លោកស្រីកិត្តិសង្គហបណ្ឌិត ម៉ែន សំអន បាន ប្រគេនទៀនព្រះវស្សានិងទេយ្យវត្ថុ របស់ សម្តេចតេជោនិងសម្តេចកិត្តិព្រឹទ្ធបណ្ឌិតដល់ព្រះសង្ឃគង់ចាំព្រះវស្សានៅវត្តច័ន្ទគិរី កំពង់ស្ពឺ
ភ្នំពេញ៖ លោកស្រីកិត្តិសង្គហ បណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួង ទំនាក់ទំនង ជាមួយរដ្ឋសភា- ព្រឹទ្ធសភា និង អធិការកិច្ចព្រមទាំងលោកស្រី ទ្រី សុខា ពិធីការសម្តេចតេជោ និងលោកស្រី ឧកញ៉ា អ៉ឹង ស៊ីស្រ៊ន ប្រគេនទៀន ព្រះវស្សានិង ទេយ្យវត្ថុ ព្រមទាំងថវិកាជិត៤០លានរៀលជាអំណោយដ៍ថ្លៃថ្លារបស់សម្តេចតេជោនិងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដល់ព្រះសង្ឃគង់ ចាំព្រះវស្សា រអស់ត្រីមាស នៅវត្តច័ន្ទគីរី (ហៅវត្តភ្នំចាស់) ស្ថិតក្នុងស្រុកឪរ៉ាល់ ខេត្តកំពង់ស្ពឺ នាព្រឹកថ្ងៃពុធ១៣កើត ខែជេស្ឋ ឆ្នាំជូតទោស័កព.ស.២៥៦៤ ត្រូវនឹងថ្ងៃទី០៣ ខែមិថុនា ឆ្នាំ២០២០។
ក្នុងឱកាសនោះលោកស្រីកិត្តិសង្គហបណ្ឌិតក៏បានពាំនាំនូវការផ្តាំផ្ញើសួរសុខទុក្ខដោយក្តីនឹករលឹកពីសំណាក់ សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនបងប្អូនប្រជាពលរដ្ឋទាំងអស់គ្នានៅទូទាំងខេត្តកំពង់ស្ពឺដោយសម្តេចទាំងទ្វេរតែងតែគិតគូរខ្ពស់ចំពោះជីវភាពប្រចាំថ្ងៃរបស់ប្រជាពលរដ្ឋ។
លោកស្រីកិត្តិសង្គហបណ្ឌិតបានថ្លែងថា ក្រោយថ្ងៃរំដោះ៧មករា ឆ្នាំ១៩៧៩ មកដល់បច្ចុប្បន្ននេះ អាស្រ័យដោយមានការគាំទ្រយ៉ាងរឹងមាំ ពីសំណាក់ប្រជាពលរដ្ឋគ្រប់ស្រទាប់ជាន់ថ្នាក់ គណបក្ស ប្រជាជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រធាននិងជានាយករដ្ឋមន្ត្រីនៃព្រះរាជាណាចក្រកម្ពុជាបានខិតខំប្រឹងប្រែងបានដឹកនាំប្រទេស ឆ្លងកាត់ឧបសគ្គ និងការលំបាកយ៉ាងច្រើនឥត គណនា បានស្តារ កសាងជាតិ ឱ្យឆមានការរីកចម្រើន រក្សាបាននូវ សុខសន្តិភាពពេញលេញនៅទូទាំងប្រទេសព្រមទាំង សម្រេចបានសមិទ្ធិផលធំៗ ជាច្រើនទៀតជា ប្រវត្តិសាស្ត្រ មិនអាចកាត់ថ្លៃបាន ជូនជាតិមាតុភូមិ និងប្រជាជន។ ក្រោមការដឹកនាំប្រកប ដោយកិត្តិបណ្ឌិត របស់សម្តេចតេជោ ក្រោមទស្សនវិស័យវែងឆ្ងាយ គណបក្សបានធ្វើជាស្នូលនៃសាមគ្គីភាពជាតិ ឯកភាពជាតិតែមួយ និងសន្តិភាព ហើយដឹកនាំប្រទេសឈានទៅមុខ ជានិច្ច តាម ទិសដៅដ៏ត្រឹមត្រូវ និងបានបំពេញតួរនាទីដឹកនាំប្រទេសប្រកប ដោយការទទួលខុសត្រូវខ្ពស់បំផុតដោយធានាគ្រប់ដំណើរការ នយោបាយ សេដ្ឋកិច្ច សង្គមជាតិ ប្រព្រឹត្តទៅយ៉ាងល្អ ធានាបាននូវសន្តិភាព ស្ថិរភាព ឯកភាពជាតិ និងការរស់នៅដ៏សុខដុមរមនារបស់ប្រជាជនទូទាំងប្រទេស។
