ជប៉ុន គ្រោងនឹងផ្ដល់នូវ ហិរញ្ញប្បទានឥតសំណងប្រមាណ ៦២លាន ដុល្លារ ដល់កម្ពុជា សម្រាប់គាំទ្រដល់វិស័យអប់រំ និងសុខាភិបាល
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានចេញប្រកាសព័ត៌មានថា ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួប ពិភាក្សាការងារជាមួយឯកឧត្តម Masahiro MIKAMI ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំព្រះរាជាណាចក្រកម្ពុជា អមដោយមន្ត្រីការទូតជប៉ុន និងតំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) នៅកម្ពុជា, នៅព្រឹកថ្ងៃទី ២៧ ខែ ឧសភា ឆ្នាំ ២០២០, នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
រាជរដ្ឋាភិបាលជប៉ុន គ្រោងនឹងផ្ដល់នូវ ហិរញ្ញប្បទានឥតសំណងចំនួន ២.៥០១លានយ៉េនជប៉ុន ត្រូវជាប្រមាណ ៦២,៧៣លាន ដុល្លារ ដល់រាជរដ្ឋាភិបាលកម្ពុជា សម្រាប់គាំទ្រដល់វិស័យអប់រំ និងសុខាភិបាលនៅកម្ពុជា ។
ឯកឧត្តម អូន ព័ន្ធមុនីរ័ត្ន បានថ្លែងអំណរគុណ យ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ដែលបានផ្តល់ជំនួយបច្ចេកទេស ហិរញ្ញប្បទានឥតសំណង និងឥណទានសម្បទានរួម អភិវឌ្ឍសេដ្ឋកិច្ច និងសង្គមនៅកម្ពុជា រហូតមក ជាពិសេសចំពេលដែលកម្ពុជា ក៏ដូចជា ពិភពលោក កំពុងតែជួបវិបត្តិ និងការរាលដាលនៃជំងឺកូវីដ-១៩ ។ រាជរដ្ឋាភិបាលជប៉ុន គ្រោងនឹងផ្តល់នូវ ហិរញ្ញប្បទានឥតសំណង ទឹកប្រាក់ប្រមាណ ៦០០០លានយ៉េនជប៉ុន ត្រូវជាប្រមាណ ១៨លានដុល្លារអាមេរិក ជូនរាជរដ្ឋាភិបាលកម្ពុជា តាមរយៈការផ្តល់ជាឧបករណ៍ សម្ភារៈ និងបរិក្ខារពេទ្យ ជូនក្រសួងសុខាភិបាល សម្រាប់ទប់ស្កាត់ និងបង្ការការ រីករាលដាលនៃជំងឺកូវីដ-១៩ នៅកម្ពុជា ។
ជាមួយគ្នានេះ ឯកឧត្តមឧបនាយករដ្ឋមន្ត្រី បានជម្រាបជូនឯកឧត្តមទូតជប៉ុនផងដែរ អំពីវិធានការបន្ទាន់ៗបន្តបន្ទាប់ ដែលរាជរដ្ឋាភិបាលកម្ពុជា បានដាក់ចេញសំដៅជួយ ដល់វិស័យឯកជន កម្មករ និយោជិត និងជនងាយរងគ្រោះ ដែលទទួលរងផលប៉ះពាល់ធ្ងន់ធ្ងរពីការរីករាលដាលនៃជំងឺកូវីដ-១៩ ក្នុងអំឡុងពេលជំងឺកូវីដ១៩ ក៏ដូចជាដើម្បីស្តារសេដ្ឋកិច្ចកម្ពុជាឡើងវិញ បន្ទាប់ពីវិបត្តិនៃជំងឺនេះ ដែលមកដល់បច្ចុប្បន្ន វិធានការទាំងនេះ បានឈានដល់វិធានការជុំទី ៤ ហើយ ។
