់របស់នាង ត្រូវបានស្រូបចូលក្នុងមីញ៉ុងម៉ូតូ ខណៈប្តីកំពុងឌុប។
ហេតុការណ៍ស្លុតរន្ធត់នេះ បានកើតឡើងកាលពីវេលាម៉ោង ១២ និង ៥ នាទី ថ្ងៃទី ២៥ ខែ ឧសភា ឆ្នាំ ២០២០ នៅលើកំណាត់ផ្លូវជាតិលេខ ២១ ចំណុចមុខវត្តវេឡុវន្ត ស្ថិតនៅក្នុងភូមិព្រែកធន់ ឃុំព្រែកថ្មី ស្រុកកោះធំ ខេត្ត កណ្តាល ។
ស្ត្រីរងគ្រោះមានឈ្មោះ ស្លេះ.អាំ មី ណាស់ ភេទ ស្រី អាយុ ២៥ ឆ្នាំ ជនជាតិ ខ្មែរឥស្លាម បានស្លាប់ភ្លាមៗនៅនឹងកន្លែងកើតហេតុ ដោយពុំបានពាក់មួកសុវត្ថិភាព។ រីឯប្តីរបស់នាងជាអ្នកឌុបមានឈ្មោះ យូ នី ភេទ ប្រុស អាយុ ២៦ ឆ្នាំ ជនជាតិ ខ្មែរឥស្លាមដូចគ្នា ។ ប្តីប្រពន្ធនេះមានមុខរបរជាអ្នកលក់សាច់គោ នៅខេត្តកំពត និងមានទីលំនៅភូមិចាមក្រោម ឃុំព្រែកថ្មី ស្រុកកោះធំ ខេត្តកណ្តាល៕