លោកស្រីកិត្តិសង្គហបណ្ឌិត ម៉ែន សំអន ក៏បានក្រើនរំលឹកដល់បងប្អូនប្រជាពលរដ្ឋ លោកយាយលោកពុទ្ធបរិស័តចំណុះជើងវត្តទាំងអស់ ឱ្យបន្តការប្រុងប្រយ័ត្នខ្ពស់ ពីជំងឺឆ្លងដ៏កាចសាហាវកូវីដ១៩ ដោយបង្កើនការធ្វើអនាម័យដើម្បីសុខភាពរស់នៅឱ្យបានល្អ ជាពិសេសត្រូវពាក់ម៉ាស ឬក្រម៉ា និងត្រូវដុសលាងសម្អាតដៃឱ្យបានស្អាតជាប្រចាំ ជាមួយសាប៊ូ ទឹកអាល់កុល ឬជែលកម្ចាត់មេរោគ។
លោកស្រីកិត្តិសង្គហបណ្ឌិត ម៉ែន សំអន បានបញ្ជាក់ថា ការចូលព្រះវស្សា គឺជាព្រះវិ ន័យដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឱ្យព្រះសង្ឃសាវ័កគ្រប់ អង្គប្រតិបត្តិតាម ដែលមានរយៈពេល៣ខែ គឺចាប់ថ្ងៃ១រោច ខែ អាសាធ ដល់ទី១៥ កើត ខែអស្សុជ។ ការបញ្ញត្តិឱ្យមានការកាន់ព្រះវស្សា គឺព្រះពុទ្ធជាម្ចាស់ទ្រង់មានព្រះបំណង ចង់ឱ្យព្រះសង្ឃ មានភាពងាយស្រួលក្នុងរដូវវស្សារយៈពេលបីខែនេះ ដែលជារដូវភ្លៀង ធ្លាក់ជោកជាំ។ ពិធីបុណ្យ ចូលព្រះវស្សា គឺជាពិធីបុណ្យមួយដែល មានសារៈសំខាន់ ក្នុងព្រះពុទ្ធសាសនា ជាពេល វេលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ ខ្ជួនតាមពុទ្ធឱវាទ។
លោកស្រីកិត្តិសង្គហបណ្ឌិត ម៉ែន សំអន ថ្លែងបន្តថា ពិធីបុណ្យនេះដែរ ក៏មានជួបជុំពទ្ធបរិស័ទ នមស្សការ ព្រះរតនត្រ័យ និមន្តព្រះសង្ឃ ចម្រើនព្រះបរិត្ត ដើម្បីឧទ្ទិសមហាកុសលផលបុណ្យជូនដល់ញ្ញាតិការទាំង ៧សណ្តាន និងបុព្វការីជនដែលបានចែកឋានទៅកានបរលោកខាងមុខ មកទទួលយកផល្លាអានិសង្ឃ ដែលកើតចេញអំពីបុណ្យក្នុងថ្ងៃនេះ តាមបែបប្រពៃណីព្រះពុទ្ធសាសនា ដែលជាសាសនារបស់រដ្ឋ។
លោកស្រី កិត្តិសង្គហបណ្ឌិត ម៉ែន សំអន ក៏បួងសួង បួងសួងថ្វាយព្រះពរជ័យថ្វាយព្រះមហាក្សត្រ ព្រះមហាក្សត្រី ជាសម្តេចម៉ែ សម្តេចយាយ សម្តេចយាយទួត មុនីនាថ សីហនុ និង ប្រគេនពរដល់ព្រះសង្ឃ គ្រប់ព្រះអង្គ និង ឧទ្ទិសកុសល្យផលបុណ្យគោរពជូនសម្តេចអគ្គមហាសេនា បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំ សមាជិក ព្រឹទ្ធសភា ថ្នាក់ដឹកនាំ សមាជិករដ្ឋសភា ព្រមទាំងប្រជាពលរដ្ឋនៅទូទាំងប្រទេសសូមឲ្យជួបសេចក្តីសុខសន្តិភាពនិងសេចក្តី ចម្រើនគ្រប់ៗគ្នាជារៀងរហូត។
ក្នុងឱកាសនេះដែរលោកស្រីក៏បានរៀបចំពិធីពុទ្ធាភិសេកព្រះអង្គ តម្កលទុកក្នុង ភ្នំចាស់សម្រាប់ទុកជាទីសក្ការៈផងដែរ៕ សំរិត