ក្នុងឱកាសនោះដែរ ឯកឧត្តម MIKAMI Masahiro បានវាយតម្លៃខ្ពស់ចំពោះ កិច្ចខិតខំប្រឹងប្រែងរបស់ រាជរដ្ឋាភិបាលកម្ពុជា ដែលបានចាត់វិធានការ យ៉ាងល្អប្រសើរ ក្នុងការបង្ការ និងទប់ស្កាត់ការរីករាលដាលនៃជំងឺ កូវីដ-១៩ ។ រដ្ឋាភិបាលជប៉ុន នឹងបន្តផ្តល់ជំនួយបច្ចេកទេស ហិរញ្ញប្បទានឥតសំណង ជាពិសេសប្រាក់កម្ចីឥណទានសម្បទានផងដែរ សម្រាប់ជួយគាំទ្រដល់ រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ និងស្តារសម្បទាសេដ្ឋកិច្ចឡើងវិញ បន្ទាប់ពីការរងផលប៉ះពាល់ ដោយសារជំងឺកូវីដ-១៩ ។
ឯកឧត្តមអគ្គរាជទូតជប៉ុន ក៏បានជម្រាបអំពី កិច្ចសហប្រតិបត្តិការសេដ្ឋកិច្ច និងហិរញ្ញវត្ថុ រវាងប្រទេសទាំងពីរ កម្ពុជា-ជប៉ុន ដែលបាននាំមកនូវសមិទ្ធផល ប្រកបដោយផ្លែផ្កាជាច្រើន ទាំងក្នុងវិស័យសាធារណៈ និងវិស័យឯកជន ។ ផ្អែកតាមស្មារតី នៃកិច្ចប្រជុំកំពូលអាស៊ាន+៣ ស្តីពីជំងឺកូវីដ-១៩ កាលពីថ្ងៃទី១៤ ខែមេសា ឆ្នាំ២០២០កន្លងទៅ រដ្ឋាភិបាលជប៉ុន បានបង្ហាញនូវជំហរជួយ ដល់បណ្តាប្រទេស ក្នុងតំបន់អាស៊ាន ក្នុងការប្រយុទ្ធប្រឆាំងនឹងជំងឺកូវីដ១៩ ដែលក្នុងនោះ ក៏មានប្រទេសកម្ពុជាផងដែរ ។
ឯកឧត្តមអគ្គរាជទូតបញ្ជាក់ថា ជាក់ស្តែង ក្នុងពេលដ៏ឆាប់ខាងមុខនេះ រដ្ឋាភិបាលជប៉ុនគ្រោងនឹង បន្តផ្តល់នូវហិរញ្ញប្បទាន ឥតសំណងសម្រាប់គម្រោង ចំនួនពីរ មានទឹកប្រាក់សរុបប្រមាណ ២.៥០១លានយ៉េនជប៉ុន ត្រូវជាប្រមាណ ៦២,៧៣លាន ដុល្លារអាមេរិក សម្រាប់គាំទ្រដល់វិស័យអប់រំ និង សុខាភិបាលកម្ពុជាផងដែរ ។
ជាថ្មីម្តងទៀត ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងអរគុណ និងវាយតម្លៃខ្ពស់ ចំពោះលោកទូតជប៉ុន រាជរដ្ឋាភិបាល និងប្រជាជនជប៉ុន ដែលជានិច្ចកាលតែងតែផ្តល់នូវ វិភាគទានជាហិរញ្ញប្បទានដល់ការស្តារ និងការអភិវឌ្ឍសេដ្ឋកិច្ច និងសង្គមកម្ពុជា ។ រដ្ឋាភិបាលជប៉ុន តែងតែជួយឧបត្ថម្ភ គាំទ្រដល់រាជរដ្ឋាភិបាលកម្ពុជា ចំគោលដៅ និងទាន់ពេលវេលា ជាពិសេសក្នុងពេលជួបការលំបាក ។ សកម្មភាពទាំងនេះ គឺជាកាយវិការមនុស្សធម៌ដ៏ថ្លៃថ្លា ដែលឆ្លុះបញ្ចាំងឲ្យឃើញថា “ប្រទេសជប៉ុន គឺជាដៃគូយុទ្ធសាស្ត្រដ៏ប្រពៃ និងជាមិត្តភ័ក្តដ៏ល្អ សម្រាប់កម្ពុជា” ៕
