បងស្រី ឃិន ស្រីឡង ស្រែកយំរឿងធ្វើអត្តសញ្ញាណប័ណ្ណមិនបាន ព្រោះគ្មានឯកសារ
ភ្នំពេញ៖ អធិការដ្ឋាននគរបាលខណ្ឌសែនសុខ បានឲ្យដឹងថា នៅថ្ងៃទី ២៧ ខែ ឧសភា ឆ្នាំ២០២០ វេលាម៉ោង ៨ និង ០០នាទី ក្រោយពីទទួលបានព័ត៌មានភ្លាម អធិការដ្ឋាននគរបាលខណ្ឌសែនសុខ បានអញ្ជើញបងស្រី ឃិន ស្រីឡង មកប៉ុស្តិ៍នគរបាលរដ្ឋបាលឃ្មួញ ដើម្បីជួយសម្រួលក្នុងការបំពេញបែបបទធ្វើអត្តសញ្ញាណប័ណ្ណសញ្ជាតិខ្មែរ ដោយនៅថ្ងៃទី ២៥ ខែឧសភា ឆ្នាំ២០២០ បងស្រី ឃិន ស្រីឡង បានអញ្ជើញមកធ្វើអត្តសញ្ញាណប័ណ្ណដោយពុំមានឯកសារអ្វីទាំងអស់។
លោក ម៉េងវ៉ាង អធិការខណ្ឌ សែនសុខ និង ឯកឧត្តម សថេត ស្នងការ នគរបាលរាជធានីភ្នំពេញ ដែលបានជួយរកនិតិវិធី ឲ្យប្អូនស្រី អាចធ្វើអត្តសញ្ញាណប័ណ្ណបាន។
ខាងក្រោមនេះ ជាអត្ថបទ ដកស្រង់ចេញពីផេកស្នងការ នគរបាលរាជធានីភ្នំពេញ សេចក្តីបកស្រាយបំភ្លឺ របស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ទាក់ទងករណីទាក់ទងទៅនឹងបងស្រីម្នាក់មកធ្វើអត្តសញ្ញាណប័ណ្ណ ប៉ុន្តែគាត់មិនមានឯកសារគ្រប់គ្រាន់។
កាលពីថ្ងៃទី២៥ ខែឧសភា ឆ្នាំ២០២០ មានបងស្រីម្នាក់ឈ្មោះ ឃិន ស្រីឡុង គាត់បានមកធ្វើអត្តសញ្ញាណប័ណ្ណ នៅប៉ុស្តិ៍នគរបាលរដ្ឋបាលឃ្មួញ នៃអធិការដ្ឋាននគរបាល ប៉ុន្តែដោយសារបងស្រី មិនមានឯកសារគ្រប់គ្រាន់ ដូច្នេះហើយទើបខាងប៉ុស្តិ៍ឲ្យគាត់ត្រឡប់ទៅវិញ ដើម្បីយកឯកសារឲ្យបានគ្រប់គ្រាន់ ហើយម្យ៉ាងវិញទៀត ដោយសារគាត់មិនបានមើលច្បាស់លាស់ គាត់បាននិយាយថា មន្ត្រីប៉ុស្តិ៍បានប្រើប្រាស់សម្តីមិនសមរម្យជាមួយគាត់ តាមពិតមិនមែនជាសម្តីរបស់មន្ត្រីនោះទេ គឺជាសម្តីរបស់ប្រជាពលរដ្ឋដែលគាត់មកធ្វើអត្តសញ្ញាណប័ណ្ណនៅទីនោះដែរ ។
ដោយបានទទួលព័ត៌មាន នៅថ្ងៃទី២៧ ខែឧសភា ឆ្នាំ២០២០ លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានបញ្ជាដោយផ្ទាល់ដល់មន្ត្រីប៉ុស្តិ៍ឲ្យធ្វើការអញ្ជើញបងស្រី និងម្តាយក្មេក មកប៉ុស្តិ៍ដើម្បីធ្វើការសម្របសម្រួល ឲ្យម្តាយក្មេកគាត់យល់ព្រមបញ្ចូលឈ្មោះគាត់ ក្នុងសៀវភៅស្នាក់នៅ ។ ក្រោយពីមានឯកសារគ្រប់គ្រាន់ប៉ុស្តិ៍នគរបាលរដ្ឋបាល បានរៀបចំធ្វើអត្តសញ្ញាណប័ណ្ណជូនបងស្រីរួចរាល់ហើយ បច្ចុប្បន្នគាត់បានទទួលយកបង្កាន់ដៃ ដើម្បីរង់ចាំទទួលយកអត្តសញ្ញាណប័ណ្ណរបស់គាត់តែប៉ុណ្ណោះ ។
ជាចុងបញ្ចប់បងស្រីបានសូមទោស ដែលមានការយល់ច្រឡំ មកលើសមត្ថកិច្ច ហើយសម្តែងភាពរីករាយ និងអរគុណយ៉ាងខ្លាំងដល់លោកអធិការ លោកនាយប៉ុស្តិ៍ និងមន្ត្រីទាំងអស់ ដែលបានជួយសម្របសម្រួល ឲ្យគាត់ទទួលបានឯកសារគ្រប់គ្រាន់ ដើម្បីធ្វើអត្តសញ្ញាណប័ណ្ណបាន ។
សូមបបញ្ជាក់ថា បើតាមការផ្សាយរបស់ផេកហ្វេសប៊ុក San Prum ជាទីប្រឹក្សាក្រសួងព័ត៌មាន បានលើកឡើងថា ខ្វះឯកសារធ្វើអត្តសញ្ញាណប័ណ្ណមិនបានទេ!!។ ស្ត្រីពកូនតូចម្នាក់ បានរ៉ាយរ៉ាប់ដោយទឹកភ្នែក ករណីខ្វះឯកសារ នគរបាល សង្កាត់
ឃ្មួញ ខណ្ឌសែនសុខ ឆ្លើយថា”មិនអាចធ្វើអត្តសញ្ញាណប័ណ្ណឲ្យបានទេ”…..ប្រទេសមានច្បាប់ គ្រួសារមានវិន័យ ..តែខ្ញុំជឿថា ប្អូនស្រី ក្នុងនាមជាខ្មែរ ពិតជាត្រូវមានឯកសារផ្ទាល់ខ្លួន ស្របតាមច្បាប់ នៃព្រះរាជាណាចក្រកម្ពុជាយើង…ដោយហេតុនេះ ខ្ញុំ ស្នើសូម លោក អធិការ ខណ្ឌសែនសុខ មេត្តាជួយសម្រួលនិងផ្តល់និតិវិធី ឲ្យប្អូនស្រី អាចធ្វើអត្តសញ្ញាណប័ណ្ណបាន ជាពិសេស គឺប្រាប់វិធី ដែលប្អូនស្រីអាច បានឬអាចមានឈ្មោះ ក្នុងសៀវភៅគ្រួសារ។….គ្រួសារខ្លះកំព្រាឪពុកម្តាយ… ហើយខ្លះទៀតបែកចេញពីឪពុកម្តាយយូរឆ្នាំហើយ មានគ្រួសារដោយចិត្តឯង ពុំមានឪពុកម្តាយដឹងឭ ឬក៏បង្កើតគ្រួសារដ៏តូចដោយខ្លួនឯង ទើបមិនបានធ្វើសៀវភៅគ្រួសារដោយព្រាងទុក។ល៕
