ត្រួតពិនិត្យការងារ ការរៀបចំខួបលើកទី៤៣ឆ្នាំ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត»
ភ្នំពេញ៖ បន្ទាប់ពីបានប្រជុំពិភាក្សាបង្កើតសមាសភាពក្រុមការងារ ដើម្បីរៀបចំប្រារព្ធខួបលើកទី៤៣ឆ្នាំ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត»ថ្ងៃទី២០ មិថុនា ឆ្នាំ១៩៧៧ – ថ្ងៃទី២០ ខែ មិថុនា ឆ្នាំ២០២០ រួចមក នៅថ្ងៃទី០២ ខែមិថុនា ឆ្នាំ២០២០ នៅបញ្ជាការដ្ឋានកងរាជអាវុធហត្ថលើផ្ទៃប្រទេស ក្រុមការងាររៀបចំប្រារព្ធខួបលើកទី៤៣ឆ្នាំ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត» បានបើកកិច្ចប្រជុំជាលើកទី២ ដើម្បីត្រួតពិនិត្យការងារ ដែលក្រុមកាងារបានអនុវត្តមួយជំហានកន្លងមក ដែរកិច្ចប្រជុំនេះ បានប្រព្រឹត្តិទៅក្រោមអធិបតីភាព ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងមានការចូលរួមពីសមាជិកក្រុមការងារ មកពីបណ្តាអង្គភាពនានា ក្នុងកងយោធពលខេមរភូមិន្ទ និងនគរបាលជាតិ ជាច្រើនរូបទៀត។
ថ្លែងបើកកិច្ចប្រជុំ ឯកឧត្តម នាយឧត្តមសេនីយ៍ សៅ សុខា បានសំដែងនូវការកោតសរសើរ ចំពោះក្រុមការងារបច្ចេកទេសទាំងអស់ ដែលបានខិតខំប្រឹងប្រែងបំពេញការងារក្នុងពេលកន្លងមក។ ឯកឧត្តម បានបញ្ជាក់ថា៖ ការពិភាក្សាគ្នាឲ្យបានល្អិតល្អន់ អំពីការរៀបចំប្រារព្ធខួបលើកទី៤៣ឆ្នាំ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត» នាពេលនេះ គឺជាត្រីវិស័យសម្រាប់នាំផ្លូវដល់ការរៀបចំពិធីប្រារព្ធខួបលើកទី៤៣ឆ្នាំ ក្នុងឆ្នាំ២០២០ នេះឲ្យទទួលបានលទ្ធផលល្អបន្ថែមទៀត។
កិច្ចប្រជុំនាឱកាសនោះបានពិភាក្សាទៅលើរបៀបវារៈចំនួន៣ ក្នុងនោះរួមមាន៖ ខ្លឹមសារនៃការប្រារព្ធពិធី ការពិភាក្សាអំពីកម្មវិធីផ្លូវការ ដែលនឹងត្រូវប្រារព្ធធ្វើនៅថ្ងៃទី២០ ខែមិថុនា ឆ្នាំ២០២០ នៅភូមិកោះថ្ម ឃុំទន្លូង ស្រុកមេមុត ខេត្តត្បូងឃ្មុំ ដែលមាននៅសាលារៀនកោះថ្ម និង នៅចំណុចអិច ១៦, ការពិភាក្សាអំពីសមាសភាព ការអញ្ជើញភ្ញៀវចូលរួម, ការពិភក្សាអំពីមធ្យោបាយដឹកជញ្ជូន ពេទ្យចល័ត និងការធានាលើការហូបចុក និង ការស្នាក់នៅក្នុងថ្ងៃប្រារព្ធពិធី។ កិច្ចប្រជុំក៏បានពិភាក្សាគ្នាផងដែល អំពីវិធានការការពារសន្តិសុខ ដែលទទួលខុសត្រូវដោយកម្លាំងនគរបាលជាតិ និងកម្លាំងកងរាជអាវុធហត្ថប្រចាំខេត្តត្បូងឃ្មុំ។
ចូលរួមមានប្រសាសន៍នៅក្នុងកិច្ចប្រជុំនាឱកាសនោះដែរ ឯកឧត្តម នាយឧត្តមសេនីយ៍ ណឹម សុវត្ថិ ទីប្រឹក្សាពិសេស សម្តេចពិជ័យសេនា ទៀ បាញ់ អគ្គនាយក អគ្គនាយកដ្ឋាននយោបាយ និងកិច្ចការបរទេស និងជាប្រធានក្រុមការងារសិក្សាស្រាវជ្រាវសាងសង់វិមានឈ្នះ ឈ្នះ បានមានប្រសាសន៍ថា៖ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត» ថ្ងៃទី២០ ខែមិថុនា ឆ្នាំ១៩៧៧ គឺមានលក្ខណៈជាប្រវត្តិសាស្ត្រ ដែលមានទំនាក់ទំនងទៅជាមួយប្រទេសវៀតណាម ជាមិត្ត ដែលបានបង្កើតឲ្យមានថ្ងៃ០២ ធ្នូ និងថ្ងៃជ័យជំនះ ៧ មករា ឆ្នាំ១៩៧៩ រួមនិងព្រឹត្តិការណ៍ផ្សេងៗទៀត នឹងបាននាំទៅដល់នយោបាយឈ្នះ ឈ្នះ។
សូមបញ្ជាក់ថា៖ ការប្រារព្ធពិធីរំលឹកខួបលើកទី៤៣ឆ្នាំ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ «ប៉ុល ពត» ថ្ងៃទី២០ មិថុនា ឆ្នាំ១៩៧៧ – ថ្ងៃទី២០ ខែមិថុនា ឆ្នាំ២០២០ គឺដើម្បីរំលឹកឡើងវិញនូវប្រវត្តិសាស្ត្ររំដោះប្រទេសជាតិរបស់ សម្តេចតេជោ ហ៊ុន សែន និងយុទ្ធមិត្ត៤រូប ដែលបានយកជីវិតធ្វើជាដើមទុន ក្នុងការរំដោះប្រទេសជាតិឲ្យបានរួចចាកផុតពីរបបប្រល័យពូជសាសន៍ ប៉ុល ពត នៅថ្ងៃទី ៧ មករាឆ្នាំ១៩៧៩ និងបានដឹកនាំប្រទេសជាតិ ឲ្យទទួលបាននូវសុខសន្តិភាព ក្រោមគោលនយោបាយឈ្នះ ឈ្នះ ធ្វើឲ្យប្រទេសជាតិ មានសន្តិភាពពេញលេញ និងការអភិវឌ្ឍរីកចំរើនមកដល់ពេលបច្ចុប្បន្ននេះ ៕
