រថយន្តដឹកកម្មករកំពុងឈប់ស្តុប ត្រូវឡានដឹកជ្រូកបុករះ របួសធ្ងន់ស្រាលកម្មករចំនួន8នាក់
ភ្នំពេញ៖នៅព្រឹកថ្ងៃទី២៧ ខែឧសភា ឆ្នាំ២០២០ នេះ មានករណីគ្រោះថ្នាក់ចរាចរណ៍មួយ ដោយរថយន្តដឹកជ្រូក បើកបុករះរថយន្តដឹកកម្មករ ដែលកំពុងឈប់ស្តុប បាគូ សង្កាត់ដង្កោ ខណ្ឌដង្កោ បណ្តាលឲ្យកម្មករចំនួន៨នាក់ រងរបួសធ្ងន់ស្រាល ។ ក្រោយកើតហេតុ ជនបង្កតៃកុងរថយន្តដឹកជ្រូកបានរត់គេចខ្លួន ។
លោក ម៉ាង សំរិទ្ធ នាយផ្នែកចរាចរណ៍ខណ្ឌដង្កោ ថ្លែងថា ករណីនេះ បណ្តាលឲ្យកម្មករចំនួន៨នាក់ រងរបួសធ្ងន់ស្រាល ហើយជនបង្កបានរត់គេចខ្លួន ។ បច្ចុប្បន្ន នគរបាលកំពុងចាត់ការតាមនីតិវិធីលើករណីនេះ ៕
